Filipi 1:11 - Buku Tomoroli' Pojanci to Bo'u

¹¹ Mosampaya-a bona monoa' oa' po'ingku-ni sabana pobago Yesus Kristus hi rala tuwu'-ni, alaa-na wori' tauna mpo'une' pai' mpomobohe Alata'ala.

Filipi 1:11 Iomraidhean Croise

Matius 5:16

Wae wo'o baja to hi rala nono-ni neo' niwuni. Kana lompe' kehi-ni, bona hawe'ea tauna mpohilo, alaa-ra mpo'une' Tuama-ni to hi rala suruga.

Yohanes 15:16

Bela koi' to mpopelihi-a. Aku'-dile to mpelihi-koie. Kuwai'-koi bago hilou hi rala dunia' bona mowua' wori'. Pai' powua'-ni toe uma mpai' moronto, ria kalaua-na duu' kahae–hae-na. Jadi', napa to niperapi' hi Tuama-ku hante hanga'-ku, bate nawai'-koi.

Yohanes 15:2

Hawe'ea ra'a to mentaka' hi Aku' to uma mowua', nalali. Pai' hawe'ea ra'a to mentaka' hi Aku' pai' to mowua', napeholui pai' napegalihi, bona kawoo–woria' wua'-na.

Yohanes 15:8

Ane mowua' wori'-koi, Tuama-ku rapomobohe. Ane hewa toe-mi po'ingku-ni, topetuku'-ku mpu'u-mokoi.

Roma 15:28

Jadi', hilou-ama ncala' hi Yerusalem mpotonu-raka doi petulungi to terumpu-mi toi. Oti toe-di lako' hilou-ada hi tana' Spanyol ntara hi ngata-ni.

Roma 6:22

Tapi' tempo tohe'i-e, tebahaka-mokoi ngkai kuasa jeko' pai' napobatua Alata'ala-mokoi. Tohe'i mpokeni rasi' mpu'u hi koi', apa' tuwu' moroli'-koi pai' ka'omea-na mporata-mokoi katuwua' to lompe' duu' kahae–hae-na.

1 Korintus 10:31

Aga aku' mpo'uli': ane ngkoni' ba nginu-ta, ba napa–napa to tababehi, babehi-mi-hana bona Alata'ala rapomobohe.

2 Korintus 9:10

Alata'ala mpowai' hawua' hi topohawu', pai' nawai'-ta wua' polia'-ta jadi' pongkoni'-ta. Hewa toe wo'o mpai' Alata'ala mpogane' pewai' to niwai'-raka doo, bona kalompe' nono-ni toe mowua' wori'.

Efesus 1:12

Toe pai' masipato' lia Alata'ala ra'une' pai' rapomobohe sabana kabohe ahi'-na hi kai' to Yahudi, apa' kai'-mi to ri'ulu mposarumaka Kristus.

Efesus 1:14

Alata'ala mpowai'-ta Inoha' Tomoroli' bona mporohoi janci-na hi kita', bona monoto hi kita' kanawai'-ta wo'o mpai' hawe'ea to najanci-taka. Nawai'-ta hawe'ea to najanci-taka toe hi eo mpeno-na. Nto'u toe mpai', nabahaka-ta ngkai dunia' to dada'a toi, pai'-ta na'ongko' hilou hi suruga, apa' lawi' kita' bagia-na. Toe pai' masipato' lia ta'une' pai' tapomobohe-i Alata'ala.

Efesus 2:10

Uma ria haduaa to ma'ala mpo'uli' hewa toe, apa' katuwua' to bo'u to tarata-mi toi-e, tarata ngkai Alata'ala-hana. Napajadi'-tamo manusia' to bo'u to mosidai' hante Kristus Yesus, bona mpobabehi-ta po'ingku to lompe', hewa to napakatantu ami'-mitaka.

