YAKUB 1:12 - Rengah Jian

¹² Jian kenin kelunan éh omok ngeretep, na' péh penusah éh pinaa' arong teneng tong néh. Uban hun néh omok nyopéé' penusah inah, boh iah omok alaa' urip éh lepah pejajii' Allah ngan kekat kelunan éh pika Iah.

YAKUB 1:12 Iomraidhean Croise

MATIUS 10:22

La'ah adang ka'ah keleko kekat kelunan pinaa' uban pengelan keh tong Akeu', bang séé' éh ngeretep pah avéé' ga' néh iah omok alaa' urip.

MATIUS 25:34

La'ah Raja' juk pané ngan irah éh saa' na'au' néh, ka' ha' néh da', Ka'ah éh pu'un alaa' urip pelinguh jin Tamen Ké', tuai keh. Tuai ka'ah éh kevéléé' Tamen Ké' dokoo' keh alaa' pengejian néh. Tuai keh, hun iteu' Iah juk maneu' keh pengeja'au tong kuraa' tana' éh petenup néh ngan keh jin bu'un néh suai tana' iteu' sahau.

LUKAS 6:22

Murung kenin keh hun kelunan ngeleko keh, musat keh, peja' ngan ngesa'at ngaran keh uban neu' Anak Kelunan.

SURAT PAULUS NGAN SIDANG RUM 5:4

ngan hun lu' ngeretep ngan kebit kenin kenat, inah mihin lu' reken kenin ngan sukup mu'un kenin, ngan hun néh pu'un kenat petem kenin lu' ngelan adang uleu' omok tai pemung ngan Allah.

SURAT PAULUS NGAN SIDANG RUM 8:28

Uban uleu' jam Allah ngepaléu kekat ineu'-ineu' kivu pengeloo' Néh ke' néh jian, dokoo' Néh pesavéé' pengejian ngan kekat kelunan éh pika Iah.

1 KORINTUS 2:9

Inah éh sin tong ha' lem surat Allah éh bara' ka', Éh bé' ta'an ngan éh bé' nenéng kelunan, ngan éh seneruh réh bé' omok pu'un, inah éh petenup Allah ngan kelunan éh pika Iah, ha' néh.

1 KORINTUS 8:3

Bang kelunan éh pika Allah, kelunan inah éh kejam Allah.

1 KORINTUS 9:25

La'ah siget-siget kelunan éh juk pekelawan, adang iah mihau usah néh dalem kekat éh naneu' néh, iah maneu' kenat uban néh juk menang ngan alaa' jah tapong, tapong éh omok melayeu' awah. Bang uleu' kepéh mihau kenin lu' dokoo' lu' omok alaa' jah tapong éh bé' omok melayeu' kepéh.

2 TIMOTIUS 2:15

Jian ke' mekat pitah jalan éh dokoo' Tuhan omok bara' ke' pu'un jian, barei' kelunan éh bé' menyaa' tong kekat penganeu' néh. Jian ke' bara' ha' tebaraa' éh teneng jin Allah ngan teneng mu'un.

2 TIMOTIUS 4:8

Hun iteu', tapong pengeteneng nodoo' Tuhan ngan ké', Tong pengega' dau, Tuhan éh teneng mu'un petuneng juk mena' éh ngan ké', uban akeu' lepah murip kivu pengeloo' Néh. Bé' éh nena' Néh ngan ké' awah, bang Iah mena' éh ngan kekat kelunan éh mena savéé' Néh ngan murung kenin.

IBRANI 10:32

Jian keh nesen tong urip keh éh bu'un jin la'o keh ngelan tong Kristus, na' péh keh pinaa' koléé' teneng pengeketa, bang bé' ka'ah bet Tuhan.

IBRANI 11:17

Neu' pengelan, Abraham sedia' mematai anak néh Ishak barei' jah pengena' ngan Allah, inah éh tovoo' Allah nesek kenin néh. Pu'un Allah mena' jajii' Néh ngan Abraham bang Abraham iah makang kivu sohoo' Allah dokoo' mematai anak néh éh jah de ke' inah.

