Lucas 6:21 - Ing Mayap a Balita Biblia

²¹ Mapalad kayu, ikong danupan ngeni, uling mipakabsian kayu! Mapalad kayu, ikong tatangis ngeni, uling mipaligayan kayu!

Lucas 6:21 Iomraidhean Croise

Genesis 17:17

Migsakab ya i Abraham king gabun, oneng mipakayli ya. At nganang sinabi king lub na, Mikayanak ya pa wari ing lalaking dinalan nang banua? Makapanganak ya pa wari i Sarah a siam nang pulung banua?

Genesis 21:6

Nganang Sarah, Makaligaya ing binie nang iti kanaku ning Dios! Tumula ya naman antimo aku ing ninumang makabalu kaniti.

Ding Dalit 107:9

Anggang bisa ya, ing taung mau painuman ne, at ing taung danupan pakabsian ne king mayap a bage.

Ding Dalit 119:136

Balamu ilug a mamagus king lupa ku ing lua, uling ding utus mu e da la pamintuan ding aliwa.

Ding Dalit 143:6

Tatas ku la keka dening kakung gamat king panalangin; kalupa ning malanging gabun kakau ya keka ining kakung kaladua.

Ding Dalit 17:15

Lupa mu kaku yang tangalan, uling darapat kung katuliran, at kagising ku neng abak tula kumatmu ku uling 'tyu ku arapan mu.

Ding Dalit 28:7

Ing Ginu ya ing kakung kalasag at sikanan, ya ing bukud kung pagkatiwalan, inya manakit kung kasaupan; masaya ku at pagkanta keng kapasalamatan.

Ding Dalit 65:4

Kaligaya na ning taung kekang pipilinan, at king kekang santuaryu karin me patuknangan. Lubus keng ligaya kilub ning kekang tuknangan; karing bendisyun ning Templo mung banal.

Isaias 25:6

Keting Bunduk ning Zion magsadia yang dakal a pamangan at inuman ing Ginung Mayupaya para karing sablang bansa keti king yatu. Maniaman a pamangan at mangamal diling alak ing pepasadia na.

Isaias 30:19

E na kayu pasibayung tumangis, ikayung memalen a manuknangan king Jerusalem. Mapaglunus ya at saupan na kayu, nung pasaup kayu king Ginu.

Isaias 66:10

Makisanmetung kayu king tula ning Jerusalem; magsaya kayu para king Jerusalem, ikong sablang malugud kaniting siudad na! Makisanmetung kayu ngeni king tula na, ikong sablang menangis para king Jerusalem!

Jeremias 13:17

Nung e kayu makiramdam, lihim kung kumiak uli ning kekong ketasan; Kumiak kung e makanyan-kanyan at ing lua ku magus, uling ding taung pinili ning Ginu mayakua la at maging bihag.

Jeremias 31:25

Dinan ku lang kapaynawan detang mapagal at pakabsian ing balang metung a maina uli na ning danup.

Jeremias 31:9

Kikiak lang datang ding taung kakung memalen; manalangin la kabang kaku lang tatairan. Tairan ku la karing sibul ning danum, karing patag a dalan, at e la misakab. Uling anti kung tata para king Israel, at ing Efraim ya ing kakung pangane.

Jeremias 9:1

Sana ing buntuk ku metung yang talaga, at ding kakung mata sibul na la ning lua, ban atangisan ku la aldo at bengi ding kabalen kung pete ra.

Ezekiel 7:16

Tumakas la karing bunduk ding mapilan; mangari la karing patipating meyabuang karing kapatagan. Saingsing la ngan uli na ning kasalanan da.

Ezekiel 9:4

Ngana, Munta ka king mabilug a siudad ning Jerusalem at dinan meng tatak king kanuan ing metung at metung a sasaingsing at maliligalig uli da ring sablang bage makasumami a mararapat king siudad.

Mateo 5:4

Mapalad la ding malungkut, uling paligayan na la ning Dios!

Mateo 5:6

Mapalad la ding daranup at kakau king kabanalan na ning Dios, uling pakabsian na la!

Lucas 1:53

Pepakabsian na la ding danupan karing mayap a bage, at pepalakuan na lang alang darala ding mabandi.

Lucas 6:20

Linawe na lang Jesus ding alagad na at ngana, Mapalad kayu, ikong pakakalulu, uling kekayu ya ing Kayarian ning Dios!

Lucas 6:22

Mapalad kayu nung pikasaman da kayu, tanggian at pamakarinayan at paniabianan e mayap king uli na ning Anak ning Tau!

Lucas 6:25

Kalulu na kayu, ikong ating labis-labis a pagkabie, uling dumanup kayu! Kalulu na kayu, ikong magsaya king tula, uling tumangis kayu!

Juan 11:35

Kiniak ya i Jesus.

Juan 4:10

Sinabi nang Jesus, Nung balu mu mu ing babie ning Dios at nung ninu ing maki-inum, mekad ika na ing maniawad keya at ibie na keka ing danum a mabie.

Juan 6:35

Nganang Jesus karela, Aku ing tinape ning bie. E ya dumanup kapilan man ing lumapit kanaku at e ya kumaung danum kapilan man ing maniwala kanaku.

1 Corinto 4:11

Angga kaniting kaorasan danupan kami at mau; halus ala keng isulud; metampalasan kami; alang tuknangan.

2 Corinto 11:27

Delanan ku ing dakal a kapagalan at kasakitan, ing maralas a kapuyatan, danup at kau. Tikman ku munaman ing alang apangan, ing dimla, at alang salilungan.

2 Corinto 12:10

Inya king uli nang Cristo, e baling maina ku, maiinsultu, mipasakitan, malulupig, at magugulu. Uling nung kapilan ku maina, kanita na ku man masikan.

2 Corinto 6:10

agyamang maragul ing kalungkutan, parati keng masaya; lupa keng pakakalulu, oneng seupan mi lang misalapi ding dakal; balamu mo ala kaming nanumang pibandian, oneng atyu ngan kekami ing sabla.

Santiago 1:12

Mapalad ya ing taung manatiling tapat king oras na ning kapagsubukan. Uling nung magtagumpe ya king kapagsubukan, tanggapan ne ing korona. Iti ya ing bie a pengaku na ning Dios karing malugud keya.

Kapahayagan 21:3

Kabud-abud dimdam ke ing masikan a siwalang ibat king tronu. Ngana, Ngeni, ing tuknangan na ning Dios atyu libutad da ring tau! Manuknangan yang kayabe da ring tau at maging balen na la. Akayabe re ing Dios at ya ing maging Dios da.

Kapahayagan 7:16

E na la dumanup ni kumau kapilan man; e na la mibilad pa king pali ning aldo o mapaltus king isanu mang pali.