Mikeas 1:16 - Ing Mayap a Balita Biblia

¹⁶ Memalen na ning Juda, pututan yu na ing buak yu bilang pamagpaldas yu karing kekayung anak a pakamalan. Kalbuan yu na la ding buntuk yu anti ing ayup a buitre, uling kuanan da la kekayu ding anak yu at miyugse la king aliwang bansa.

Mikeas 1:16 Iomraidhean Croise

2 Ari 17:6

King kasiam nang banua ning pamag-ari nang Hosea sekupan ne ning ari ning Asiria ing Samaria, at binihag na la ampon dela ring Israelita king Asiria. Tiknang na la ding mapilan king siudad ning Hala, ding mapilan naman king lele na ning Ilug ning Habor sakup ning Gozan, at ding aliwa pa karing siudad ning Media.

Job 1:20

Kanita tinalakad ya i Job; ginabak na ing imalan na uli ning lungkut na. Sitsat ne ing buntuk na, migsakab ya king gabun, at sinamba ya king Dios.

Isaias 15:2

Mukiat la king bunduk-bundukan ding memalen na ning Dibon ban manangis king santuaryu karin. Tatangisan da la ring memalen na ning Moab ding siudad ning Nebo at Medeba; kinalbu da la ring buntuk da at lebahas ding balbas da uli na ning kalungkutan da.

Isaias 22:12

Mamaus ya kanita keka ing Ginung Dios a Mayupaya ban manangis kayu at magpaldas, ban kalbuan la ding buntuk yu at ban misulud imalan a magaspang.

Jeremias 16:6

Mate ya ing mabandi at ing kalulu king bansang iti, oneng alang mangutkut o manangis para karela. Ala metung mang gumalus king sarili na o maniatsat king buntuk na ban ipakit na ing lungkut na.

Jeremias 4:8

Inya, misulud kayung imalan a magaspang, ngulangul at manangis kayu, uling ing mabagsik nang mua ning Ginu e pa milako king Juda.

Jeremias 47:5

Maragul a lungkut ing dinatang karing memalen ning Gaza, at ding memalen ning Askelon tahimik la. Angga kapilan ing magpaldas la ding taung mitagan ning Filistia?

Jeremias 6:26

Nganang sasabi ning Ginu karing taung pinili na, Magsulud kayung imalan a magaspang at magbiling-biling king abu. Tumangis kayung kapait-paitan antimo ing pamanangis yu king kabubugtungan yung anak a lalaking mete. Salake ya king oras a e yu piadian ing datang ban manlasak kekayu.

Jeremias 7:29

Manangis kayu, memalen ning Jerusalem; ururan yu ing buak yu at iyugse yu. Ikanta ye babo ding bunduk-bundukan ing kanta ning kamatayan, uling aku, ing Ginu, mua ku at tinggian ke ing balen ku.

Ding Tagulele 2:19

Mibangun ka king kekaban ning kabengian, king Ginu ulit-ulit maniawad; pusu mu keka yang ibuklat, maniawad kang lunus para karing kekang anak, karing anak a mamamate king danup king balang suluk ning siudad!

Amos 7:11

Ini ya ing sasabian na, Mate ya king labanan i Jeroboam at mabihag la ding memalen na ning Israel, at miyugse la king aliwang bansa!

Amos 7:17

Uling sinabi mu yan, oyni ngeni ing sasabian na keka ning Ginu, Amazia, makisiping ya ing asawa mu karing lalaki keti king siudad at mate la king gera ding anak mu. Mapirake ya ing gabun mu at miyabie ya karing aliwa at ika mismu mate ka king metung a bansang paganu. Maging bihag la ding memalen na ning Israel at miyugse la king aliwang bansa!

Amos 8:10

Gawan ku lang aldo ning pamangutkut mete ding kekong piesta, at alilan ku lang pamanangis ding masaya yung pamagkanta. Pasatsat ku la kekayu ding buntuk yu at papamiblasan da kayung imalan a magaspang. Mangari kayu karing pengaring manangis king pangamate na ning bugtung dang anak a lalaki. Maging maplas ya ing aldong ita angga king kawakasan na.

Deuteronomio 28:41

Manganak kayung lalaki at babai, oneng milako la kekayu, uling mabihag la karing kalaban.