Juan 21:15 - Ing Mayap a Balita Biblia

¹⁵ Inyang mekapag-almusal na la, kitnan neng Jesus i Simon Pedro. Ngana, Simon, anak nang Juan, kaluguran mu ko maygit kareni? Nganang mekibat Pedro, Wa, Ginu, balu mu king kaluguran da ka! Sinabi nang Jesus, Pakanan mu la ding kanakung biserung tupa.

Juan 21:15 Iomraidhean Croise

Genesis 33:13

Pekibat nang Jacob, Balu mu, kapatad ku, maina la pamikakatawan ding anak at kailangan lang ingatan ding tupa at baka ampon ding biseru dang sususu. Pota mangamate la nung sakaling mipalalu lang lumakad kilub ning patingapun.

2 Samuel 7:20

Nanu pa ing sabian ku keka? Balu mu ku bilang talasuyu mu, O Ginung Dios.

2 Ari 20:3

Ngana, O Ginu, e mu sana kakalinguan king siyuan da kang mitmung katapatan at kalausan a lub, king parati kung magkapilit gawan itang buri mung pagawa kanaku. At menangis yang kapait-paitan.

Isaias 40:11

Anti ing pastul ingatan neng kawan na; ding malating tupa tipunan na la, karing takde na kilikan na la; ding gaindu ra tairan na la king mitmung kaingatan.

Jeremias 23:4

Tuldu kung pamuntuk a manibala karela. E na la pasibayung mitakutan ding taung kanakung pinili o galgal man at e ku na la pasibayung parusan. Aku, ing Ginu, ing migsalita.

Jeremias 3:15

Dinan da kayung pamuntuk a mamintu kanaku at ila panibalan da kayung ating kabiasnan at ating aintindian.

Ezekiel 34:23

Dinan ku lang ari a kalupa na ning talasuyu kung i David ban maging bukud dang pastul at e na la paburen.

Ezekiel 46:24

Ngana niting lalaki kanaku, Ila deti ring kusina nung nukarin ding susuyu king Templo pabukal da la ring ain-sakripisyu a yayain da ring tau.

Mateo 10:37

Ninuman ing lulugud kang tata na o i ima na a maygit kesa kanaku e ya karapatdapat kanaku; ninuman ing lulugud king anak nang babai o lalaki maygit kesa kanaku, e ya karapatdapat kanaku.

Mateo 16:17

Nganang Jesus, Simon, anak nang Juan, mapalad ka! Uling ing sinabi mu e menibatan king tau, nune kang Ibpa kung atyu banua; ya mismu ing pepabalu kaniti keka.

Mateo 18:10

Pangilagan yung e ye insultuan ing metung karing malating deti. Sasabian ku kekayu, ding anghel da karin banua atyu la kapilan man king arapan nang Ibpa kung atyu banua. [

Mateo 26:33

Migsalita ya i Pedro at ngana kang Jesus, Agyang lakuan da ka ding sabla, aku e ra ka lakuan kapilan man!

Mateo 26:35

Nganang tinutul Pedro, Agyang misan da ku paten kayabe mu, kapilan man e ra ka ilingad! At makanyan munaman ing sinabi da ring sablang alagad.

Marcos 14:29

Nganang Pedro, Painggulutan da ka ding sabla, oneng aku e ra ka painggulutan!

Lucas 12:32

E kayu tatakut, malating kawan, uling ikakatula na ning Ibpa yu ing ibie ne kekayu ing Kayarian.

Lucas 22:32

Oneng penalangin da ka king kapilan man e sa lubus milako ing kekang kasalpantayanan. At kabud mibalik ka lub kanaku, pasiknangan mu la ding kekang kapatad.

Juan 1:42

At tiki neng Andres i Simon kang Jesus. Linawe neng Jesus at ngana, Ika i Simon a anak nang Juan. Mayaus kang Cefas. (Ngana wari, Pedro.)

Juan 13:37

Nganang pasibayung kinutang Pedro, Ginu, obat e ku makatuki keka ngeni? Idame ku ing bie ku para keka!

