Joel 1:9 - Ing Mayap a Balita Biblia

⁹ Ala nang binutil ni alak man ban king Templo ibie; ding pari malungkut la uling ain king Ginu ala lang adala.

Joel 1:9 Iomraidhean Croise

2 Cronica 13:10

Oneng ikami suyuan mi ya rin ing Ginung kekaming Dios at kapilan man e mi ya gulutan. Alang aliwang pari para kekami subali mu ding paring ibat king lahi nang Aaron at ding kasaup dang Levita.

Exodo 28:1

Payaus me ing kapatad mung i Aaron at ding anak nang lalaki, i Nadab, Abihu, i Eleazar, at i Itamar. Ikalilua mu la karing memalen na ning Israel ban sumuyu la kanaku bilang pari.

Isaias 61:6

Makilala kayung pari ning Ginu, talasuyu ning Dios tamu. Tamasan yu ing pibandian da ring bansa, at ipagmaragul yu king iti kekong bandi.

Ding Tagulele 1:16

Iti yang sangkan nung inya tutulu ing lua ku. Ala metung mang makirame kaku alang makaibie sikanan lub kaku. Simbut na ku ning kalaban; ding kakung memalen ala nang mitagan.

Ding Tagulele 1:4

Ala metung mang daratang ngeni king Templo ban samba karing mituldung banal a aldo. Manamdaman la ngeni ding babaing karin magkanta, at ding pari saingsing ing karelang panalangin. Ala nang tau karing pasbul dalan ning siudad, at ing Zion mibili ya king kalungkutan.

Hosea 9:4

Karing aliwang bansang deta e la malyaring makaibie alak a ain o makapagdalang ain para king Ginu. Mirinatan la ding sablang mangan king pamangan da a antimo ing pamangan neng ating mete. Magamit mu para uluan ing danup da; ala lang adala kaniti antimong ain king Templo ning Ginu.

Joel 1:13

Ikong pari king altar susuyu, magaspang a imalan ing isulud yu at kumiak kayu! Templo kekayu yang luban ban karin manangis kabukas! Alang binutil ni alak man ban king kekong Dios iyampang.

Joel 1:16

Ala tamung akarapat kabang kekatamung lalawan ing mesirang pupul. Ala nang tulang mayayakit kilub ning Templo ning kekatamung Dios.

Joel 2:14

Siguru ing Ginung kekong Dios mikaduan ya lub, at kayabe ning dakal a pupul ing bendisyun na kekayu ibie na. Kanita iyain yu king Ginu alak ampon binutil.

Joel 2:17

Ding pari king Ginu susuyu pilatan ning altar, at ning pasbul ning Templo, paburen lang tumangis at manalangin: Ginu, malunus ka king kekang balen, e mu paintulut ing insultuan da kami at kaylian ding aliwang bansa king kapamilatan ning karelang pamagsalita: Nu ya karin ing kekong Dios?