Levitico 10:3 - Ing Mayap a Balita Biblia

³ Nganang migsalitang Moises kang Aaron, Oyan ing amanuan na ning Ginu kanitang sinabi nang Sukat dang kilalanan ding sablang lalapit kanaku king banal ku, at ihayag ku ing kamalan ku arapan da ring tau. Oneng menatili yang e bubulad i Aaron.

Levitico 10:3 Iomraidhean Croise

Genesis 18:25

Mabayat yung daptan ing anti kanyan; e ye paburen mate ing alang kasalanan kayabe na ning ating kasalanan. Pakipante ye wari ing alang kasalanan king ating kasalanan? E sukat mapalyari ing anti kanyan! Gawa ne man waring e matulid ing ukum ning mabilug a yatu?

Job 2:10

Nganang mekibat Job, Makanyan lang magsalita ding babaing mangmang. Nung tatanggapan ta ing tula king Ginu, e ta wari sukat munamang tanggapan ing kalungkutan? Agyamang ketang daralanan nang kasakitan a ita ala yang sinabing laban king Dios i Job.

Ding Dalit 119:120

Uli mu mitatakutan ku; kaku lang pitatakutan ding kayatulan mu.

Ding Dalit 148:14

Ya ing minie sikanan king bansa na, inya sabla nang memalen karela yang purian, ding memalen ning Israel a tutu nang pakamalan. Purian ya ing Ginu!

Ding Dalit 39:10

Pamamarusa mu kaku keka nang ituknang; gamat mu karelang gisan ing kakung sikanan.

Ding Dalit 39:9

E ku bubulad; asbuk ku e biklat, uling balu ku king iti kekang dapat.

Ding Dalit 46:10

Ngana, Tuknang na kong milalaban at kekong kilalanan king aku ing Dios; sakup ko ding bansa pati ing mabilug a yatu.

Ding Dalit 89:7

Metung kang Dios a gagalang da, at pitatakutan king kapulungan ding banal.

Ding Dalit 93:5

O Ginu, ding kekang kautusan ala lang kayangganan; ing kekang tuknangan sidsad ya king kabanalan kapilan man.

Exodo 14:17

Pasiasan ku la lub ding tau Ehipto ban dulung la naman para tagal kekayu, at kaybat mirangal ku king kapamilatan na ning pamagtagumpe ku king ari, karing sundalus na, karing karung panggera na, at karing pakasake kareti.

Exodo 14:4

Pasiasan ke lub at tagalan na kayu, at aku naman tanggap kung dangalan uli na ning pamagtagumpe ku king ari ampon karing sundalus na. Abalu da kanita ding tau Ehipto king aku ing Ginu. Depatan da ring Israelita itang sinabi na karela.

Exodo 19:22

Agyang ding pari a lalapit kanaku sukat lang maglinis king sarili da, nung ali la parusan ku la.

Exodo 19:24

Nganang mekibat ning Ginu, Kuldas na ka at dakitan me i Aaron at ituki keti. Oneng e la sukat lalagpus ding pari at ding tau king angganan ban lumapit la kanaku, nung ali parusan ku la.

Exodo 30:30

Kaybat lanian mia naman kaniti i Aaron at ding anak nang lalaki, at italaga mu la bilang pari a sumuyu kanaku.

Isaias 39:8

Oneng e na aintindian iti ning Aring Hezekia. Bala na king mika kapayapan at kapanatagan king kekaban na ning bie na. Inya ngana, Mayap ing balitang ibat king Ginu a dela mu kanaku.

Isaias 49:3

Ngana kaku, Israel, ika ing kakung talasuyu; uli mu, purian da ku ring tau.

Isaias 52:11

Lakuan yu ne ing Babilonia, ikong karing kasangkapan ning Templo magdala. Karing bawal a bage e kayu tatagin; ingatan yung malinis ing sarili yu at lakuan yu ne ing siudad.

Ezekiel 20:41

Potang kaybat da na kayung alual karing bansa nung nu kayu miyugse at ikua da na kayung atipun makapamisan, tanggapan ku la ding ain-a-durulukan yu at akit da ring miyayaliwang bansa king aku banal ku.

Ezekiel 28:22

Sabian mu karing memalen karin, king aku, ing Ginung Dios, ngakung magsalita karela: Sidon, aku ing kekang kalaban; purian da ku ding tau uli na ning daptan ku keka. Abalu ra king aku ing Ginu potang ipakit ku nung makananu kung banal king kapamilatan na ning pamamarusa ku karetang manuknangan keka.

Ezekiel 38:16

Lusuban me ing balen kung Israel anti ing bigang tatakap king kabilugan a bansa. Potang datang na ing oras a ita, itubud da ka ban lusuban me ing kanakung bansa, ban ipakit ku karing bansa nung ninu aku, ban ipakit ku ing kanakung kabanalan king daptan ku king kapamilatan mu.

