Matthew 4:23 - Patamuna New Testament Revised

²³ Jesus utàppù màlà tamù'nawàlà Galilee yawàlà, kappon yamùk yenupa pe tok wepilittok itak tau, Wakù Itekale itepulu pe we'nàtok yekale yekama pe, molopai yà'là yekkwa ton nà itepalan ton molopai ite'netù kappon yamùk ipittà pe.

Matthew 4:23 Iomraidhean Croise

Matthew 11:5

“Enpùn pata yenyan. Tùusasen pen nùsayan. Welei pokon kon uchipittàsak man. Panattàppan netayan. Molopai iwelichak kon wuluukasak man. Molopai Wakù Itekale yekama man entuppa'nokon pàk.

Matthew 12:9

Jesus uya màlà pata nàmàppù molopai iitàppù tok wepilittok itak tak.

Matthew 13:19

Mùkyamlo itepulu pe we'nàtok yekale yetannan, tùse ittunnan pen wechi màlà tùpànsen kùyali yenappà iwessolokasak lùppù asantak kasa. Ene Makui tùuyàssen molopai ipànsak lùppù tok yewan yau mokkanài.

Matthew 13:54

Molopai iwennappoppù màlà tùpata yak. Molo kappon yamùk yenupappù ya tok wepilittok itak tau, molopai mùkyamlo iichelupa yetannannùssan usenumenkasak wechippù màlà. “I'nailà pai ken uchi tùpukketù yepoloppù ya? Molopai yà'là yekkwa ken uchi màlà inkupù tùwekkussen yek ton pen?” tukaik tok usekamappoppù tùyiwalà'nokon.

Matthew 14:14

Jesus wepalùkappù màlà kanau yapai, tukkan kon kappon yamùk yensak tùuya yau ichentuppappù tok pàk, molopai tok ye'netù ipittàppù ya.

Matthew 24:14

Molopai sàlà Wakù Itekale itepulu pe we'nàtok yekale yekama màlà tamù'nawàlà wolù yawàlà pata yamùk yawolon kon pàk, molopai nen uchi iwenukatok uyàpù màlà,” teppù Jesus uya.

Matthew 3:2

“Amakuyi kon winàpai elattàtàk kon masapùla itepulu pe we'nàtok epùn po mei pùla man!” tukaik.

Matthew 9:35

Màlà yattai Jesus utàppù màlà tamù'nawàlà eke pata molopai echikili ton pata yamùk kaklanpa pe. Kappon yamùk yenupappù ya tok wepilittok itak tau, Wakù Itekale itepulu pe we'nàtok yekale yekamappù ya tok pàk, molopai kappon yamùk ipittàppù ya, yà'là yekkwa là palan molopai tok ye'netù yapai.

Mark 1:14

John yachi patikichi tak tùpo, Jesus utàppù màlà Galilee pona. Wakù Itekale yekamappù ya Katù winàpaino.

Mark 1:21

Jesus molopai ya'lon kon uyàpùppù Capernaum pona. Wàlàka'nà weyu yattai synagogue tak iwewomùppù, molo tok yenupappù ya.

Mark 1:39

Màlàyau Wakù Itekale yekama pàk iwechippù molo synagogues tau'ne Galilee yawàlà. Molopai àli akkwalù yamùk yempakkapàtùppù ya.

Mark 3:10

Tukkan kon kappon yamùk ipittàppù ya màlà yatai. Màlàpàk tok uselemlukuppù ipyak anappàppai tùwechi kon pàk.

Mark 6:2

Wàlàkka'nà weyu yattai, Jesus uya tok yenupappù synagogue tau. Tukke kappon yamùk wechippù màlà molo. Molopai yetasak tùuya'nokon yau tok usenumenkappù kulu màlà. “I'nai motau là ken uchi tamù'nawolon sàlà yamùk yepotai?” teppù tok uya. “Yà'là yekkwa ken uchi sàlà ittutok ke ilepasak nai'nùk? Tensan yekkwa pen nà kuttoppe ya,” teppù tok uya.

Mark 6:6

Ichenumenkappù kulu màlà ailon tetok pùla tok wechi pàk. Tùpata woinokon pata yamùk yawàlà kappon yamùk yenupa pàk Jesus usalàppù.

Luke 10:9

E'nek ton mipittàtàik màlà pata yau. Molopai kappon yamùk pàk, ‘Itepulu pe Katù wettok uyàssak man mei pùla kulu apyakù'nokon,’ mùkatàik.

Luke 13:10

Jew yamùk wàlàkkattok yattai Jesus uya kappon yamùk yenupappù wepili'nàtok itak tau.

Luke 16:16

“ Law molopai Katù Maimu yenpoikannan nùmenukappù lùssan wechippù màlà tapulàsan pe John Enapataukanài wessepolo ponalà. Màlà motapai nen uchi Wakù Itekale Katù wettok itepulu pe yekama man, molopai tamù'nawolon kon nettùyan Katù yemyak tùuseka'nonkaik.