IBRANI 12:5

Mai kelepan ha' Allah pané ngan keh éh anak Néh dokoo' Néh ngereken kenin keh. Ka' ha' Néh, O anak ké', mai ke' bet ha' Tuhan hun Néh memerah ke'. Mai ke' juk béé kenin hun Néh ngukum keh.

IBRANI 6:15

Abraham kebit kenin. Uban kenat Iah alaa' ineu' éh lepah pejajii' Allah ngan néh.

YAKUB 2:5

Nesen keh, padéé'-padéé' éh kemurung ké'! Allah lepah ngevéléé' kelunan éh kari tong tana' iteu' dokoo' réh omok kaya' dalem pengelan. Irah juk tai lem Pengihau Allah barei' éh lepah pejajii' Néh ngan irah éh pika Iah.

YAKUB 5:11

Uleu' omok mateng irah kelunan éh murung kenin, uban réh omok ngeretep kenat. Ka'ah lepah menéng ha' tosok tong pengekebit kenin Ayub uleu' jam la'o kekat anak ngan olong néh matai, Tuhan mena' anak ngan olong ngan néh kepéh uban jalan pengasi ngan penika Tuhan ngan néh.

1 PÉTERUS 3:14

Na' péh réh peketa keh uban keh maneu' jian, jian keh murung kenin, mai keh medai ngan mapah kenin.

1 PÉTERUS 4:13

Bang jian ka'ah murung kenin uban keh pu'un pemung ngan Kristus dalem pengeketa Néh. Uban barei' ka'ah pu'un pemung ngan Néh dalem pengeketa Néh hun iteu', kenat péh ka'ah omok murung hun Néh tuai lem kekat pengaren kepéh.

1 PÉTERUS 4:14

Murung kenin ka'ah hun réh pekenyaa' keh uban keh kivu Kristus, uban hun néh pu'un kenat, inah pepoléng Sahéé' éh maren, inah éh Sahéé' Ni'ai pu'un dalem keh.

1 PÉTERUS 5:10

Bang La'o keh teneng pengeketa éh metok awah, Allah tengéé' juk maneu' ka'ah sukup mu'un. Iah juk petekedéng keh, ngegahang keh ngan ngereken keh, uban Iah Allah éh matek jian kenin ngan éh lepah tebai ka'ah dokoo' masek lem kemaren Néh éh pelinguh, uban ka'ah murip pemung ngan Kristus.

1 PÉTERUS 5:4

Hun Kristus Gembala éh pengeja'au kekat Gembala inah pu'un tuai kepéh, vam, ka'ah juk alaa' tapong éh maren ngan pelinguh.

1 YOHANES 4:19

Uleu' pu'un pika kelunan uban Allah éh bu'un-bu'un pika uleu'.

ÉH POLÉNG 2:10

Mai ke' medai tong pengeketa éh bé' lebéé' la'ah juk teneng tong ke'. Nesen ke'! Adang Sitan juk tupat ke'. Adang iah ngamit ngan masek kuraa'-kuraa' usah jin belah keh lem lamin tutup. Adang keh teneng pengeketa kelebbéé' jah poloo' dau. Jian keh tigéh tong Akeu' pah avéé' matai, ngan adang akeu' mena' urip pelinguh ngan keh uban keh lepah menang.

ÉH POLÉNG 3:19

Kekat kelunan éh kemurung Ké' Akeu' petena' réh ngan memerah réh. Uban néh kenat jian keh mekat pitah jalan keh omok pekoléé' kenin jin kekat penyala' keh.

ÉH POLÉNG 3:21

Ngan irah éh nyopéé' kekat arong kesa'at, Akeu' kejeraa' réh menyun déhéé' Ké' tong nyun jalan Ké' Raja', barei' Akeu' lepah menang ngan menyun déhéé' Tamen Ké' tong jalan Néh Raja', ha' Néh.