1 PÉTERUS 4:10 - Rengah Jian

¹⁰ Jian siget usah tigéh maneu' kereja' Tuhan uban pinaa' arong pengena' Allah dalem kenin kelunan dokoo' lu' nolong kelunan éh jah. Jian keh tigéh dalem kekat pengena' Néh inah.

1 PÉTERUS 4:10 Iomraidhean Croise

MATIUS 20:28

Tekep keh maneu' kenat uban Anak Kelunan, bé' tuai dokoo' irah ngajung ngan ngeja'au éh, bang Iah tuai dokoo' Néh omok nolong kelunan ngan dokoo' Néh mena' urip Néh purip kelunan pinaa', ha' néh.

MATIUS 24:14

La'ah Rengah Jian iteu' éh bara' tong jalan Allah juk tuai Pengeja'au ngan mihau kekat kelunan, pu'un éh benara' réh pah tipo tana' dokoo' kekat kelunan omok jam éh, boh éh pengega' tana', ha' néh.

MATIUS 24:21

Uban kekat penusah inah adang néh pelapah ja'au jin kekat penusah éh pu'un tong tana' jin lepah, inah éh jin bu'un Tuhan suai tana' iteu' pah avéé' hun iteu', bé' éh pu'un kenat. Adang néh bé' pu'un kenat kepéh vam.

MATIUS 24:45

Ha' Yésus kepéh, Belah kekat kelunan sohoo', séé' éh tigéh ngan jam seruh maneu' kekat kereja' néh. Inah éh kelunan sohoo' éh kevéléé' pengeja'au néh ke' néh omok mihau kelunan sohoo' éh jah, ngan mena' penguman ngan réh tong jaka' réh kuman.

MATIUS 25:17

Kenat péh éh neu' kelunan éh alaa' duah ibu rigit mas, iah mena' rigit inah ngan irah éh jah ke' néh omok alaa' duah ibu rigit mas bau inah kepéh.

MATIUS 25:44

Boh irah juk mipa ha' ké' ka', O Tuhan, hun mah mé' na'at ke' la'au' ngan mapeu' batok, ngan mujah kenin mokoo' tengéé', ngan na'at ke' bé' pu'un pakai, ngan na'at ke' sakit ngan tong lamin tutup ke' mé' bé' nolong ke'?

MARKUS 10:45

Anak Kelunan, bé' éh tuai dokoo' irah mihau ngan seva' éh, bang Néh tuai dokoo' Néh mihau irah, ngan mena' urip Néh ngeliwah kekat kelunan, ha' néh.

LUKAS 12:42

Ha' Tuhan mipa éh, Jian keh seruh, jin belah kekat kelunan sohoo' séé' éh tigéh ngan jam seruh maneu' kekat kereja' néh. Kelunan inah éh kevéléé' pengeja'au néh ke' néh petubo lamin néh ngan ke' néh mena' penguman ngan irah éh pata kelunan sohoo' tong jaka' réh kuman.

LUKAS 19:13

Bé' jak éh peleka lakau nah, inah iah tebai kekat kelunan sohoo' néh jah poloo' usah réh, ke' néh mena' jah rigit mas pesiget-siget usah réh. Ka' ha' néh ngan réh, Kelebéé' ké' lakau teu' da', jian keh pakai rigit iteu' maneu' kereja' pekua' kelunan éh pebelih, dokoo' rigit iteu' omok tai vat kepéh, ha' néh ngan réh.

LUKAS 8:3

Pu'un kepéh Yohana, do Kusa, Kusa nah jah kelunan ja'au éh kereja' tong lamin Herodis, inah kepéh, Susana ngan pinaa' redo éh jah kepéh éh nolong Yésus ngan bakéh Néh, éh mena' livah ngan irah Yésus nah.

SURAT PAULUS NGAN SIDANG RUM 15:25

Bang hun iteu' bé' jak ku' kangai ngan ka'ah akeu' juk tai Yérusalem tenah, dokoo' ké' nolong kelunan éh anah Tuhan sitai.

