Mikeas 3:2 - Ing Mayap a Balita Biblia

² oneng kasaman yu ing mayap at luluguran yu ing e mayap. Mabie lang babakbakan yu balat ding memalen ku at paglaputan yu ing laman karing butul da.

Mikeas 3:2 Iomraidhean Croise

1 Ari 21:20

Inyang ikit neng Ahab i Elias, sinabi na, A, atyu ne naman ing kakung kalaban! Ngana namang mekibat Elias, Wa, ikit da ka uling migbabad ka king dapat a e mayap king akakit na ning Ginu.

2 Cronica 19:2

Selubungan neng Jehu, ing propetang anak nang Hanani. Nganang propeta Jehu kang Aring Jeosafat, Kailangan la waring saupan ding taung e mayap at luguran detang masama king Ginu? Uli na ning depat mung iti, mimua ya keka ing Ginu.

Ding Dalit 15:4

E na la katulan detang tatanggi king Dios; oneng detang king Dios mamintu, at tatakut ilang gagalangan na; tutuparan na sabla nang kapangakuan nu man anti ing maging kabayaran.

Ding Dalit 53:4

Nganang kinutang ning Ginu, Tutu na la waring alang balu deting sablang darapat e ustu a mengaring mamangan putu king balen ku, at mangalinguan lang samba kako?

Ding Kasebian 28:4

Mapupuri la ding taung e mayap kapamilatan da ring sasalangsang king kautusan, oneng laban no man karela detang mamintu king kautusan.

Isaias 3:15

Ala kayung matulid damusak karing kanakung memalen at magsamantala karing pakakalulu. Aku, ing Ginung Dios a Mayupaya, ing migsalita.

Isaias 5:20

Makalunus na kayo, uling ausan yung e mayap ing mayap, at ing e mayap ya ing ausan yung mayap. Gagawan yeng masala ing madalumdum at gagawan yeng madalumdum ing masala. At gagawan yung mayumu pati ing mapait, at ing mayumu naman ya ing gagawan yung mapait!

Isaias 57:12

Magkang isipan yu king ustu ing daraptan yu, oneng ibulalag ku ing kekayung dapat, at e ra kayu malyaring asaupan ding idolo yu.

Ezekiel 11:7

Inya aku, ing Ginung Dios, iti ing sasabian ku kekayu. Wa, metung ya ping kalderang pipaglutuan iting siudad, oneng isanu ing karni? Ding bangke da ring taung pete yu! Milako na kayu keti; iyugse da kayu king lual ning siudad.

Ezekiel 22:27

Mengari la ding opisyal na ning kapamahalan karing asung-gubat a maglapak karing animal a karelang apate. Makamate la ban kanita mibandi la.

Ezekiel 24:4

Ibulug mu la ding masanting diling giling karni, ding pago at ding bitis; katmuan mia naman karing mepiling pirapirasung butul.

Ezekiel 34:3

Inuman yu ing gatas, misusulud kayung imalan a megawa king bulbul da ring tupa, at pupulkeruan ye ing masanting diling tupa ban kanan ye. Oneng e yu la kapilan man lingapan ding tupa.

Amos 4:1

Pakiramdaman yu iti, ikong babaing tau Samaria a tataba anti ding baka a pataban karin king Bashan. Ikayu ding manggipit karing maina at manabusu karing pakakalulu, at mamilit karing asawa yu king e ra kayu sa paburen kagigisanan alak!

Amos 5:15

Pikasaman yu ing e mayap at luguran yu ing mayap, at pagsikapan yung mag-ari ing hustisia karing husgadu. Palamang-lamang malunus ya ing Ginu karing mitagan a memalen na ning bansang iti.

Mikeas 2:8

Nganang makibat ning Ginu, Oneng ikayu manalakaran kayung anting kalaban da ring taung kanakung pinili. Agyang ding sundalus a mumuli ibat king gera isipan da king kauli ra bale mipanatag na la bili, oneng atyu kayu karin, manenayang maniamsam pati karing balabal da.

Mikeas 7:2

Ala nang mitagan a taung malinis a pamibiebie king bansa at ala nang tapat king Dios. Manenaya yang oportunidad ing balang metung ban makamate king kalupa nang tau. Pakirakpan ne ning balang metung ing kabalen na.

Mikeas 7:3

Magaling la ngan king pamaniapat e mayap. Maniawad lang suhul ding pamuntuk at ukum. Sasabian na karela ning mayupayang tau ing kaburian na, inya misasapakat la.

Zepania 3:3

Mengari lang danupan a leon ding pamuntuk na, at mengari la karing asu a danupan ding hues na; tutu lang matako inya e ra buring mikabukasan pati butul.

Lucas 19:14

Tutu ra ne mang kesaman ding memalen na, inya kalako na mitubud lang pekakatawan da ban sabian da, E mi ya buring maging ari ing taung iti.

Juan 18:40

Ngarang kinulisak mekibat, Ali mi ya, aliwa ya, nune i Barabas! (Metung yang tulisan i Barabas.)

Juan 7:7

E na kayu pikasaman ning yatu, oneng kasaman na ku uling patutuan ku king ding dapat na marawak la.

Roma 1:32

Balu ra ing sasabian na ning kautusan na ning Dios king ding taung makanyan kailangan lang mate. Makanyan man, e pa makagyu ing daraptan da la deting bage, nune pamayapan da la pa ding aliwang darapat kareti.

Roma 12:9

Ala sanang pamagkunwari ing lugud yu; pikasaman yu ing e mayap at papanatilian yu ing mayap.

2 Timoteo 3:3

Maging maimut la naman, alang lunus, mapanyirang puri, bugasuk, mabagsik, at pikakasaman da ing mayap.