YAKUB 3:17 - Rengah Jian

¹⁷ Bang kelunan éh pu'un pengejam éh tuai jin seruga pu'un éh mihin kelunan murip ni'ai, pawah, dawai kenin, ngan jian pengané. Irah pu'un pika kelunan ngan kivu kekat arong penganeu' éh jian bé' réh netah ngan ngelayoo' awah maneu' jian.

YAKUB 3:17 Iomraidhean Croise

MATIUS 23:28

Kenat keh ne', hun kelunan na'at keh, pu'un réh seruh keh kelunan éh maneu' pengeloo' Allah, bang lem kenin keh mu'un penoo' neu' kekat éh ngelavo' réh awah ngan kekat arong kesa'at, ha' néh.

MATIUS 5:8

Murung kenin kekat kelunan éh ni'ai kenin, irah omok jam Allah.

MATIUS 5:9

Murung kenin kekat kelunan éh jam ngejian kenin irah éh jah, Allah omok mateng réh anak néh.

LUKAS 21:15

Uban tovoo' réh ngamit keh da', adang Ké' pu'un mena' pengejam Ké' ngan keh ke' néh nolong keh pané, pah avéé' irah éh maneu' keh nah, bé' omok ngelawan ngan bé' omok bet ha' keh kepéh da', ha' Néh.

LUKAS 6:36

Jian ka'ah pika kelunan pekua' Tamen keh éh pu'un pika irah, ha' Néh.

YOHANES 1:14

La'ah Ateng ha' inah paléu kelunan, tuai éh mokoo' belah lu' iteu', ngan améé' pu'un na'at pengaren Néh, pengaren Néh inah pu'un éh kenat uban Néh Anak éh jah awah jin Tamen Néh, ngan ja'au mu'un penika Allah, kenat péh kekat ha' Néh pu'un éh teneng mu'un.

YOHANES 1:47

Hun Yésus na'at Natanael tai tavin Éh, ka' ha' Néh, Inah jah kelunan Yahudi éh pohoo' Yahudi mu'un, bé' éh pu'un lavo' tong ineu'-ineu' péh, ha' Néh.

PENGANEU' LAWAH 11:24

La'ah Barnabas nah, kelunan éh jian, éh penoo' neu' Sahéé' Ni'ai ngan éh sukup kenin lem pengelan néh. La'ah pinaa' kepéh kelunan éh ngelan tong Tuhan.

PENGANEU' LAWAH 9:36

Tong leboo' Yopé, leboo' éh ja'au déhéé' baa' banget, pu'un jah redo éh ngelan tong Tuhan, ngaran néh Tabita. Ngaran néh dalem ha' Yunani Dorkas, sin néh Payau. Kekat penganeu' redo inah jian éh, ngelayau éh nolong kelunan kari.

SURAT PAULUS NGAN SIDANG RUM 12:18

Jian keh pekalai mu'un murip ngan pawah kenin belah kekat kelunan béé.

SURAT PAULUS NGAN SIDANG RUM 12:9

Jian keh pika kelunan mu'un, mai keh ngelayoo' awah pika réh. Jian keh leko tong kekat éh sa'at, ngan megem kekat éh jian awah.

SURAT PAULUS NGAN SIDANG RUM 15:14

O kekat padéé' ké', kejam ké' ka'ah pu'un pika ngan jam seruh maneu' pekua' barei' éh benara' ké' iteu', ngan kejam ké' ka'ah jam petebaraa' belah ka'ah ke'.

1 KORINTUS 12:8

Pu'un Sahéé' mena' penesen ngan jah kelunan, dokoo' kelunan inah omok bara' ha' Tuhan ngan kelunan éh jah kepéh. Tong kelunan éh jah kepéh, Iah mena' pengejam ngan néh, ke' néh omok jam tong ha' tebaraa' inah.

