Lucas 21:8 - Ing Mayap a Balita Biblia

⁸ Pekibat na, Mingat kayu ban e na kayu alinlang ning ninuman. Uling dakal la ding datang king lagyu ku a sumabing, Aku ing Cristo! at Ing panaun dinatang na! E kayu tutuki karela.

Lucas 21:8 Iomraidhean Croise

Jeremias 29:8

Aku, ing Ginu, ing Dios ning Israel, e yu paintulut ing linlangan da kayu ding propeta a manuknangan kayabe yu o mapirait king ninumang sasabing aula na ing bage mapalyari king daratang a panaun. E yu la dirinan pansin ding paninap a sasalita ra kekayu.

Mateo 24:11

Lunto la kanita ding propetang e tutu at linlangan da la ring dakal a tau.

Mateo 3:2

Nganang menaral: Sumisi kayu at painggulut karing kasalanan yu, uling malapit ne ing Kayarian ning Banua.

Mateo 4:17

Manibat na kanita megumpisa yang menaral i Jesus. Ngana: Sumisi kayu at painggulut karing kasalanan yu uling malapit ne ing Kayarian ning Banua!

Lucas 17:23

Ating sumabi kekayu, Atyu karin! o Atyu keni! Oneng e kayu lulual ban panintunan ye.

Lucas 21:7

Ngarang mengutang kang Jesus, Maestro, kapilan malyari iti? At nanu ing palatandanan king pangatupad na niti?

Lucas 21:9

E kayu pailigalig nung makabalita kayung gera at rebolusyun. Kailangan king mapalyari la pa mu deti, oneng e mangabaldugan king ing kawakasan dinatang na.

Juan 5:43

Dinatang ku king lagyu nang Ibpa ku, oneng e yu ku buring tanggapan. Nung datang ya ing aliwa king sarili nang lagyu, tatanggapan ye.

Juan 8:24

Inya sinabi ku kekayu king mate kayu karing kasalanan yu. Talagang mate kayu karing kasalanan yu, nung e kayu maniwala king Aku pin Ya.

Juan 8:28

Inya sinabi nang Jesus, Potang ikua yu neng tinas ing Anak ning Tau, kanita yu abalu king Aku pin Ya; at king ala kung daraptan king sarili kung upaya nune magsalita ku agpang king tiru na kanaku ning Ibpa.

1 Corinto 6:9

Balu yung masalese king e re malyaring kamtan ding marawak ing Kayarian ning Dios. E yu pipiraitnan ing kekayung sarili! Uling ding taung imoral, ding sasambang idolo, ding makipangalugud, ding makipangatawan king kalupa rang babai o lalaki,

Efeso 5:6

E kayu paipirait kenuman king kapamilatan na ning mangasanting dang amanu, uling king dapat a anti kaniti karin ya mimimua ing Dios karing taung e mamintu keya.

2 Tesalonica 2:3

E kayu pailinlang kenu man king makananu mang paralan. Uling ing Aldo ning Ginu e datang anggang e mapalyari ing tauling Pamag-rebeldi laban king Dios at ing pangalto na ning Marawak, ing makatalaga king alang kawakasan a parusa.

2 Timoteo 3:13

Ding taung marawak at ding magbalatkayu lalu lang maging marawak, maglinlang la, at ila mismu malinlang la.

1 Juan 4:1

Pakamalan kung kakaluguran, e yu la ngan paniwalan ding sasabing atyu karela ing Espiritu. Nune subukan yu la pa mu ban abalu yu nung ibat ya king Dios ing espiritung atyu karela. Uling dakal la ding lunto propetang e tutu king yatu.

2 Juan 1:7

Dakal na la ding mapamirait a dinatang keti king yatu, ding taung e bisang magpatutu king i Jesu-Cristo mikatawan yang tau. Ing taung anti kareta mapaglinlang ya at Kalaban neng Cristo.

Kapahayagan 1:3

Mapalad la ding babasa king librung iti at ding makiramdam king ula a sinabi na at ding mamintu king makasulat! Uling malapit na lang mapalyari deting bage.

Kapahayagan 12:9

Inugse re ing maragul a dragon, ing matuang ubingan a maki lagyung diablo o Satanas, ing maglinlang king mabilug a yatu. Inugse re king yatu at pati na ding kampun na.