LUKAS 8:10 - Rengah Jian

¹⁰ Ka' ha' Néh mipa réh, Ka'ah iteu' pu'un keh jam tong kekat éh lepah pelim rai, inah éh tong jalan Allah éh Pengeja'au, uban Tuhan mena' pengejam Néh ngan keh. Bang tong kelunan pinaa' éh bé' ngelan mu'un, inah Akeu' nebaraa' réh palaa' ha' tapan, dokoo' irah éh pu'un na'at bé' pu'un ineu' éh ta'an réh, ngan irah éh ngenéné', bé' réh nesen ineu' éh nenéng réh, ha' Néh.

LUKAS 8:10 Iomraidhean Croise

MATIUS 11:25

La'ah tovoo' inah Yésus sebayang, ka' ha' néh, O Amam, éh Tuhan tong langit ngan tong tana' péh, Akeu' bara' jian kenin ngan Ko' uban kekat éh nelim Ko' jin irah éh pu'un pengejam, pu'un Ke' pepoléng éh ngan irah éh bé' jam seruh éh barei' anak awah.

MATIUS 16:17

Ha' Yésus kepéh, O Simon anak Yohanes, murung kenin ko' uban bé' ke' jam éh neu' kelunan éh bara' éh ngan ko', bang Tamen ké' éh tong seruga Iah éh mena' pengejam inah ngan ko'.

MARKUS 4:11

Ka' ha' Yésus ngan réh, Pu'un Allah nolong keh jalan keh omok nesen tong kekat éh pelim tong kelunan sahau rai, inah éh tong Allah éh Pengeja'au. Bang kekat kelunan éh jah, pu'un réh menéng éh lem ha' tapan awah.

MARKUS 4:12

Barei' ha' lem surat Allah bara', ka' ha', Pu'un irah pepu'uh éh, bang bé' éh ta'an réh. Pu'un irah ngenéné' éh mu'un-mu'un bang bé' réh omok jam éh, Hun réh omok jam éh ngan menéng éh ngan lenaa', barang omok péh réh pekoléé' kenin ke' réh tavin Allah ke' Néh bet penyala' réh, kenat ha' lem surat Allah, ha' Yésus.

YOHANES 12:40

Ka' ha' Allah pané Akeu' éh maneu' maten kenin réh peseu', ngan maneu' kenin réh mahéng, dokoo' réh bé' pu'un ta'an, ngan bé' réh nesen, bé' irah keloo' tavin Akeu' ke' Ké' peka'o réh, ha' Néh.

SURAT PAULUS NGAN SIDANG RUM 16:25

Jian lu' mejing Allah. Iah pu'un penyukat ngereken kenin ka'ah dalem pengelan keh tong Rengah Jian éh benara' ké' tong Yésus Kristus. Adang Tuhan juk purip ka'ah éh tengéé' pohoo'. Hun sahau rai bé' kelunan jam tong kenin Tuhan kenat uban néh pelim,

1 KORINTUS 12:11

Bang Sahéé' éh maneu' kekat inah, Iah jah awah, Iah mena' éh pekua' pengeloo' Néh tengéé' ngan siget-siget kelunan.

KOLOSÉ 2:2

Pu'un ku' kereja' kenat dokoo' keh omok gahang kenin ngan pekua' kenin jah awah neu' penika keh ngan Allah. La'ah dokoo' keh omok jam mu'un tong Kristus ngan kekat kenin ngan pengejam keh, ngan jam tong pengeloo' kenin Allah éh pelim sahau rai bang hun iteu' pu'un éh pepoléng éh kepéh, inah éh Kristus.

1 TIMOTIUS 3:16

Adang sebayang lu' pu'un barei' pelim ngan irah éh bé' jam éh, bang jian mu'un éh, ka' éh, Pu'un Tuhan tuai paléu kelunan, Sahéé' Ni'ai pekelenaa' Iah pu'un teneng, pu'un éh ta'an irah meliket. La'ah Iah éh benara' réh tong siget-siget pohoo', Iah éh kepelum kelunan pah tipo tana', Iah éh netéé' Tamen Néh pemung ngan kemaren Néh, moléé' tai seruga.