Levitico 8:23 - Ing Mayap a Balita Biblia

²³ Pete neng Moises ing tupa at kinangwa yang ditak king daya at kiskas na iti king pingul ning balugbug nang wanan Aaron, king tindaragul na ning gamat nang wanan at king tindaragul ning bitis nang wanan.

Levitico 8:23 Iomraidhean Croise

Exodo 29:20

Paten me ing lalaking tupa at kuma kang ditak king daya na at ikaskas mu karing pingul nang balugbug a wanan Aaron at ding anak na, at karing tindaragul da ring gamat dang wanan ampon karing tindaragul da ring bitis dang wanan. Isabug mu ing mitagan a daya karing apat nang suluk ning altar.

Exodo 29:21

Kuma kang ditak king dayang atyu king altar at ditak king larung paglania. Ipisik mu iti kang Aaron, king imalan na, karing anak nang lalaki, at karing imalan da. Mitalaga ne kanita kanaku i Aaron, ding anak na, at ing imalan da.

Levitico 14:14

Kuma yang ditak ing pari king daya na ning biserung tupang mepate at ikaskas na king pingul nang balugbug a wanan ning taung lilinisan at king tindaragul na ning gamat nang wanan ampon king tindaragul ning bitis nang wanan.

Levitico 14:17

Kaybat na nita, kuma yang ditak ketang larung atyu king palad na at ditak ketang daya ning biserung tupa, at ikaskas na iti king pingul nang balugbug a wanan ning taung lilinisan, antimu rin king tindaragul na ning gamat nang wanan at king tindaragul na ning bitis nang wanan.

Levitico 14:25

Paten ne ing biserung tupa at kuma yang ditak a daya at ikaskas na king pingul nang balugbug a wanan ning tau, at king tindaragul na ning gamat nang wanan ampon king tindaragul na ning bitis nang wanan.

Levitico 14:28

Ikaskas na naman ing ditak a laru ketang pikaskasan na king daya ning biserung tupa king pingul ning balugbug nang wanan ning tau, king tindaragul na ning gamat nang wanan ampon king tindaragul na ning bitis nang wanan.

Levitico 7:37

Ila deti ring tuntunan para karing ain-a-durulukan, karing ain-a-binutil, para karing ain-a-kapamayaran-king-kasalanan, ain-a-kapaglarinan-king-kasalanan, ain-para-king-ordinasyun da ring pari, at karing ain-ning-pamisulusulu.

Roma 12:1

Inya, kapatad ku, king uli na ning maragul nang lunus ning Dios kekatamu, ipakisabi kung mayap kekayu: samban ye king kapamilatan na ning pamiyain yu karing kekayung katawan bilang mabie at banal a ain, tune babie tula king Dios. Iti ya ing tune kapanyamban a kailangan yung iyain keya.

Roma 6:13

ni e yu na pakasangkapan king kasalanan ing isanu mang dake na ning kekayung sarili para magamit king isanu mang e mayap a parasan. Nune sukat yung ibie ing kekayung sarili king Dios bilang taung mete na, oneng mipasublian mie at isuku yung kabilugan keya ing sarili yu ban magamit king pamaniapat king matulid.

Roma 6:19

(Gagamit kung karaniwan a amanu uli na ning katutubu yung keinan.) Kanitang misan sinuku yung lubus ing kekayung sarili king karinatan at kanawangan para king nasa a marok. Ngeni naman sukat yung isukung ganap ing kekayung sarili anting ipus na ning kabanalan.

1 Corinto 1:2

Miparala ya king iglesia ning Dios karin Corinto, karing inaus nang maging banal ning Dios, ing balen a miyabe kang Cristo Jesus kayabe ding sablang tau a mamaus nu karin man king lagyu na ning Ginu tamung Jesu-Cristo, ing Ginu ra at Ginu tamu naman.

1 Corinto 1:30

Oneng inabe na kayu ning Dios kang Cristo Jesus at binie ne kekatamu i Cristo ban maging kabiasnan ta ya; king uli na metanggap tamu king Dios, meging banal na katamung balen at linigtas na katamu.

1 Corinto 6:20

Seli na kayu ning Dios at mal ing binayad na para kekayu. Inya gamitan yu la ding kekayung katawan para king ikaligaya na ning Dios.

Filipos 1:20

Ing maragul kung pagnasan at panenayan ya pin ing e ku sa magkulangan king kanakung katungkulan, nune king sablang penandit, lalung-lalu na king kasalukuyan, mikatmuan ku sanang tetagan a lub ban mirangal ya i Cristo king mabilug kung pangatau, maging king bie ku o king kamatayan ku.

Filipos 2:17

Nung ing daya ku kailangan yang miyabe tumulu king sakripisyung yayain na ning kekayung kasalpantayanan, masaya ku pa mu rin at matula a kayabe yu.

1 Tesalonica 5:22

Dumayu kayu king sablang anyu na ning marawak.

Hebreo 2:10

Matulid king ing Dios a linalang at papanatili king sabla ing gawan neng ganap i Jesus king kapamilatan na ning kasakitan ban adala na la ding dakal nang anak king pamakirake king ligaya na. I Jesus ya ing panibatan na ning karelang kaligtasan.

Hebreo 5:8

Agyamang ya ing Anak ning Dios, mebiasa yang memintu king kapamilatan na ning kasakitan na.