Juan 16:27

uling ing Ibpa mismu kaluguran na kayu. Kaluguran na kayu uling liguran yu ku at meniwala kayung ibat ku king Ibpa.

Juan 21:12

Nganang Jesus karela, Me kayu keni at magalmusal kayu. Oneng ala metung man karela ing mengangas kinutang nung ninu ya uling balu ra king ya ing Ginu.

Juan 21:7

Ngana ning alagad a pakamalan nang Jesus kang Pedro, Ya ing Ginu! Panamdam nang Simon Pedro king ya pala ing Ginu, sinulud na ing imalan na (uling lubas ya) at linuksu ya king danum.

Juan 8:42

Nganang Jesus karela, Nung ing Dios ya ing kekayung Tata, sukat ing luguran yu ku uling dinatang kung menibat king Dios. E ku dinatang king sarili kung kaburian, nune ya ing mitubud kanaku.

Ding Dapat 20:28

Ingatan yu sa ing kekayung sarili at ing mabilug a kawan a binili na ning Banal a Espiritu king kekayung kapanibalan. Pastulan ye sa ing iglesia na ning Dios a pemuhunan na king mismung daya na ning Anak na.

Ding Dapat 20:29

Balu ku king kalako ku, datang la kekayu ding mabangis a asung-gubat, at e re patawaran ditak mu man ing kawan.

Roma 14:1

Tanggapan ye ing ninumang taung maina king kasalpantayanan. E kayu makiargu keya tungkul king sarili nang kaisipan.

Roma 15:1

Itamung masikan a kasalpantayanan kailangan ta lang saupan mamusan ding maina king karelang pupusanan. Aliwa ing sarili tamu ing kekatamung paligayan.

1 Corinto 8:11

Inya iting taung maina konsiensia, ing kapatad yu a meging sangkan na ning pangamate nang Cristo, mikasala ya uli na ning kekang kabiasnan!

Galacia 5:6

Uling potang makayabe tamu kang Cristo Jesus, mesirkunsisyun ka man o ali, parehu mu; ing maulaga ya ing kasalpantayanan a darapat king kapamilatan na ning lugud.

Efeso 4:14

E ta na kanita anak a mangalati a balamu bangkang sapul-sapulan na ning angin, at pitange-tange ning alun ampon ning maling turu da ring taung mapaglinlang. E ta na mapirait karing taung ating kapagnasan a inabu da katamu king e ustu.

Efeso 6:24

Ing grasya na ning Dios manatili sa kekayung sablang lulugud alang kupas king Ginu tamung Jesu-Cristo.

Hebreo 13:20

Ing Dios a panibatan na ning sablang kapayapan ya ing pepasubling mebie kang Jesus a Ginu tamu, ing Marangal a Pastul da ring tupa; uli na ning daya na a meging katibayan na ning alang anggang kasunduan.

Hebreo 4:13

Ala kang asalikut nanuman king Dios. Ing sablang melalang makabuklat at makalantad king panimanman na at king Dios tamu munie kwenta tungkul king kekatamung sarili.

1 Pedro 1:8

Kaluguran ye agyamang e ye pa ikit. Paniwalan ye agyamang king kasalukuyan e ye akakit. Inya mipaligayan kayu king maragul a tula a e na alarawan ning amanu na ning tau.

1 Pedro 2:2

Mangari kayu sa karing bingut a parating magnasa king purung gatas a espiritual ban king pamaninum yu king anti kaniting gatas dagul kayu at miligtas.

1 Pedro 2:25

Mengari kayung tupang melili; oneng ngeni migbalik na kayu king Pastul at Talaingat da ring kekayung kaladua.

1 Juan 4:19

Lulugud tamu uling minuna na katamung liguran ning Dios.

1 Juan 5:1

Anak ne ning Dios ing ninumang maniwala king i Jesus ya ing Cristo, at ing ninumang lulugud king tata lulugud ya naman king anak na.

Kapahayagan 2:23

Paten ku la naman ding anak na ban kanita abalu da ring sablang iglesia king aku ing susuri king pusu at isip da ring tau. Ablasan ke ing balang metung kekayu ketang depat yu.