JOHAN 21:15 - SHEEYU BAIBEL (BSI)

¹⁵ Puletao nou toulou cheyu thaisü Jisu nou Simon Pitar hi noue, “Johan nahpoutu Simon, haitao jünou nenou Eye leshi kouhimoe?” Puhnou chila peie, “Ovai Mapao, Enou neye leshie touyu sü nenou süwe.” Jisu nou puh hi paoe, “Azhaotaoye vaipei khaio.”

JOHAN 21:15 Iomraidhean Croise

SHURAI 33:13

Jakob nou puh hi chila peie, “Ajüraina, nenou süwe süolouzü nahmai hai khouko hae, ae kikhaorütao donou E tsüchomo louhoe. Haitao hai teithe likhia tha-a hutapei louzü teitei nou thaikhai bailai.

2 SAMUEL 7:20

Avei Ramai, avei Mapaowo, E ne hi daichi paopulai! Ne lah nevei kilai ye süwe.

2 VEMAITO 20:3

“Oh Mapaowo, Enou chilee cheche-a nevei kuvah hai avei hrümamai veishi nou peia soupeiyu khesü licho peio, ae nenou jüpayu vah khesü soupeire donou Enou teisa nou te-a soua buyu khesü süpeio.” Sübüa puhnou veachi paowua puh hai levea shopoa nou krare.

ISAIAH 40:11

Puhnou puhvei maitaoye sü zhaotu khoyu mainou zhaotuye kiko peiyu büa kiko peilai, ae zhaotu sü puh bah nou pove jüpeilai, alia zhaotu ke khesü zhutou poa sa-a tapeilai.

JEREMIAH 23:4

Puletaoye khopeire mai sü Enou dopeilai. Avei maitao sü ngaopi pulai moe, ae Enou puletaoye sü tudee peipulai more. Haisü Mapao Enou paowe.”

JEREMIAH 3:15

Enou neletaoye achi züyu zhaokho maiye seive peilai. Puletao nou neletaoye sü ratsü ae sükulou süyu hinou khopeilai.

EZEKIEL 34:23

Enou avei kilai David veo büyu vemai ali hai puletao hi peilai ae puhnou puletaoye sü kaozü hinou kiko peilai.

EZEKIEL 46:24

Mai nanou ahi paoe, “Maikhe mainou pove sheela peiyu khesü rathoki hi kilai maitao nou hai hinou hakho toulai.”

MATHIU 10:37

“Ajünou puhpuo moa puhpfüye leshi kouyu maitali sü Arozümai souzü moe; alia Ajünou puh nahpoutu moa puh nah naotupai ye leshi kouyu puhsü Arozümai souzü moe.

MATHIU 16:17

Alia Jisu nou puh hi chila peie, “Johan nahpoutu Simon, newo rako veishoe! Daiolouzü haihai ke-zhenou nehi pongao peimoe, ana haisü rakibu Apuonou nehi peibaie.

MATHIU 18:10

“Neletao nou taikayu haitao aliye ngaophou moyu soumore donou zhutoulouo; daiolouzü Enou neletao hi paowe süolouzü rakinou puletao vei rakivamai taonou rakibu Apuo zhusü teisanou zhua bue.

MATHIU 26:33

Pitar nou chila peia puh hi paoe, “Puletao hrülainou ne vanou kaotayuma, Ewo hakia kaotakhai laimoe.”

MATHIU 26:35

Pitar nou puh hi paoe, “Ewo neye koa thai vuzü laiyu koutea Enou neye hakia motoulai moe!” Alia kukhe rozümai hrülai taoa sübüa paoe.

MARK 14:29

Pitar nou chila peie, “Kukhemai hrülainou neye thaotayuma, Ewo neye hakia thaokhai laimoe!”

LUK NOU RÜYU KO AVEIBVÜ 12:32

“Piwuso, zhaokho atainare, daiolouzü neletao hi Vedei süna peiresü neletao Puovei züpayu nasüe.

LUK NOU RÜYU KO AVEIBVÜ 22:32

ana nevei lüsü panou hata more donou Enou neye donou veachi paopeire. Alia nenou Ahi khaive puyu kisü, ne thaihou-jürai taoye soutsü peikhaio.”

JOHAN 1:42

Süthaisü puhnou Simon ye Jisu hi save. Jisu nou puhye zhuloua paoe, “Newo Johan nahpoutu Simon-e, ana neye Kephas tea kulai.” (Haihai Pitar touyu kheihaoe, süvei konou “Chuh” toue.)

JOHAN 13:37

Pitar nou puh hi paoe, “Mapao, daidonou chu Enou nethai fülou holai? Enou neye donou Ahrirai peilai!”

JOHAN 16:27

daiolouzü Puo lah puhnou neletaoye leshiwe. Puhnou neletaoye leshiwe daiolouzü neletao nou Eye leshiwe ea Esü Apuo hinou ve touyusü neletao nou louche loure.