2 KORINTUS 10:1

Akeu' Paulus menyat pika ngan ka'ah, akeu' éh benara' kelunan pu'un diva' kenin hun ké'pemung ngan ka'ah bang éh makang kenin ngan mahéng kenin hun ké' juu'. Akeu' menyat keh neu' kekat penika ngan pengejian Kristus,

2 KORINTUS 6:6

Bang dalem kekat inah pu'un mé' pekelenaa' mé' adang améé' kelunan éh sohoo' Tuhan. Améé' pekelenaa' éh kenat neu' kekat barék mé' pu'un jian, ngan dawai kenin jam seruh, ngan kebit kenin ngan neu' mé' nolong kelunan éh jah, neu' kekat pengena' Sahéé' Ni'ai ngan mé' ngan neu' mé' pika réh mu'un.

2 KORINTUS 7:11

Tuhan pakai kekat kebesau keh inah ngepaléu éh jian, uban neu' kebesau keh inah, inah éh mihin keh jam seruh ngan maneu' keh mekat mu'un pekelenaa' kekat penganeu' keh rai bé' éh sala'. Jelua' ka'ah kelatan kenin menéng ha' ké', ngan jelua' kepéh merek ngan medai, ngan maneu' keh tawai kenin juk alaa' akeu' kepéh, ngan pu'un éh pebetéé' pengelan keh kepéh juk ngukum kelunan éh sala'. Dalem kekat penusah rai pu'un keh pepoléng ka'ah bé' pu'un sala'.

2 KORINTUS 9:10

La'ah Allah éh mena' parai ngan kelunan ke' néh omok mulah éh, kenat péh Éh mena' éh sukup kinan réh kepéh, omok Iah mena' parai éh sukup ngan keh ngan omok Éh maneu' parai inah nyekaa', dokoo' ja'au ajau néh kepéh jin éh pengena' keh.

ÉPESUS 5:9

Uban kelunan éh pu'un tong rema, pinaa' buaa' néh, inah éh kekat éh jian ngan teneng ngan tigéh.

PILIPI 1:11

Akeu' keloo' kekat urip ngan barék keh pu'un jian neu' penyukat Yésus Kristus lem kenin keh, dokoo' keh omok peparen ngan mejing Allah.

PILIPI 4:8

O kekat padéé' ké', tong pengega' ha' ké', jian keh ngelayau seruh tong kekat-kekat éh teneng ngan éh tekep kenajung kelunan, inah éh, tong kekat éh teneng ngan jian, éh tekep naneu' kelunan. Jian keh seruh tong kekat éh ni'ai, tong kekat éh mihin keh jam pika, ngan éh omok kenajung lu'.

KOLOSÉ 1:10

Boh keh omok murip barei' Tuhan keloo' keh murip, ngan ngelayau ngepayoo' kenin Néh. Pinaa' buaa' keh kepéh éh neu' kuraa'-kuraa' kereja' keh éh jian, ngan pu'un keh pepit dalem pengejam keh tong Allah.

1 TESALONIKA 2:7

Na' péh améé' omok nyohoo' keh maneu' iteu' ngan maneu' inah uban améé' éh lawah Kristus, bé' améé' nyohoo' keh kenat. Bang kelebéé' améé' mokoo' ngan ka'ah rai, dawai kenin mé', améé' barei' jah tinen éh ngaboo' anak néh.

1 TIMOTIUS 5:21

La'ah tong jumen Allah ngan Kristus Yésus ngan kekat meliket néh éh ni'ai, akeu' nyohoo' ke' kivu kekat sohoo' ké' inah, ngan mai ke' ngevéléé'-véléé' ngan netah kenin tong kelunan.

2 TIMOTIUS 2:24

Kelunan éh sohoo' Tuhan bé' tekep éh paneu', bang jian iah pika ngan nolong kekat kelunan, nebaraa' ngan petena' réh jian-jian ngan kebit kenin.