SURAT PAULUS NGAN SIDANG RUM 15:27

Kenin réh tengéé' juk maneu' kenat, bé' pu'un séé' éh nyohoo' réh, bang éh mu'un néh tekep réh maneu' kenat uban irah Yahudi rai pu'un réh mena' kuraa'-kuraa' kejian dalem kenin irah éh tengéé' pohoo', kenat péh hun iteu' kepéh, tekep irah éh tengéé' pohoo' nolong irah Yahudi dalem pengekari réh kepéh.

1 KORINTUS 15:10

Bang neu' penika Allah awah akeu' ngelan tong Iah hun iteu', tong penika Néh ngan ké', bé' akeu' bet éh awah, bang akeu' kereja' mutau mu'un pelapah muruh jin kekat lawah éh jah, éh mu'un bé' éh akeu' tengéé' éh kereja', bang penika Allah éh kereja' lem kenin ké'.

1 KORINTUS 3:10

La'ah kivu pekua' pengena' Allah ngan ké', akeu' éh barei' pengeja'au tukeng lamin, akeu' éh mejek lihei', la'ah kelunan éh jah maneu' lamin tong néh. Bang tekep kelunan éh maneu' lamin tong néh seruh mu'un tong penganeu' néh tong néh.

1 KORINTUS 4:7

Séé' maneu' keh pelapah jian jin irah éh jah? Kineu', bé' éh Tuhan éh mena' kekat-kekat pengena' lem kenin keh kei? Hun néh kenat uban ineu' keh bau kenin ngajung usah keh, barei' keh seruh bé' éh pengena' Tuhan?

2 KORINTUS 6:1

Améé' kelunan éh kereja' pemung ngan Tuhan, naten mé' nyohoo' keh uban keh lepah jam tong penika Tuhan mai keh si'ik kenin tong néh.

2 KORINTUS 9:1

La'ah bé' tiken ke' ku' nyurat bara' tong pengena' keh dokoo' keh nolong kelunan éh anah Allah tong tana' Yudea.

ÉPESUS 3:8

La'ah na' péh akeu' pelapah si'ik jin kekat irah éh jah éh anah Allah, dalem penika Néh Iah kejeraa' akeu' bara' ngan kelunan éh tengéé' pohoo' tong pengejian Kristus éh pelapah jian jin éh omok benara' lu'.

ÉPESUS 4:11

Pu'un Iah mena' kuraa' pengena' ngan kelunan ke' réh omok nolong sidang, Iah ngevéléé' jelua' réh ke' réh omok lawah Néh, jelua' kepéh ke' réh nabi, jelua' kepéh ke' réh perengah Rengah Jian tong Yésus, jelua' kepéh ke' réh gembala mihau sidang, ngan jelua' kepéh ke' réh guru nebaraa' tong sidang.

2 TIMOTIUS 1:18

Jian Tuhan pika éh tovoo' Dau savéé' Tuhan. Ka'au' jam tong kekat jalan néh nolong akeu' hun ké' pu'un tong Épesus rai.

TITUS 1:7

Uban kelunan éh pelayan, pu'un éh maneu' kereja' Allah ngan bé' tekep éh pu'un sa'at. Mai éh kelunan éh bau kenin ngan éh lumang merek. Mai éh kelunan éh mavuk ngan éh lumang pané sa'at, mai éh kelunan éh kelih, éh mekum tong rigit.

IBRANI 6:10

Allah nah bé' éh bé' teneng. Iah bé' ngelepan ineu' éh lepah neu' keh ngan Néh kenat péh penika keh éh pepoléng keh ngan Néh hun keh nolong irah éh ngelan tong Tuhan lepah rai kenat pu'un avéé' hun iteu'.

1 PÉTERUS 5:10

Bang La'o keh teneng pengeketa éh metok awah, Allah tengéé' juk maneu' ka'ah sukup mu'un. Iah juk petekedéng keh, ngegahang keh ngan ngereken keh, uban Iah Allah éh matek jian kenin ngan éh lepah tebai ka'ah dokoo' masek lem kemaren Néh éh pelinguh, uban ka'ah murip pemung ngan Kristus.

1 PÉTERUS 5:12

Pu'un Silas nolong akeu' éh seneruh ké' barei' jah padéé' dalem Tuhan éh tigéh. Akeu' nyurat iteu' suti' awah, dokoo' ngegahang ka'ah ngan bara' tong iteu' néh pengasi Allah éh mu'un ngan keh. Jian keh petem dalem pengasi Néh.