Mikeas 7:6 - Ing Mayap a Balita Biblia

⁶ King panaun a iti ding anak a lalaki tuturing da lang mangmang ding karelang tata, sasalangsang la ding anak a babai karing sariling ima ra, makipate la ding talasawang babai karing katuangan dang babai; ding kalaban ning tau ila mismu ding miembru na ning pamilya na.

Mikeas 7:6 Iomraidhean Croise

Genesis 49:4

Mengari kang danum ning albug a lalagusgus, oneng aliwa ika ing mipaygit karing kapatad mu, uling dinatan me ing pagkeran nang tata mu; asawa na sipingnan me.

2 Samuel 16:11

Kanita sinabi na pang David kang Abisai at karing sablang kayabe na, Lawan yu, buri na kung paten ning sarili kung anak, e kasi lalu na iting i Simei a Benjaminita. Inya paburen yeng managkas nang managkas, uling inutusan ne ning Ginu.

Ding Dalit 41:9

Pati na ing matalik kung kakaluguran at pagkatiwalan; itang kasulu kung mamangan pigtaksilan na ku naman.

Ding Kasebian 30:11

Ating taung paniumpa da la ring karelang tata at e biasang pasalamat karing karelang ima.

Ding Kasebian 30:17

Ing anak a pisunusunu ne i tata na o maninsultu at e mamintu kang ima na sukat ing kanan de ring ayup a buitre at mata na awak panuktukan da la.

Isaias 3:5

Samantalanan ne ning metung at metung ing ninu pa mang tau. E la munie kagalangan ding kayanakan karing karelang makatua, at e ra la galangan ding taung alang dangal ding makaygit karela.

Isaias 9:19

Uling mua ya ing Ginung Mayupaya, milalablab anting silab ing pamamarusa na king mabilug a bansa at makamate karing tau, at ya nang balang magligtas king sarili na ing metung at metung.

Jeremias 12:6

Pati ding kapatad mung lalaki, mismung katubale mu, pigtaksilan da ka; mekiabe la king pamagtaksil keka. E ka magtiwala karela agyang magsalita lang masanting a amanu keka.

Jeremias 20:10

Ding sabla daramdaman ku lang bubulung Makapadurut kekatamu ing makapangilabut! Isumbung ta ya karing atyu king kayupayan! Agyang ding matalik kung kakaluguran panenayan da ing kakung pangabagsak. Ngarang sasabi, Marahil akua nang malinlang; kanita arakap ta ya at apagbengansan.

Jeremias 9:4

Sukat yang mingat ing metung at metung agyang king kakaluguran na, ala nang makapagtiwala king kapatad na; uling ing balang kapatad mapaglinlang yang anti i Jacob, at ing balang metung sisiran neng kakaluguran na.

Ezekiel 22:7

Ala metung man king siudad a gagalang mo sa karing pengari na. Pamiraitnan mu la ding dayuan at sasamantalanan ding babaing mebalu at ding ulila.

Obadias 1:7

Pirait da kayu ding kekong kakampi; king lual ning kekong bansa karin da kayu tinabi. Ding taung keyabe yu king kapayapan karela kayu ngeni makapailalam. Detang kakaluguran a kesulu yung mengan bitag ya ing kekayu ra inumang; tungkul kekayu karelang sasabian, Nukarin ngeni ing sabla rang kayalistuan?

Mateo 10:21

Pagtaksilan ne ning kapatad ing kapatad na, makanyan munaman ing daptan da ring tata karing anak da; lumaban la ding penganak karing pengari da at ipapate da la.

Mateo 26:23

Mekibat ya i Jesus, Ing mitiltil king tinape na king pinggan abe ku, ita ya ing magtaksil kanaku.

Lucas 12:53

Milaban-laban la ding tata at ding anak dang lalaki, ding ima at ding anak dang babai at antimu rin ding katuangan a babai at ding manuyang a babai.

Lucas 21:16

Agyang ding pengari yu, kapatad, kamaganak, at kakaluguran ipanganiaya ra kayu; ipapate da la ring mapilan kekayu.

Juan 13:18

E para kekayu ngan ing sasabian ku. Balu ku la ding kanakung pinili. Oneng sukat matupad ing sasabian ning kasulatan, Pildak na ku ning pepakan ku.