Efesus 5:9

Petonoi napa kehi to masipato' hi poncilo Pue'. Apa' ngkai kamobaja nono-ni toe mehupa' hawe'ea kehi to lompe', to monoa' pai' to monoto.

Filipi 4:17

Pai' ku'uli' toe, uma kadoko'-ku mporata pewai'-wadi. Konoa-ku mpu'u, bona ngkai kalompe' nono-ni toe-e, katedoo-donihia pegane' Alata'ala hi koi' ompi'.

Kolose 1:10

bona po'ingku-ni masipato' hi tauna to mpotuku' Pue', pai' hawe'ea kehi-ni mpakagoe' nono-na. Mosampaya-kai, bona nipobago butu nyala pobago to lompe', pai' bona katedoo–donihia noto-ni mpo'inca Alata'ala.

Kolose 1:6

pai' tetolele-mi hi humalili' dunia', alaa-na kawoo–woria'-mi tauna to mepangala' hi Pue' Yesus duu'-na mpobabehi-ramo po'ingku to lompe'. Wae wo'o to jadi' hi koi'-e ompi'. Kampo'epe-ni Kareba Lompe' toe, mepangala'-mokoi hi Pue' Yesus, duu'-na ni'inca mpu'u-mi kabula rala-na Alata'ala.

2 Tesalonika 1:12

Pai'-kai mosampaya hewa toe, bona ngkai kehi-ni to lompe' hanga' Yesus Pue'-ta rapomobohe, pai' bona koi' wo'o mpai' napomobohe Pue' Yesus. Hawe'ea toe bate madupa' sabana kabula rala-na Alata'ala Tuama-ta pai' sabana Pue' Yesus Kristus.

Titus 3:14

Ompi'–ompi' hampepangalaa'-ta kana tida oa' mpobago bago to lompe', bona mporata-ra kaparaluua eo–eo-na, nee–neo' mpai' uma ria kalaua tuwu'-ra.

Ibrani 12:11

Bula-ta raparesai' ba raweba', uma-ta goe', peda' ta'epe. Ngkabokoa'-na, ane monoto-ta-damo sabana paresa' toe, lompe'-mi katuwu'-ta, pai' monoa'-mi po'ingku-ta.

1 Petrus 2:12

Pontu-na ria tauna to uma mpo'incai Pue' to mpobalihi-koi, ra'uli' dada'a gau'-ni. Toe pai' kana nipelompehi mpu'u po'ingku-ni, bona rahilo kalompe' po'ingku-ni toe. Ka'omea-na mpai', rapangaku'-mi kalompe' po'ingku-ni, pai' mpo'une' Alata'ala-ramo hi eo karata-na.

1 Petrus 2:5

bona napajadi'-koi hewa watu–watu to tuwu' to rapake' mpowangu tomi pepuea' hi Alata'ala. Napajadi' wo'o-koi imam–imam to moroli'. Apa' hewa imam mpotonu pepue' hi Alata'ala, wae wo'o koi' mpotonu nono-ni hi Alata'ala, niponcawa pepue'-ni hi Hi'a. Pai' pepue'-ni toe bate mpakagoe' nono-na, sabana petauntongoi'-na Yesus Kristus.

1 Petrus 2:9

Aga koi' ompi'–ompi', napelihi-moko-koina Alata'ala, napajadi'-koi imam–imam to mpokamu bago mpepue' hi Magau'-ta. Napatani'-koi jadi' bagia-na pai' ntodea-na to moroli'. Nababehi toe bona koi' mpopalele hi hawe'ea tauna babehia-na to mobaraka', nitutura-raka kanakio'-ni malai ngkai kabengia-na mesua' hi rala kabajaa-na to uma mowo kalompe'-na.

1 Petrus 4:14

Marasi'-dakoi ompi' ane raruge'-koi sabana mpotuku'-koi Kristus, apa' toe mpobatuai kahompo-na Noto to mobaraka' hi koi', toe-mi Inoha' to ngkai Alata'ala.