Mikeas 1:5 - Ing Mayap a Balita Biblia

⁵ Mapalyari ngan iting sabla uling mikasala la ding memalen na ning Israel at linaban la king Dios. Ninu ing pamarsalanan king pamaglaban na ning Israel? Alang aliwa nune ing Samaria, ing sentrung siudad! Ninu ing mikakasala uli na ning pamanyambang aliwang dios king Juda? Alang aliwa nune ing Jerusalem mismu!

Mikeas 1:5 Iomraidhean Croise

1 Ari 11:7

King bunduk dane aslagan na ning Jerusalem karin ya pepagawang altar ban karin ne samban i Kemos, ing makasumaming dios da ring Moabita, at antimu rin kang Molek, ing makasumaming dios da ring Ammonita.

1 Ari 13:32

Uling siguradung matupad itang amanung sinabi na at inutus ning Ginu ban sabian na laban king altar na ning Betel at karing sablang lugal a pisasamban karing siudad ning Samaria.

1 Ari 16:24

Seli ne kang Semer ing bunduk-bundukan ning Samaria king alagang anam a libung pirasung pilak. Pepabakud neng matibe iting bunduk-bundukan at pemalagyuan neng Samaria, ing lagyu ning pisaluan na king bunduk-bundukan.

2 Cronica 34:3

King kawalung banua na ning pamag-ari na, agyang anak ya pa kanita, sinuyu neng mitmung katapatan king Dios ning makatua nang i David. King kalabing aduang banua ning pamag-ari na, pegumpisan na lang leko king Jerusalem ding lugal a pisasamban da ring paganu, ding larawan ning diosang i Asera, ding dinukit a rebultu at larawan.

2 Cronica 34:4

King utus na, lesak da la ring tauan na ring altar nang Baal at lesak da la ring altar a pidurulukan insenso. Linaso da lang mapinung-mapinu ding larawan nang Asera at ding rebultu. Kaybat, silbag dang anting alikabuk karing kutkutan da ring sinamba at minain karela.

Isaias 7:9

Ninu wari ing pangangas na ning Israel? Ing siudad ning Samaria a kabisera nang maina! Ninu naman ing pangangas na ning Samaria? Aliwa mu wari ing mainang i Aring Peka? Nung maina ing kekang kasalpantayanan, maina ka naman.

Jeremias 2:17

Israel, ika mismu ing dinapat kanyan king sarili mu! Gilutan me, ing Ginung kekang Dios, kabang tatairan na ka king dalan.

Jeremias 2:19

Ing sarili mung alang kayapan ya ing mamarusa keka, at ing kataksilan mu kaku ya ing mangondena keka. Abalu mu nung nu anti kapait at alang kayapan ing likuan mu ku, ing Ginung kekang Dios; ala na kang galang nanuman. Aku, ing Ginung Dios a Mayupaya, ing migsalita.

Jeremias 23:13

Ikit ku na ing kasalanan da ring propeta ning Samaria: migsalita la king lagyu nang Baal, at linili da la ring kakung memalen.

Jeremias 23:14

Oneng ikit ku ing lalung e mayap karing propeta ning Jerusalem: darapat lang pamakipangalugud at magsalitang kalaraman; sasaupan da lang darapat e ustu ding tau, inya alang tuknang ing pamaniapat dang e mayap. Para kaku, e la ngan mayap anti ding tau Sodoma, at e la mayap anti ding memalen ning Gomorra.

Jeremias 4:18

Juda, ika ing pepasari kaniti king kekang sarili king uli na ning e makatud mung pamibiebie at ding bage pemaniapat mu. Iti ya ing mapait mung kayatulan.

Jeremias 5:25

Makanyan man, ding kekayung kasalanan ilang sinabat kareting mayap a bage ban e yu la nabangnan.

Jeremias 6:19

Yatu, makiramdam ka! Bilang parusa king sablang e mayap dang nasa, parala kung kasiran karing taung deti uling tinggian da ing turu ku at e da la pemintuan ding amanu ku.

Ding Tagulele 5:16

Alang mitagan king sablang kekeng pagmaragul. Mikasala kami at ngeni iti pagdusan mi!

Ezekiel 16:46

Ing atsi mu, at ding baryu na, ya ing Samaria ning norti. Ing wali mung babai, at ding baryu na, ya ing Sodoma ning mauli.

Hosea 7:1

Potang buri ku lang uluan ding memalen kung Israelita at gawan pasibayung masalese bili, kanita da naman papakit ing karelang dapat a e ustu at ing dapat dang e mayap. Mipamirait la, manlub la karing bale at manako la, panakawanan da la ring tau king dalan.

Amos 6:1

Makalunus ing mapalyari kekayung makusuelung mabibie king Zion, at ikayung panatag a bili king Samaria, ikayung marangal a tau na niting marangal a bansang Israel, ikayung lalapitan dang aduananan saup ding tau!

Amos 7:9

Malasak la ding lugal nung nu la karin sinamba ding lahi nang Isaac. Malasak la ding lugal a banal ning Israel. Dinan ku neng kawakasan ing pamilya na ning Aring Jeroboam.

Amos 8:14

Detang susumpa karing kikilalanan nang dios ning Samaria at sasabing Saksi ke ing dios ning Dan o kaya Saksi ke ing dios ning Beerseba, miragsa la ding taung deta at e na la talakad kapilan man.

Mikeas 1:13

Ikayung manuknangan king Lakis, isulud yu la ding kabayu karing karwahe. Pekiapusan yu ing dakal nang kasalanan ning Israel; inya ikayu ing mitulak king Jerusalem king pamikasala.