Mikeas 3:8 - Ing Mayap a Balita Biblia

⁸ Oneng tungkul naman kanaku, kakatmuan na ku ning Ginu king espiritu at king upaya na, ning katuliran at tetagan a lub ban sabian ku la karing memalen na ning Israel ding karelang kasalanan.

Mikeas 3:8 Iomraidhean Croise

Job 32:18

E na ku makapanaya pa ban magsalita. E ku na la apibata ding amanung atyu kaku.

Isaias 58:1

Ngana ning Ginu, Kulisak kang masikan anggang binit mu! Sabian mu karing memalen kung Israelita ing kasalanan da!

Isaias 61:1

Kitmuan na ku ning Ginung Dios king espiritu na. Pinili na ku at tinubud ban karing kalulu mayap a balita iyatad ku, ban uluan lang pusung sugatan, ban ihayag karing bihag ing pangaligtas da at ing kalayaan karing atyu king sukulan.

Isaias 61:2

Tinubud na ku ban sabian king miras na ing panaun ban ing Ginu iligtas ne ing balen a pinili na, at sambutan karelang kalaban. Tinubud na ku ban ding tatangis kaku lang paligayan,

Jeremias 1:18

Ngening aldong iti gawan da kang anting makakutang siudad, anting metung a asias a bakal at anting pader a tangsu. Lumaban la keka ding ari ning Juda, ding pamuntuk, ding pari, at ding memalen.

Jeremias 20:9

Oneng potang kakung sabian, Kalinguan ku ne ing Ginu, e ku ne banggitan pa ing lagyu na, kanita ing keka namang amanu mengari ya king aping milalablab king libutad ning pusu ku; magalsa kilub dang busbus ding butul ku, mangaina na ku king pamamigil. E ku na bitasang ayaguanta.

Jeremias 6:11

Ginu, aku man tatablan na na ku ning mua mu karela; e ku na agyung aguantan. Kanita ngana kanaku ning Ginu, Sulung, ibugnus mu ing mua ku karing anak a atyu karing dalan, karing sablang pititipunan da ring kayanakan a lalaki. Magisan la ngang mayakua ding miyasawa, lalaki at babai, at e la miligtas pati ding matua nang matua.

Ding Tagulele 2:14

Ding kekang propeta kalaraman ing keka balu rang sabian; pirait da ka king karelang panaral. Kapilan man e ra pepakilala ing kekang pamikasala. Uli ra, e mu na aisip pa king kailangan ing sumisi ka.

Ezekiel 16:2

Ngana, Anak ning tau, ipakilala mu king Jerusalem ing makasumaming bage depat na.

Ezekiel 20:4

Anak ning tau, makasadia na kang atulan mu la? Sulung, nung makanyan. Ipaganaka mu la karela ding bage makasumami a depat da ring makatua ra.

Ezekiel 22:2

Ngana, Anak ning tau, makasadia na kang matul king siudad a mitmu karing makamate tau? Pakalino mu la ding sablang bage makasumaming depat na.

Ezekiel 23:36

Ngana kanaku ning Ginu, Anak ning tau, makasadia na kang atulan me i Ohola at i Oholiba? Idalum mu la karing depat dang bage makasumami.

Ezekiel 3:14

Dinatang ya kanaku ing espiritu na ning Ginu a kayabe ing maragul a upaya, at kabang darala na ku ning espiritu dimdam ku ing kaplas kung lub at mua.

Ezekiel 43:10

Ngana pa ning Ginu kanaku, At ika naman, O anak ning tau, ilarawan mu ne man iting Templo karing memalen na ning Israel. Paburen mung pagaralan de ing planu na. Paburen mung mipakarine la king depat dang pamikasala.

Mateo 7:29

E re kalupa ding talaturu ning Kautusan, uling tinuru yang maki kayupayan.

Marcos 3:17

i Santiago at i Juanding anak nang Zebedeo, (deti pemalayawan na lang Boanerges, ngana wari, Bugasuk);

1 Corinto 2:4

at ing kanakung pamagsalita at aral e la miyabie kekayu king makayama nang amanu ning kabiasnan-tau, nune king patutu na ning Espiritu at upaya na ning Dios.