JOHAN 21:12

Jisu nou puletao hi paoe, “Takou toulouwo.” Rozümaitao hrohinou maitalinoua, “Ne thaohwe?” tea khuveia puh hi noumoe, puletao nou sünasü Mapaobaie touyu süe.

JOHAN 21:7

Jisu nou leshiyu rozümai nanou Pitar hi paoe, “Haina hai Mapao-e!” Simon Pitar nou sünasü Mapao-e touyu choulouyu kisü, puhnou puh sahnü nouthouloure (daiolouzü vah souyu donou puhsü baitoua bue) alia zaihi choloure.

JOHAN 8:42

Jisu nou puletao hi paoe, “Ramai hai neletao Puo toulouzü, neletao nou Eye leshiwulai, daiolouzü Ehai Ramai hinou ve ea chuo Esü buh haihinou bure. Enou Amadonou velou moe, ana puhnou Eye seivepeie.

SEI-ATAMAI VAHTAO 20:28

Südonou lah neletao-a leikeilo ea Rako Mashinou neletaoye panou pei-akhomai soupeire donou neletao bah hi thoupeikhai touyu zhaokho me teiteiye zhutoulo. Ramai nou lah puh Nahpoutu zhe vanou hrülouyu puhvei lüloumaime pei-akhomai souloukhaio.

SEI-ATAMAI VAHTAO 20:29

Enou tayu thaisü khushoyu nüsei nou neletao hrohi velouloua zhaokhome hi zhao khemaiye sü leshia phapeiyu bulaimoe touyu Enou süwe.

ROMMAI 14:1

Lü hinou lülouhoa buyu puhye sü neletao nou sasa-a popeio, ana lah puhvei li-choyu vanou neletao nou veivawuso.

ROMMAI 15:1

Lü hinou khoua buyu Eletao nou lah Eletao züpa soumoa lülou hoyu puletao vei kou pfükhayu kaoe.

1 KORINTHMAI 8:11

Alia sübüa nevei tsü sünanou Khrista nou puhye donou thaipeiyu lelou hoyu ne thaihou jürai hainaye sü souhare.

GALATIAMAI 5:6

Daiolouzü Eletao nou Khrista Jisu ye koa ali soua bubu kisü hee rodeyu moa hee rodemoyu sünanou halia soukuyu hae; soukuyu süwo louzü leshi vanou vahsoua buyu lü sünasüe.

EPHESAMAI 4:14

Südonou Eletaowo lah puletao nou chopa louyu do sünanou kukhe maiye sümah sümo peiyu madayu maitao vei doupeiyu teikhai teiteinou hükou-hükhe-a pfüa laiyu nahmaitao büwu laimoe.

EPHESAMAI 6:24

Eletao Mapao Jisu Khristaye thaihoyu hayu lesha nanou leshia buyu maikhemai hrülai hisü Ramai zhuvea nou koa bupeiyu sü souloutheo.

EBRIAMAI 13:20

Puhvei posheelayu athai süna vanou teisa vei vo sünaye paoshee souyu, zhaotao vei Zhaokho-apeio Aduna, Eletao Mapao Jisu ye sü Ramai nou athai hinou souhrishu peire.

EBRIAMAI 4:13

Alia soukhai touyu na talia Ramai nghojünou kukhai loure hae, ana ha teiteisü dukhya-a puh nghi-ngaobuh hinou haphapa khaikhaitoue. Alia puh hisü lah Eletao hrülainou soukhai touyu soupfücho sü peivuzülai.

1 PITAR 1:8

Puhye ngaolou mokhai-a neletao nou puhye leshiwe, alia chu neletao nou puhye ngaomokhai-a neletao nou puhye louchewe ea paoshalou hoa savawe,

1 PITAR 2:2

Nah-pumaitou kua neletao-a dushu paloua khailu loure donou teisanou rako vei naodzü sü züpalo;

1 PITAR 2:25

Daiolouzü neletaosü motayu zhaotao kheihao baie, anou chuwo zhaokhowo ea neletao rako khopeiyu puh thaisü panou füloure donou neletaoye podakhai vere.

1 JOHAN 4:19

Eletao nou leshiwe daiolouzü puhnou Eletaoye rai-a leshipeie.

1 JOHAN 5:1

Jisu hai Khristae tea loucheyu mai hrülaisü Ramai nah-e, alia puoye leshiyu maitalinou puh nahye-a leshiwe.

PONGAOPEIYU 2:23

Enou puh nahmai taoye sü southealai, alia sükisü lüloumaime hrülainou Esü maikhemai hrülai tsüle süyu mai nasüe touyu sü sülai, alia Enou neletao mai aliliye lah lahnou soukhai touyu vah thaifüa ngaozü nasü peilai.