Ezekiel 40:46

at ita namang kuartung makayarap king dane norti para kareta yang pari a manibala king altar. Lahi na lang Zadok ding sablang pari. Ila mung bukud karing lahi nang Levi a mipaintulutan makalapit king arapan na ning Ginu ban sumuyu.

Ezekiel 42:13

Ngana kanaku niting lalaki, Parehu lang sagradu deting gusali. Keti da la kakanan ding pari a lulub king arap ning Ginu ding sagradung dake ra king ain. Keti da la naman darala ding pari ding sagradung ain antimo ding ain-a-kapamayaran-king-kasalanan o ain-a-kapaglarinan-king-kasalanan.

Levitico 21:15

ban e la mapintas ding anak na king arapan da ring kabalen na. Aku ing Ginu a mibukud keting tau bilang Pamuntuk da ring Pari.

Levitico 21:17

Sabian mu kang Aaron king ala metung man karing lahi na a maki pinsala king katawan na ing sukat paintulutan miyain ain-a-pamangan arapan ku. Iti metung yang tuntunan a sukat ipatupad king kapilan pa man.

Levitico 21:21

E ya paintulutan sumuyu king altar ing ninuman karing lahi nang Aaron a maki pinsala king katawan na. E ya malyaring miyain ain uli na ning kapinsalan na.

Levitico 21:6

Sukat lang maging banal arapan ku, ing Dios, at e lalapastangan king lagyu ku. Ila ring miyayain ain-a-pamangan kanaku, inya sukat lang maging banal.

Levitico 21:8

Italaga ya king kabanalan ing pari, uling ya ing miyayain king tinape para kanaku, ing Dios. Sukat yang maging banal, uling aku, ing Ginu, ing papagbanal kekayu at banal ku.

Levitico 22:9

Sukat na lang tuparan Aaron at ding anak nang lalaki ding sablang tuntunan a binie ku karela. Mikasala la at mate nung sakaling e ra la tuparan. Aku ing Ginu at ing papagbanal karela.

Levitico 8:35

Manatili kayu tulid na ning pasbul ning Tolda kilub ding pitung aldo at bengi. Iti ya ing utus na ning Ginu. Tuparan yu sa ing utus na ban e kayu mangamate.

Ding Bilang 16:5

Kaybat ngana kang Kora at karing kayabe na, Bukas abak, ipakilala na ning Ginu nung kaninu ya makapanig, nung ninu ing pinili na at nung ninu ing makalapit arap na.

Ding Bilang 20:12

Pengamanuan na la ning Ginu ri Moises at Aaron. Ngana, Uli na ning e kayu lubus menalig kanaku ban ipakilala ing kabanalan ku king akakit da reting tau, e yu na la malyaring panimunan king paglakbe rang palub king gabun a pengaku kung ibie karela.

Mateo 10:37

Ninuman ing lulugud kang tata na o i ima na a maygit kesa kanaku e ya karapatdapat kanaku; ninuman ing lulugud king anak nang babai o lalaki maygit kesa kanaku, e ya karapatdapat kanaku.

Juan 12:28

Ibpa, parangalan me ing lagyu mu. Kanita ing metung a siwalang ibat banua sinabi na, Peparangalan ku ne at parangalan ke pang pasibayu.

Juan 14:13

Ing nanumang aduan yu king lagyu ku daptan ku ban mipaligayan ya ing Ibpa king kapamilatan na ning Anak.

Deuteronomio 32:51

Ing sangkan ya ing parehu kayung e meging tapat kanaku king arapan da ring memalen ning Israel; lepastangan yu ku king daramdaman da karin king danuman na ning Meriba, lele na ning balen ning Kades ning ilang ning Zin.

2 Tesalonica 1:10

Mapalyari iti potang miras na ing Aldo ning paniatang na keti ban tanggapan ing dangalan a ibie da ring pinili na at parangalan na la ding sablang menalig keya. Makakayabe kayu kareti uling tinggap yu ing Mayap a Balita a penaral mi kekayu.

1 Pedro 4:17

Miras na ing aldo para magumpisa na ing pamanukum at ding taung pinili na ning Dios ila ding mumunang diling maukum. Nung kekatamu megumpisa nanu kaya ing maging kararasan da retang taung e maniwala king Mayap a Balitang ibat king Dios?

1 Samuel 2:30

Inya pakiramdaman mu ngeni ing pasabi na keka ning Ginu, ing Dios ning Israel: Kanitang milabas sinabi ku king ing pamilya mu at ing pamilya nang tata mu ilang sumuyu kanaku angga king alang angga, oneng ngeni e na makanyan. Ding parangalan ku ila mu detang parangal kanaku, at e ku la parangalan detang misasakuil kanaku.

1 Samuel 3:18

Kanita sinabi na ngan Samuel ing sinabi na ning Ginu; ala yang linihim kang Eli. Nganang Eli, Ita mung matulid ya ing gawan na ning Ginu.

1 Samuel 6:20

Ngara ding memalen na ning Bet Semes, Ninu ing malyaring marap king Ginu, ing banal a Dios? Nukarin ta ya malyaring padala ing kaban ban milaut ya kekatamu?