Jeremias 7:4 - Ing Mayap a Balita Biblia

⁴ Tuknang na kayung manalig kareting amanung mapaglinlang: Panatag kami bili keti! Iti ya ing Templo ning Ginu, iti ya ing Templo ning Ginu, iti ya ing Templo ning Ginu!

Jeremias 7:4 Iomraidhean Croise

1 Ari 9:7

kanita itabi ku la ding memalen kung Israelita keting gabun a binie ku karela; paburen ke ing Templong telaga ku king lagyu ku, at maging kasebian ya ampon pikaylian ing Israel karing sablang tau ning yatu.

Isaias 48:2

At makanyan man pagmaragul yung sasabian king memalen na kayu ning siudad a banal, at king asahan ye ing Dios ning Israel Ginung Mayupaya ing lagyu na.

Isaias 59:4

Ala na kayu king matulid, makanyan man pupunta kayu pa mu rin king husgadu. Manalig kayu king kalaraman ba yeng apapaniambutan ing kasu yu. Gagampanan yu ing tingka yung makapanasakit karing aliwa.

Isaias 66:1

Ngana ning Ginu, Ing banua ya ing kanakung tronu at ing yatu ya ing talpakan ding bitis ku. Uli na niti, nanung klasing bale ing italakad yu para kanaku? Nanu yang uring lugal ing panuknanganan ku?

Jeremias 28:15

Sinabi ku iti kang Hananias at ngaku pa: Hananias, makiramdam ka! E na ka tinubud ning Ginu at papaniwalan mu la deting tau king e katutuan.

Jeremias 29:23

Yan ing mapalyari karela uling dinapat lang pamikasala; mekipangalugud la at migsalitang kalaraman king kapamilatan na ning lagyu ning Ginu. Laban iti king kaburian na ning Ginu; balu na ing depat da at testigu ya laban karela. Ing Ginu ya ing migsalita.

Jeremias 29:31

king iparala ke ing mensahi karing sablang bihag king Babilonia tungkul kang Semaia. Ngana: Aku, ing Ginu, parusan ke i Semaia at ding sablang lahi na. E ke tinubud; makanyan man migsalita ya kekayung balamu mo wari metung yang propeta at pepaniwalan na kayu king e katutuan. E ya mikayanak libutad yu.

Jeremias 6:14

Bagya mu nung uluan da la ring taung kanakung pinili; lalawan da lang alang kabaldugan ding sugat da. Ngarang sasabi, Masalese na ing sabla ngening e naman masalese.

Jeremias 7:14

Inya naman, daptan ku keting Templo ku a panaligan yu itang depat ku king Silo. Daptan ku naman keting lugal a iti a binie ku karing makatua yu at kekayu ing depat ku king Silo.

Ezekiel 13:19

Lalako yu ku dangalan king arapan da ring mismung memalen ku ban manikua kayung mapilan a kasakmal a sebada at mapilan a pirasung tinape. Pamaten yu la ding taung e mangaintulid kamatayan at lilingapan ding taung e naman mangaintulid mie. Inya magsalita kayung kalaraman karing memalen ku at maniwala no man kekayu.

Mikeas 3:11

Manungkulan la ding manimuna ning siudad para mu king suhul, babie lang palino ding pari tungkul king Kautusan uli na ning salapi; pabayad la naman ding propeta king pamanula ra at sasabian da ngan king atyu karela ing Ginu. Ngara, E ya wari atyu libutad tamu ing Gino? Inya alang e mayap a dugpa kekatamu.

Zepania 3:11

King panaun a ita, O balen ku, e na kailangan ing pikarine yu ing pamag-rebeldi yu kanaku. Ilako ke ing ninumang magmatas at magpalalu at kapilan man e na kayu pasibayung magrebelding laban kanaku king banal kung bunduk-bundukan.

Lucas 3:8

Daptan yu la detang bage a pakilala king sinisi na kayu at ginulut karing kekayung kasalanan. At e yu pangangas sasabian king i Abraham ya ing kekayung makatua. Sasabian ku kekayu king agyang karing batung deni ing Dios makapalto yang lahi nang Abraham!