KOLOSÉ 3:3 - Rengah Jian

³ Uban ka'ah lepah matai ngan urip keh pu'un éh pelim pemung ngan Kristus dalem Allah.

KOLOSÉ 3:3 Iomraidhean Croise

MATIUS 11:25

La'ah tovoo' inah Yésus sebayang, ka' ha' néh, O Amam, éh Tuhan tong langit ngan tong tana' péh, Akeu' bara' jian kenin ngan Ko' uban kekat éh nelim Ko' jin irah éh pu'un pengejam, pu'un Ke' pepoléng éh ngan irah éh bé' jam seruh éh barei' anak awah.

YOHANES 14:19

Bé' lebéé' la'ah irah éh mihau urip réh tong tana' iteu' awah, bé' réh omok na'at Akeu' kepéh, bang omok ka'ah na'at Akeu'. Uban Akeu' murip ke' ka'ah péh omok murip.

YOHANES 3:16

Uban ja'au penika Allah ngan kekat kelunan tong tana' iteu', inah Iah mena' Anak Néh éh jah de' ke' inah, dokoo' séé'-séé' éh ngelan tong Anak Néh, bé' éh matai bang néh omok alaa' urip pelinguh.

YOHANES 4:14

bang séé'-séé' éh mesep baa' éh nena' Ké', bé' éh omok mapeu' batok kepéh la'. Uban baa' éh nena' Ké' ngan néh pu'un éh lem néh, barei'-okoo' usit baa' éh bé' jam metei', éh omok mena' urip éh pelinguh ngan néh, ha' Néh.

YOHANES 5:21

Barei' Tamen Ké' purip kekat kelunan éh matai, kenat péh Akeu' éh Anak Néh omok purip séé'-séé' éh keneloo' Ké'.

YOHANES 5:24

Akeu' bara' mu'un ngan keh, séé'-séé' éh mihau ha' Ké' ngan éh ngelan tong Iah éh nyohoo' Akeu' tuai, iah pu'un urip éh pelinguh, ngan bé' éh teneng ukum uban néh lepah musit jin jalan éh mihin éh matai tai tong jalan éh mihin éh murip.

YOHANES 5:40

na' péh kenat, bé' keh keloo' tavin Akeu' dokoo' keh omok alaa' urip, ha' Néh.

SURAT PAULUS NGAN SIDANG RUM 5:10

Hun lepah rai uleu' ayau Allah, bang naneu' pengematai Anak Néh, inah jalan Iah maneu' uleu' bakéh Néh kepéh. Hun néh neu' pengematai Anak Néh uleu' omok bakéh Allah kepéh, adang lu' omok murip naneu' urip Néh.

SURAT PAULUS NGAN SIDANG RUM 5:21

Kenat péh lepah rai, penyala' éh pengeja'au ngan mihin kelunan matai, bang hun iteu' kepéh penika Allah éh pengeja'au ngan mihin lu' alaa' urip éh pelinguh naneu' Yésus Kristus Éh Tuhan uleu'.

SURAT PAULUS NGAN SIDANG RUM 6:11

Kenat péh ka'ah éh lepah matai tong penyala', jian keh nesen usah keh seleket matai tong kekat penyukat penyala', ngan murip kepéh hun iteu' ngan Allah uban keh pu'un pemung dalem Kristus Yésus.

SURAT PAULUS NGAN SIDANG RUM 6:2

Adang uleu' bé' tekep maneu' kenat kepéh. Uban penyala' bé' pu'un penyukat tong uleu' uban uleu' lepah matai tong penyala' ngan lepah piso jin penyala', bé' lu' juk murip petem maneu' penyala' la'ah.

SURAT PAULUS NGAN SIDANG RUM 8:2

Uban Sahéé' Ni'ai éh pu'un mihin lu' murip petem dalem Yésus Kristus, pu'un éh ngelepu lu' jin penyukat penyala' éh mihin kelunan matai.

1 KORINTUS 15:45

Barei' ha' lem surat Allah pu'un bara', Adam, kelunan éh bu'un senuai Tuhan, usah néh jin tana' iteu', ha' Néh. Bang Adam éh ga' iteu', inah éh Kristus, bé' éh kelunan barei' Adam éh bu'un nah, bang inah éh Sahéé', ngan pu'un éh purip lu'.

1 KORINTUS 2:14

Bang kelunan éh bé' pu'un Sahéé' Allah bé' éh omok alaa' ha' tebaraa' jin Sahéé' Allah, adang néh bé' omok nesen éh, uban kekat ha' tebaraa' inah palui awah tong iah, matek bé' éh omok jam tong néh, uban kekat inah Sahéé' Allah awah éh omok pekelenaa' éh.