TITUS 1:15

Tulat kelunan éh ni'ai, kekat néh pu'un ni'ai. Bang tulat kelunan éh penyeruh réh pu'un sa'at neu' penyala' ngan éh bé' ngelan tong ineu' éh teneng, bé' pu'un jah péh éh ni'ai, uban penyeruh ngan ketem lo'ong kenin réh lepah sa'at.

TITUS 3:2

Mai réh pané ngesa'at ngaran kelunan, jian réh murip ngan pawah ngan maneu' éh jian. Jian réh jian pengané, dawai kenin ngan kekat kelunan béé.

IBRANI 12:11

Kelebéé' Tuhan memerah lu', tusah kenin lu' bé' lu' murung, bang la'o inah kepéh hun lu' mihau ha' tebaraa' Néh, pu'un lu' murip kivu pengeloo' Tuhan ngan alaa' pengepawah Néh.

IBRANI 12:14

Mekat keh pitah jalan dokoo' keh omok murip ngan pawah kenin belah kekat kelunan. Kenat péh jian keh mekat pitah dokoo' kekat barék keh pu'un ni'ai, uban bé' pu'un séé'-séé' péh éh omok na'at Tuhan hun néh bé' pu'un ni'ai.

YAKUB 1:17

Kekat ineu'-ineu' éh jian ngan éh sukup mu'un inah éh tuai jin seruga jin Allah éh suai kekat éh rema tong Langit. Iah Allah éh bé' pu'un paléu, ngan bé' pu'un ngelihep ineu'-ineu' péh.

YAKUB 1:5

Hun pu'un séé'-séé' jin belah ka'ah éh bé' pu'un pengejam, jian iah sebayang ngan Allah dokoo' Allah mena' pengejam seruh ngan néh; uban Allah mena' éh ngan lumang kenin ngan murung kenin ngan siget kelunan.

YAKUB 2:13

Uban tovoo' Allah pu'un petuneng kelunan, bé' éh omok pika kelunan éh bé' pika irah éh jah. Bang kelunan éh pika irah éh jah, bé' éh kenukum Allah.

YAKUB 2:4

Hun keh maneu' kenat, ka'ah netah kenin belah keh ngan ka'ah ngevéléé' tong kelunan kivu penyeruh keh éh sa'at.

YAKUB 3:15

Pengejam éh kenat bé' éh tuai jin seruga, bang jin tana' awah jin barék kelunan éh penyala' ngan jin sahéé' éh sa'at!

YAKUB 4:8

Jian keh tuai tepih déhéé' Allah, boh Iah tepih déhéé' ko' kepéh. Ngeni'ai kekat urip keh kekat kelunan éh penyala'. Mohéé' kenin keh, kekat kelunan éh ngelayoo' kivu Tuhan.

1 PÉTERUS 1:22

Uban ka'ah kivu ha' tebaraa' éh teneng jin Allah, ka'ah pu'un ni'ai ngan ka'ah murung padéé' keh dalem Tuhan ngan semu'un kenin. Uban kenat jian keh kua' pepika ngan kekat kenin keh.

1 PÉTERUS 2:1

Uban kenat, Jian ka'ah bet kekat arong pengesa'at jin usah keh. Mai keh pané' kenyo la'ah, mai keh ngelayoo' maneu' jian, mai keh sakit kenin ngan kelunan ngan mai keh ngesa'at ngaran réh.

1 PÉTERUS 2:18

Jian kekat kelunan sohoo' petem kivu sohoo' pengeja'au néh ngan ngerera' tong réh, bé' makat ngan kelunan éh jian ngan éh pika keh awah, bang ngan irah éh mahéng kenin ngan éh bé' jam pika péh.

1 YOHANES 3:18

O kekat anak ké', mai lu' bara' lu' pika palaa' ha' ujun lu' awah, bang jian lu' kua' pepika palaa' penika éh mu'un éh pepoléng lu' jin penganeu' lu'.

1 YOHANES 3:3

Siget-siget usah éh ngelan tong Kristus tekep iah mavaa' kenin néh ke' néh ni'ai, pekua' Kristus pu'un ni'ai.