Juan 8:44 - Ing Mayap a Balita Biblia

⁴⁴ Ing diablo ya ing tata yu at ing buri nang tata yu ya ing buri yung daptan. Makamate ya manibat na king minuna at kalaban ne ning katutuan uling alang katutuan keya. Neng maglaram ya ing diablo, magsalita ya agpang king sarili nang katutubu, uling malaram ya at ya ing tata na ning kalaraman.

Juan 8:44 Iomraidhean Croise

Genesis 3:15

Mikasama kayu ning babai; milaban la ding anak na at ding anak mu. Lasawan de ring anak na ing buntuk mu, at tuktukan mu no man ding sakung da.

1 Ari 22:22

Kitang ning Ginu, King makananung paralan? Pekibat ning espiritu, Aku ing munta at papagsalitan ku lang kalaraman ding propeta nang Ahab. Inya ngana ning Ginu, Sulung, ika ing munta at magtagumpe ka.

1 Cronica 21:1

Buri nang Satanas ing guluan ne ing Israel, inya inagkat ne i David ban gawang sensus tungkul king bilang da ring memalen.

Job 1:11

Subukan mung idayu ing heganaganang atyu kang Job at siguradung isumpa na ka.

Mateo 12:34

Lahing kamamalu, makananu kayung makapagsalitang mayap ngening e kayu mayap? Uling ing lulual king asbuk na ning tau manibatan ketang makalaman king pusu na.

Mateo 13:15

uling mapurul la isip ding taung deti; sasara da la ring karelang balugbug, at pipiak da la ding karelang mata. Uling e ra la buring manakit ding karelang mata, ing makaramdam la ding balugbug da, ing makaintindi la ding karelang kaisipan, at ing magbalik la lub kaku, pota aku pakayapan ku la, ngana ning Ginu.

Mateo 13:38

Ing marangle ya ing yatu; ing mayap a bining silbag na ila ding tau na ning Kayarian ning Banua, at ing e mayap a dikut ila ding taung sasakupan na ning marawak;

Juan 6:70

Pekibat nang Jesus, E ra kayu wari pinili ikayung labing adua? Makanyan man ing metung kekayu diablo ya!

Juan 7:17

Ninuman ing bisang tupad king kaburian ning Dios, abalu na nung ing kanakung tuturu ibat king Dios o nung aku maniabi ku king sarili kung kayupayan.

Juan 8:38

Sasabian ku ing ikit ku king kanakung Ibpa, oneng daraptan yu ing kekayung dimdam king kekayung tata.

Juan 8:41

Ing daraptan yu kalupa na ning daraptan na ning sarili yung tata. Pekibat da kang Jesus, E ke anak king lual; atin keng metung a tata, ing Dios.

Juan 8:55

Oneng ikayu kapilan man e ye balu, aku balu ke. Nung sabian kung e ke balu maging malaram kung kalupa yu. Oneng balu ke at tutuparan ku ing amanu na.

Ding Dapat 13:10

at ngana, Anak ning diablo! Ika ing kalaban na ning sablang bage mayap; mitmu kang pamaglinlang at kapamiraitnan! Kapilan ka tuknang magliku king dalan nang matulid ning Ginu?

Ding Dapat 24:9

Minagpang la ding Judio kaniti at sinabi ra king tutu ngan iting sabla.

Ding Dapat 5:3

Nganang Pedro, Ananias, baket peintulutan meng mig-ari i Satanas king pusu mu at ituru na kang maglaram king Banal a Espiritu king pamilingad mu karing meging abli na ning kekang pibandian?

2 Corinto 11:3

Oneng mikakunu ku; pota malasun ing kekayung pamisip at mirayu kayu king tapat at malinis a pamanalig kang Cristo, antimo nung makananu neng alinlang ning ubingan i Eva.

1 Pedro 5:8

Parati kayung makasadia at magbante! Uling ing kekayung kalaban, ing diablo, lilibut yang anting leon a mamius, manintun yang alaklak na.

2 Pedro 2:4

E na la penupaya ning Dios ding anghel a mikasala; kilung na la king impierno at panenayan da karin king karalumduman ing Aldo ning Pamanukum.

1 Juan 1:8

Nung sasabian tamung ala tamung kasalanan, pipiraitnan tamu ing kekatamung sarili at ala yu kekatamu ing katutuan.

1 Juan 2:21

Sinulat ku kekayu e uli na ning e yu balu ing katutuan. Balu yu iti at balu yu munaman king alang kalaraman a manibatan king katutuan.

1 Juan 2:4

Ing sasabing Balu ke, oneng e na la pamintuan ding utus na, iti malaram ya at ala yu keya ing katutuan.

1 Juan 3:12

E ta ya sukat pakiapusan i Cain uling tinuki ya king Marawak at pete ne ing kapatad nang i Abel. Obat pete ne? Uling e ya mayap a dapat i Cain; oneng mayap ing dapat ning kapatad na.

1 Juan 3:15

Ing masama king kapatad na, makamate yang tau at balu yu king ing bie alang angga ala yu king makamate tau.

Judas 1:6

E yu la naman kakalinguan ding anghel a e meningat king karelang sariling katungkulan; likuan da ing mayap dang kabilian. Sinukul na la ning Dios deti king kalalaman na ning karalumduman angga king datang ing maragul nang Aldo ning Pamanukum.

Kapahayagan 12:9

Inugse re ing maragul a dragon, ing matuang ubingan a maki lagyung diablo o Satanas, ing maglinlang king mabilug a yatu. Inugse re king yatu at pati na ding kampun na.

Kapahayagan 13:14

Alinlang na la ding tau king yatu uli na ning milagrung depat na arap ning minunang animal a mabagsik. Ayagkat na la ban gawang larawan na ning minunang animal a mabagsik a mesugat king espada at ngeni mayap na.

Kapahayagan 2:10

E ka mitatakutan karing kaligaligan a malapit nang mapalyari keka. Tandanan mu iti: ipasukul na la ning diablo ding mapilan kekayu. Kapagsubukan iti kekayu at magkasakit kayu kilub ding apulung aldo. Manatili kang tapat angga king kamatayan at ibie ke keka ing korona na ning bie.

Kapahayagan 21:8

Oneng makatakut ing miras karing duag, karing taksil, karing magpasasa king e mayap, karing makamate tau, karing makipangalugud, karing mangkukulam, karing sasambang idolo, at karing sablang malaram. Miyugse la king dagat-dagatan na ning api at asupri; ing kaduang kamatayan.

Kapahayagan 22:15

Oneng malakuan la king lual na ning siudad ding sakim, ding mangkukulam, ding makipangalugud, ding makamate tau, ding sasambang dios-diosan, at ding maburi at magsalita king kalaraman.

Kapahayagan 9:11

Ing ari da ya ing anghel a magbante king tutung malalam a bangin; Abadon ing lagyu na king salitang Hebreo, at Apolion king Griego at mangabaldugan Ing Mapanyira.