Lucas 2:41 - Ing Mayap a Balita Biblia

⁴¹ Balang banua pupunta la Jerusalem ding pengari nang Jesus ban tumagun king Piesta ning Pamaglagpus.

Lucas 2:41 Iomraidhean Croise

Exodo 12:11

Malagua yeng kanan. Miblas kayu para king makabang lakaran, makasulud na la ding sandalyas yu at talnan ye king metung yung gamat ing tukud yu. Iti ing pamagselebra king Pamaglagpus bilang parangal kanaku, ing Ginu.

Exodo 12:14

Sukat yeng pagselebran ing aldong iti bilang piestang parangal king Ginu ban e yu kalinguan ing depatan ku, ing Ginu. Pagselebran ye king kapilan pa man.

Exodo 34:23

Sukat lang makiarap makatatlu kanaku, kilub ning pabanua ding sablang lalaki ban samba kanaku, ing Ginu, ing Dios ning Israel.

Levitico 23:5

Ing Piesta ning Pamaglagpus a magumpisa king sisilim ning kalabing apat a aldo na ning mumunang bulan.

Ding Bilang 28:16

Ing kalabing apat nang aldo ning mumunang bulan ya ing Piesta ning Pamaglagpus a pagselebran bilang pakundangan king Ginu.

Lucas 2:42

Inyang labi neng aduang banua tua i Jesus, mekipamiesta la antimo ing sadia rang daraptan.

Juan 11:55

Malapit na ing Piesta ning Pamaglagpus da ring Judio. Dakal lang taung ibat karing balen at baryu ding minukiat Jerusalem bayu magpiesta ban gampanan da ing seremonia na ning pamaglinis.

Juan 13:1

Bespera na kanita ning Piesta ning Pamaglagpus. Balu nang Jesus king dinatang na ing oras na ban mako ya keti king yatu at mibalik ne king Ibpa. Kaluguran na la ding bandi na a atyu king yatu at liguran na la angga king kawakasan.

Juan 2:13

Malapit na mu ing Piesta ning Pamaglagpus da ring Judio, inya minta ya Jerusalem i Jesus.

Juan 6:4

Malapit na kanita ing Pamaglagpus, ing piesta da ring Judio.

Deuteronomio 12:11

Kanita mamili yang metung a lugal ing Ginung kekayung Dios nung nukarin ye malyaring samban. Karin yu idala ing sablang inutus kung idala yu: ding ain-a-durulukan at ding miyayaliwang ain-sakripisyu; ding kekayung sikapulu, ding kekayung ain, at ding aliwa pang ain a penata yung ibie king Ginu.

Deuteronomio 12:18

Ikayu at ding anak yu ampon ipus at ding Levitang manuknangan king balen yu, malyari yu la mung kanan deti king arapan na ning Ginung kekayung Dios, oneng keta mung lugal a pinili na ning Ginung kekayung Dios. At sukat kayung tumula king Ginung kekayung Dios king sablang depat yu.

Deuteronomio 16:16

Sukat lang makiarap king Ginung kekayung Dios makatatlung besis pabanua ding sablang lalaki. Makiarap la king Dios karin ketang lugal a pilinan na neng Piesta ning Tinape Alang Lebadura, neng Piesta ning Pamamupul at neng Piesta da ring Dalungdung. E la sukat makiarap king Ginu a alang ain a daralan,

1 Samuel 1:21

E ya tinuki i Ana inyang minta ya i Elkana at ing mabilug nang pamilya ban miyain king ain-sakripisyung yayain na balang banua at ban tupad king pangaku na. Ngana king asawa na, Ituki ke ing anak arapan ning Ginu potang miyawat ne, at karin ne manuknangan kabang bie na.

1 Samuel 1:3

Balang banua pupunta ya i Elkana king Silo ban samba at miyain ain-sakripisyu king Ginung Mayupaya. Ding adua nang anak Eli, di Ofni at Fineas, susuyu la karin bilang pari.