SURAT PAULUS NGAN SIDANG RUM 12:3 - Rengah Jian

³ Uban neu' pengena' Allah éh lepah nena' Néh ngan ké', inah akeu' bara' ngan ka'ah, mai keh bau kenin ngan ulak juk maneu' ineu'-ineu' hun Allah bé' mena' éh ngan keh. Kenat péh mai keh seruh ka'ah kelunan éh ulak sa'at awah, ngan Tuhan bé' keloo' pakai keh, bang jian siget usah keh petuneng tong kenin keh tengéé', pekua' jalan keh ngelan keh omok pakai pengena' Allah ngan keh.

SURAT PAULUS NGAN SIDANG RUM 12:3 Iomraidhean Croise

LUKAS 18:11

Kelunan éh kivu adet Parisi nekedéng tengéé' ngan sebayang, ka' ha' néh, Akeu' bara' jian kenin ngan Ko' Tuhan, uban akeu' iteu' kelunan éh jian, bé' ku' kuman nyahan, bé' ku' ngebuyuk kelunan, bé' ku' nuyang pekua' kelunan éh pinaa' nah. Kenat péh akeu' bara' jian kenin ngan Ko', uban bé' ku' barei' kelunan éh alaa' sukai inah.

YOHANES 3:34

Kelunan éh tuai sohoo' Allah pu'un éh bara' kekat ha' Allah, uban Allah pepenoo' kenin néh neu' Sahéé' Ni'ai.

SURAT PAULUS NGAN SIDANG RUM 1:5

Jin Kristus, Allah lepah mena' penika Néh ngan ké' iah tebai akeu' lawah Néh dokoo' mihin siget arong kelunan ngelan tong Iah ngan kivu Éh kepéh.

SURAT PAULUS NGAN SIDANG RUM 11:20

Teneng éh kenat. Pu'un éh nega' Néh kenat uban réh bé' ngelan, ngan ka'ah pu'un petem dalem néh uban keh pu'un ngelan. Jian keh diva' kenin ngan medai.

SURAT PAULUS NGAN SIDANG RUM 11:25

O kekat padéé' ké', akeu' keloo' ka'ah jam tong éh ma'an mu'un éh bé' omok kejam kelunan lepah rai, bang hun iteu' Tuhan pepoléng éh. Bé' ka'ah omok jam éh neu' pengejam keh tengéé', Allah awah éh omok pepoléng éh ngan keh. Tong éh bé' kejam kelunan lepah rai, inah éh tong éh kemahéng kenin irah Yahudi, bé' réh mahéng kenin kenat avéé' pelinguh, pu'un éh kenat pah avéé' kekat irah éh tengéé' pohoo' pu'un tavin Allah.

SURAT PAULUS NGAN SIDANG RUM 12:16

Jian ka'ah pekua' kenin ngan kekat kelunan béé. Mai keh bau kenin, bang maneu' kekat kereja' keh ngan diva' kenin. Mai keh ngajung usah keh uban keh seruh ka'ah kelunan éh jam seruh.

1 KORINTUS 15:10

Bang neu' penika Allah awah akeu' ngelan tong Iah hun iteu', tong penika Néh ngan ké', bé' akeu' bet éh awah, bang akeu' kereja' mutau mu'un pelapah muruh jin kekat lawah éh jah, éh mu'un bé' éh akeu' tengéé' éh kereja', bang penika Allah éh kereja' lem kenin ké'.

1 KORINTUS 3:10

La'ah kivu pekua' pengena' Allah ngan ké', akeu' éh barei' pengeja'au tukeng lamin, akeu' éh mejek lihei', la'ah kelunan éh jah maneu' lamin tong néh. Bang tekep kelunan éh maneu' lamin tong néh seruh mu'un tong penganeu' néh tong néh.

1 KORINTUS 7:17

Jian siget-siget usah murip pekua' pengena' Tuhan ngan néh, barei' bu'un hun Tuhan tebai éh rai. Kenat éh sohoo' ké' dalem kekat sidang.

2 KORINTUS 10:13

Bang hun mé' ngajung bé' mé' ngajung tong éh bé' pu'un barei' irah inah, adang mé' pepata éh ngan kereja' éh nena' Allah ngan mé', ngan kereja' inah, pu'un éh belah keh kepéh.

2 KORINTUS 12:13

Ineu' éh maneu' keh seruh akeu' tengéé' kenin ngan ka'ah jin sidang éh jah? Jah awah éh tengéé', bé' ku' nyohoo' keh tagong akeu'. Akeu' menyat jian uban sala' ké' inah.

2 KORINTUS 12:7

La'ah akeu' pu'un sakit dai akeu' ngeja'au usah ké' ngan bau kenin uban kekat éh poléng ta'an ké' inah. Kesakit ké' inah barei' jah penyohoo' Sitan ke' néh petusah ku' dai ku' ngeja'au usah ké'.

GALATIA 6:3

Uban hun jah usah seruh usah néh tengéé' jian jin kekat irah éh jah, éh mu'un néh bé' éh kenat, hun iah seruh éh pu'un jian kenat, inah iah ngelavo' usah néh awah.

ÉPESUS 3:2

Adang ka'ah lepah menéng tong penika Allah ngevéléé' akeu' dokoo' ké' omok maneu' kereja' Néh nolong keh.

