Mikeas 2:6 - Ing Mayap a Balita Biblia

⁶ Ngarang sumabi kanaku ding tau, Patugut na kang manaral kekami! E ka magsalitang makanyan. E na ke ibili ning Dios king kamarinayan.

Mikeas 2:6 Iomraidhean Croise

Ding Dalit 74:9

Ala nang palatandanan a manibat king Dios; ala nang propeta metung man at alang makasabi nung kapilan iti miyangganan.

Isaias 29:10

Gewa na kayung mitutundu ning Ginu at makasadiang matudtud malalam. Ding peka mata na ning balen ila ding propeta, oneng tikpan na la mata ning Dios.

Isaias 30:10

Patuknangan da lang magsalita ding propeta. Ngara, Tuknang kayung magsalita kekami tungkul king matulid. Ing isalita yu kekami ya itang kapad ming daramdaman. Paburen yung mibiebie kami karing mali ming kapamalakan.

Ezekiel 20:46

Ngana, Anak ning tau, lumawe ka banda king mauli. Magsalita ka laban king mauli at sabian mu ing ula laban king gubat na ning mauli.

Ezekiel 21:2

Ngana, Anak ning tau, magsalita kang laban king Jerusalem at laban karing lugal a pisasamban da ring tau. Dinan meng babala ing bansa ning Israel

Ezekiel 3:26

Ipata ke ing dila mu ban e mu la malyaring dinan babala deting mapag-rebelding tau.

Amos 2:12

Oneng pemilit yu lang minum alak ding Nazareo at binawal yu la ding propeta ban e ra ibie ing amanu ku.

Amos 7:13

E na ka pasibayung manaral keti king Betel. Iti ya ing lugal nang pisasamban ning ari; iti ya ing templo ning bansa.

Amos 7:16

Inya ngeni makiramdam ka king sasabian na ning Ginu. Sasabian mu king tuknang na kung magsalitang ula, king tuknang na kung magsalita laban karing memalen na ning Israel.

Mikeas 3:6

Uling lilinlangan yu la ding taung kanakung pinili, e na kayu manakit pang vision at e na kayu makapanula pa. Propeta, ditak namu ing makatagan king aldo yu; mapupupus ne ing aldo yu.

Mikeas 6:16

Iti mapalyari uling pekiapusan yu ing e mayap nang ugali ning Aring Omri at ing anak nang i Aring Ahab. Uling menatili kayung tutuki karing palakad da, inya ibagsak da kayu at muli kayung pikakasaman da ring sabla. Insultuan da kayu ding tau nukarin man.

Ding Dapat 4:17

Ban e na lalung mikalat karing tau iting pisasabian, masanting tantuan ta na la mung e na magsalita kenu man king lagyu nang Jesus.

Ding Dapat 5:28

Ngana karela, Maigpit da kayung tintuan king tuknang na kayung tuturu tungkul king lagyu na ning taung iti; lawan yu nung nanu ing kekayung depat! Kinalat yu na king mabilug a Jerusalem ing kekayung tuturu at buri yu pang iparsala kekami ing pangamate na!

Ding Dapat 5:40

Pepayaus da lang lungub pasibayu ding apostol, at inatulan da lang mabarug latiku. Kaybat, tintuan da lang e na magsalitang pasibayu king lagyu nang Jesus at layun da na lang binulus.

Ding Dapat 7:51

Mangasias kayu wari lub; tutu na la waring alang pakiramdam ding pusu yu? Tutu na kayu waring mengaklak ban e yu pansinan ing amanu na ning Dios? Ala kayung keyaliwa karing kekayung makatua; e ye munaman patugutan sasagkan ing Banal a Espiritu!