2 KORINTUS 5:14

Uban tong kekat penganeu' mé' pu'un éh uban neu' penika Kristus éh barei' mugun améé', uban kejam mé' jah usah inah éh Kristus, lepah matai ngan kekat kelunan. Hun néh kenat kekat kelunan seleket matai.

2 KORINTUS 5:7

uban kekat urip lu' tong tana' pu'un éh neu' pengelan, bé' éh neu' éh poléng ta'an lu' awah.

GALATIA 2:20

La'ah urip ké' hun iteu' bé' éh anah ké' tengéé' kepéh, bang urip Kristus éh murip dalem akeu'. La'ah tong urip ké' hun iteu', akeu' murip neu' pengelan ké' tong Anak Allah, éh pika akeu' ngan éh mena' usah Néh uban akeu'.

ÉPESUS 3:9

La'ah Iah kejeraa' akeu' mihin kekat kelunan jam tong jalan éh petenup Néh tenéh ke' Néh omok kivu pengeloo' kenin Néh. La'ah Allah éh lepah suai kekat ineu'-ineu', nelim Néh pengeloo' kenin Néh jin kelunan sahau,

PILIPI 4:7

La'ah pengepawah éh jin Allah, éh tengéé' mu'un jin kekat ineu'-ineu' éh omok kejam kelunan, omok éh mihau kenin keh ngan penyeruh keh dalem Kristus Yésus.

KOLOSÉ 1:5

La'ah hun keh menéng tong tebaraa' éh teneng, Rengah Jian éh benara' mé' ngan keh rai, pu'un keh menéng tong jalan Tuhan juk mena' urip éh pelinguh ngan keh. La'ah pengelan keh tong Tuhan ngan penika keh, pu'un éh kenat uban keh ngelan Tuhan juk mena' urip pelinguh ngan keh éh petenup Néh ngan keh tong seruga.

KOLOSÉ 2:20

La'ah ka'ah lepah matai pemung ngan Kristus, ngan pu'un keh pelepu jin kamit kekat sahéé' éh pu'un tong tana' iteu'. Hun néh kenat uban ineu' keh murip barei' hun keh pu'un lem kamit néh keto. Uban ineu' keh to keto kivu sohoo' néh éh bara',

KOLOSÉ 2:3

Uban kekat pengejam ngan penesen éh ja'au mu'un, pu'un éh lem Kristus.

KOLOSÉ 3:4

Urip keh mu'un inah éh Kristus, ngan hun Iah pu'un poléng kepéh, ka'ah péh pu'un poléng pemung ngan Néh ngan tai pemung ngan Néh lem kekat pengaren Néh.

IBRANI 7:25

Kenat péh kekat kelunan éh tuai tavin Tuhan dalem Iah, Kristus pu'un penyukat purip réh, kenat éh hun iteu', kenat péh avéé' pelinguh, uban Iah murip pelinguh ngelayau Éh menyat Allah pika réh.

1 PÉTERUS 3:4

Bang jian keh alaa' layan éh jian neu' kenin keh éh pu'un ni'ai. Layan omok mukun uban néh neu' kenin éh dawai ngan kenin éh diva', kenin éh kenat jian mu'un éh tong Allah.

1 PÉTERUS 4:2

Kelebéé' keh murip keto tong tana', jian keh murip kivu pengeloo' Allah, mai keh murip kivu pengagat usah keh awah.

1 YOHANES 3:2

O kekat padéé' éh kemurung ké', hun iteu' uleu' lepah paléu anak Allah, bang pengepaléu lu' kepéh vam, bé' lu' omok jam éh. Bang éh kejam lu' mu'un, inah éh, hun Kristus pu'un tuai kepéh uleu' omok paléu pekua' Iah, hun inah boh lu' na'at Iah ngan lenaa' mu'un.

ÉH POLÉNG 2:17

Hun ko' pu'un kelingen omok menéng, jian ke' menéng kekat ha' éh benara' Sahéé' Ni'ai ngan sidang. La'ah ngan irah éh menang, Akeu' juk mena' mana éh nodoo' Ké' pelim. Kenat kepéh Akeu' juk mena' ngan siget usah réh jah bateu' éh mebéng tong bateu' inah senurat ngaran maréng, éh bé' omok kenejam séé-séé' péh, bang irah éh alaa' éh awah éh jam éh.