ÉPESUS 3:4

ngan hun keh purung éh, omok keh jam tong kenin Kristus.

ÉPESUS 4:16

Jin Iah kekat éh tong usah petok pemung, ngan pu'un gahang ngan reken neu' siget-siget bukun tulang néh, dokoo' hun siget-siget arong tong usah inah maneu' éh tekep neu' néh, ketem lo'ong usah inah pu'un éh pepit ja'au ngan tai gahang naneu' penika néh.

PILIPI 2:13

Uban Allah éh kereja' dalem kenin ka'ah, avéé' ka'ah keloo' maneu' ngan pu'un maneu' kekat-kekat éh pengeloo' Néh.

KOLOSÉ 1:29

Uban néh kenat inah akeu' kereja' muruh ngan kekat pengegahang Kristus éh pu'un dalem akeu'.

KOLOSÉ 2:13

La'ah hun lepah rai ka'ah matai naneu' kekat penyala' keh, kenat péh ka'ah éh tengéé' pohoo' jin irah Yahudi bé' keh pu'un lem jajii' éh pejajii' Tuhan ngan irah Yahudi. Bang hun iteu' kepéh Allah pu'un pepurip keh pemung ngan Kristus, nega' Néh kekat penyala' lu'.

1 TIMOTIUS 1:14

La'ah ja'au mu'un penika Tuhan ngan ké' ngan mutaa' kepéh, pu'un éh ngusii' kenin ké' dokoo' ké' omok ngelan ngan omok pika neu' ké' pu'un petem lem Kristus Yésus.

1 TIMOTIUS 2:15

Bang redo omok alaa' urip neu' pu'un anak, inah éh hun néh pu'un petem dalem pengelan néh, ngan pika ngan kekat éh ni'ai ngan jam seruh.

1 TIMOTIUS 2:9

Kenat péh akeu' keloo' kekat redo jam nipet tong pakai néh. Jian éh pakai kekat éh jian ngan éh tekep, mai éh pakai éh ke' néh no'é' kelunan. Mai réh manyam bok réh nyavuu' anyam éh tengéé' jin kemalai réh ngan mai réh pakai mas ngan talem mutiara ngan pakai seput éh ma'an belih éh palaa' réh ngejian layan usah réh dokoo' kelunan éh jah magat réh awah.

TITUS 2:12

La'ah penika Néh inah mihin uleu' dokoo' murip ni'ai ngan bé' kivu kekat éh jin tana' iteu'. Tong tana' iteu' uleu' tekep murip jam mavaa' kenin, teneng ngan kivu sohoo' Allah.

TITUS 2:2

Jian ke' nebaraa' irah lakei' éh ja'au urip, ke' réh jam seruh, ngan pu'un barék éh jian ngan jam mihau usah réh, ngan petem lem pengelan réh tong Kristus, ngan jam pika irah éh jah, kebit kenin lem pengeketa.

TITUS 2:4

dokoo' réh omok nebaraa' irah redo éh bé' jak ja'au urip ke' réh jam murung lakei' réh ngan anak réh,

TITUS 2:6

Kenat péh jian ke' nebaraa' irah lemanai dokoo' réh jam mavaa' kenin réh.

YAKUB 4:6

Bang penika Allah pelapah ja'au jin kemerek Néh. Uban pu'un jah ha' lem surat Allah kepéh éh bara', Allah ngelawan kekat kelunan éh bau kenin, bang pu'un Iah pika irah éh diva' kenin, ha' Néh.

1 PÉTERUS 1:13

Uban néh kenat jian keh ngelayau petenup, mavaa' mu'un-mu'un ngan pu'un pengepelum penoo' tong pengejian éh juk nena' ngan keh tovoo' Yésus Kristus tuai kepéh.

1 PÉTERUS 4:11

Séé'-séé' éh juk nebaraa' kelunan, jian iah bara' ha' éh jin Allah. Hun keh pu'un pengena' dokoo' nolong kelunan éh jah, jian keh nolong réh neu' pengegahang éh nena' Allah ngan keh. Dokoo' dalem kekat-kekat néh béé, Allah pu'un kenajung lem Yésus Kristus. Kristus éh pu'un pengaren ngan penyukat pah avéé' pelinguh. Amin.

1 PÉTERUS 4:7

La'ah sioo' pengega' tana' lepah danii', jian keh mihau kenin keh ngan seruh jian-jian, dokoo' keh omok sebayang.

1 PÉTERUS 5:5

Kenat péh kepéh kekat ka'ah lemanai, jian ka'ah kivu sohoo' irah éh ja'au. Jian ka'ah béé-béé diva' kenin, nolong petolong uban pu'un jah ha' dalem surat Allah éh bara' ka', Allah ngelawan irah éh bau kenin bang Iah pika irah éh diva' kenin, ha' Néh. '

1 PÉTERUS 5:8

Mavaa' mu'un-mu'un mai keh telalau kenin, uban Sitan éh ayau keh, iah lakau semah-semah pekua' barei' tepun éh tiwap pitah ka'ah ke' néh kon éh kenat péh Sitan.

3 YOHANES 1:9

La'ah pu'un ku' maneu' surat éh suti' ngan sidang rai, bang Diotrepes éh keloo' majak sidang bé' iah keloo' kivu ha' ké'.