Luke 20:1

Tewin wei yattai Jesus wechi Katù yùwùk tau kappon yamùk yenupa pàk molopai Wakù Itekale yekama pàk tùse paatele yamùk yepulu ton, Law pàk enupannan, molopai tùnamasan kàyik yamùk tawonnan uyàpùppù màlà ipyak,

Luke 4:14

Màlàyau Jesus wennapoppù Galilee pona molopai Wakù Akkwalù meluntàlù wechippù ya'là màlà. Itekale usetappù màlà pata yamùk Galilee yawolon yawàlà.

Luke 5:17

Tewin wei yattai Jesus wechi enupan pàk tùse, Pharisee yamùk molopai Law pàk enupan nan wechippù chichiu pe mei kulu pùla, tamù'nawolon pata Galilee molopai Judea tawon yailà pai iyàssak kon, molopai Jerusalem poi iyàssak kon. Wakù Akkwalù meluntàlù wechippù molo Jesus piyàu e'nek ton ipittà toppe ya.

Luke 6:17

Jesus uttàppù ta'lon kon pokonpe wùk poi, molopai satippe iwechippù nomon po tukkan kon tùwenaimanài nan kùlottau. Ilinà pe kulu kappon yamùk wechippù màlà molo tamùnawàlà Judea pon kon molopai Jerusalem pon kon, molopai palau yena pon Tyre molopai Sidon pon kon.

Luke 6:6

Tùulon Jew yamùk wàlàkkattok weyu yattai Jesus utàppù Jew yamùk wepilittok itak tak molopai kappon yamùk yenupappù ya. Kàyik wechippù molo kamik pen itemyatù ichei'mesak.

Luke 7:21

Màlà yattai làma tukkan kon kappon yamùk ipittàppù Jesus uya màlà tok yepalan yamùk winàpai, molopai àli ton akkwalù winàpai, molopai enpùnon uya yentok ke tok lepappù ya molopai tok uya pata yeneppù.

Luke 7:22

John maimu yekaman nan yeikuppù Jesus uya, “Ennappotàk kon molopai John pàk eneneppù kon molopai enetappù kon yekamatantàk. Enpùn nenyan, tùusasen pen nùsayan, welei pokon kon uchipittàsak man, panattàppan netayan, iwelichak kon wuluukasak ya man, molopai Wakù Itekale yekama man entuppa'nokon pàk.

Luke 8:1

Mala là tachin pe tùpo Jesus utàppù màlà pata yamùk eke ton molopai echikili ton nà pata yawàlà, Wakù Itekale Katù wettok itepulu pe yekale yekama pe. 12 pan kon ya'lon kon utàppù màlà ya'là.

Luke 9:11

Yetasak tùuya'nokon yau tukkan kon kappon yamùk uya iwenaimappù. Tok yanùmùppù ya tùutauchinpaik. Tok yelupappù ya, Katù wettok itepulu pe pàk, molopai mùkyamlo tipittà kon iche tùwessan ipittàppù ya.

Luke 9:60

Jesus uya yeikuppù, “Tàwà iwelichak kon tàkàpù kon wu'nattài. Itàkà molopai Katù wettok itepulu pe yekamata,” tukaik yeikuppù ya.

John 18:20

Jesus uya imaimu yeikuppù, “Uselupasak man ayupo wolù uya yeta tùse. Tàwàlàlà tok yenupappù uya màlà Jew yamùk wepilittok itak tau. Molopai Katù yùwùk tau, tamù'nawàlà Jew yamùk wepilittok yau, molopai uselupasak man amak yai pùla.

John 6:59

Wa teppù ya màlà enupan tùuya yau Jew yamùk wepilittok itak tau Capernaum po.

John 7:1

Sàlà tùpo Jesus utàppù Galilee yawàlà, Judea yawà iitàppù pen masapùla molon kon nà Jew yamùk wechippù imàmuku pàk iwàtoppe tùuya'nokon.

Yeunossak kon Wotokoyi 10:38

Mùttuyatàik Katù uya Wakù Akkwalù molopai meluntà tùlùppù Jesus, Nazareth pon pona. Iitàppù mailàlà wakù kupù pe, Makui meluntàlù yo'non kon ipittà pe, masapùla Katù wechippù ya'là.

Yeunossak kon Wotokoyi 18:4

Jew yamùk molopai Greek yamùk pokonpe tùuseipàtù pàk iwechippù màlà ailon tetok pe tok uya, Wàlàkka'nàtok weyu yattai'ne Jew yamùk wepilittok itak tau.

Yeunossak kon Wotokoyi 20:25

“Utàppù man tamù'nawàlà àkklottawàlà'nokon Katù wettok itepulu pe yekama pe. Molopai tùttuyaik sàlà pe ànù'là uya uyentu'ma pe pùla iwechi.

Yeunossak kon Wotokoyi 28:31

Katù wettok itepulu pe yekamappù ya molopai kappon yamùk yenupappù ya Itepulu Jesus Christ pàk, tùuselupa pàk iwechippù tùusenalippaik pùla molopai iwakkà'nài pùla.

Romans 10:15

Molopai atta ken uchi itekale yekama, itekale yekamannan yeunossak pùla iwechi tùse? Katù Maimu uya, “Wakù kulu màlà Wakù Itekale ne'nàinan pùta!” te màlà. {Isa 52.7}