Mikeas 2:3 - Ing Mayap a Balita Biblia

³ Inya sasabian na ning Ginu, Babalakan ke ing metung a kasakitan para kekayu at e ye malyaring alisian. Uli na ning miras kekayu, e na kayu pasibayung lumakad pang mitmung kayabangan.

Mikeas 2:3 Iomraidhean Croise

Isaias 29:20

Ya na ita ing kawakasan da ring mapanalipit karing aliwa at e kikilala king Dios. Mate ya ing ninumang makasalanan.

Isaias 3:16

Ngana ning Ginu, Lawan yu la ding babaing tau Jerusalem. Tutu lang mapagmaragul! Balamu ninu na ila neng lalakad la. E la patugut magmapundat a mata; kending-kending la king lakad da at pakalaksingan da la ring pulseras karing bitis da.

Isaias 5:19

Sasabian yu, Paburen yang magmalagua ing Ginu at daptan na ing sinabi na ban akit tamu. Paburen ya ing banal nang Dios ning Israel ing tuparan na ing tingka na. Lawan tamu nung nanu ing atyu king lub na.

Jeremias 18:11

Inya ngeni, sabian mu karing memalen na ning Juda at Jerusalem king gagawa kung planu laban karela at magsadia na ku ban parusan ku la. Sabian mu karela king tuknang na lang mabibie king pamikasala, king sukat na lang magbayung bie.

Jeremias 27:12

Sinabi ku naman iti kang Aring Zedekias ning Juda. Ngaku, Pailalam ka king ari na ning Babilonia. Suyuan me at ding memalen na at e ka mate.

Jeremias 34:17

Inya ngeni, aku, ing Ginu, sasabian ku king e yu ku pemintuan; e yu binie karing kalupa yung Israelita ing karelang kalayaan. Inya, dinan da kayung kalayaan: ing kalayaan mate king gera, king salut, at king danup. Mitakutan ya ing balang bansa ning yatu king daptan ku kekayu.

Jeremias 36:23

Kabud mekayari yang makabasang atlu o apat a kabulung ning lulun, pupututan na la ning ari king kapamilatan na ning kutsilyu at iyugse king api. Depatan na iti angga king mesilab ya ngan ing kabilugan a lulun.

Jeremias 43:2

Kanita i Azaria a anak nang Hosaias at i Joanan a anak nang Karea at ding aliwa pang masias a buntuk a tau, sinabi da kanaku, Malaram ka. E na ka tinubud ning Ginung kekaming Dios ban sabian mu kekami king e ke pupunta at manuknangan king Ehipto.

Jeremias 8:3

At ding memalen na naman niting e mayap a bansa a miligtas at manuknangan karing lugal nung nu ku la inugse, pagnasan da ing mate na la sa kesa king mie la pa. Aku, ing Ginung Mayupaya, ing migsalita.

Ding Tagulele 1:14

Tindanan na lang sabla kung pamikasala, at tinali king lubid a gewa na; king batal ku karin sinabit na la, at mengaina ku uli ning bayat da. Pepaburen na ku ning Ginu karing kakung kalaban, at ala kung ilaban karela.

Ding Tagulele 2:17

Ing Ginu lubus na nang agampanan ing tingka nang daptan: king alang lunus sinira na kata ngan antimo ing bela na karing aldo milabasan. Tagumpe ing binie na karing kalaban tamu, at king kekatamung pangabigu tula ing karela binie ning Ginu.

Ding Tagulele 5:5

Anti keng kabayu o kamelyu, mapagal na keng tutu, oneng e ra ke dirinan panaun magpaynawa.

Daniel 4:37

At ngeni, aku, i Nebucadenesar, pupurian ke, parangalan ke, at paligayan ing Ari ning Banua. Ing heganaganang gagawan na ustu at makatuliran at agyu neng isaldak ing ninumang taung palalu.

Amos 2:14

E la miligtas kanaku agyang ding mabilis dang diling mulayi; milako la sikanan ding masikan at e ra aligtas ding sundalus ing sariling bie ra.

Amos 3:1

Makiramdam kayu, O memalen ning Israel, kaniting mensahi na ning Ginu a selita na tungkul kekayu, ikayung sablang bansang tinaid nang leko Ehipto.

Amos 3:2

Ngana, Ikayu mung bukud ing pinili ku karing sablang bansa keti king yatu at pigmalasakitan. At iti pasari king beyatan na ning kekayung kasalanan, at iti ing sangkan ban sukat da kayung parusan karing kekayung kasalanan!

Amos 5:13

Inya masanting pa ing e na kayu bubulad kaniting panaun a e mayap!

Mikeas 2:1

Makapangilabut ing kararasan da ring kera-kerang e matudtud kabang mibabalak lang e mayap! Kabuklat ning masala, kabud mirinan lang oportunidad, daraptan da itang e mayap a karelang binalak.

Roma 16:4

Mibili king panganib ing bie ra alang-alang kanaku. Maragul ku utang a lub karela at e mu aku, nune pati na ding sablang iglesia da ring paganu.

Efeso 5:16

Samantalanan yung makarapat mayap king balang oportunidad, uling marawak ing mag-ari king kasalukuyan.

Deuteronomio 28:48

Inya naman sumuyu kayu karing kalaban a itubud na ning Ginu laban kekayu. Dumanup kayu, kumau, malubas, at mibili kayu king miyayaliwang pamangailangan. Pasakitan da kayu angga king mate kayu ngan.

Santiago 2:13

Atulan neng alang lunus ning Dios ing ninumang e biasang lumunus; oneng e ya sukat mitakutan ing mapaglunus arapan na ning ukum.