Jeremias 4:2 - Ing Mayap a Balita Biblia

² maging matulid at ustu para kekayu ing sumpa kayu king kapamilatan na ning lagyu ku. Ding sablang bansa kanita aduan da kanaku ing bendisyunan ku la at ila purian da ku.

Jeremias 4:2 Iomraidhean Croise

Genesis 22:18

Mibendisyunan la karing lahi mu ding heganaganang bansa keti king yatu. Matupad iti uli na ning pemintuan mu ku.

1 Ari 3:6

Pekibat nang Solomon, Pepakit kayung maragul at alang kupas a lugud king talasuyu yung i David a tata ku, uling menatili yang tapat kekayu, makatuliran, at malinis a pusu. At pepanatilian yu naman kang tata ku iting maragul at alang kupas yung lugud, at dininan ye pang metung a anak a menalili king tronu na.

Ding Dalit 72:17

E ya sa makalinguan ing lagyu na kapilan man, at manatili ing kabantugan na kalupa na ning aldo. Mananu na sanang ding bansa aduan da ing bendisyunan na ning Dios anti ing gewa na king ari.

Ding Dalit 99:4

Mayupayang Ari, ing matulid yang kekang kaluguran; king Israel tinatag mu ing katuliran; at binie mung katuliran at alang pamangabiran.

Isaias 45:23

Katutuan ing pengaku ku at iti e mibayu. Ing kakung pengaku taimtim kung tuparan. Ing balang metung lumapit ya at duku arapan ku, at isumpa nang maging tapat ya kaku.

Isaias 45:25

Aku, ing Ginu, kaku lang iligtas ding sablang lahi nang Israel, at kaybat aku ing purian da.

Isaias 65:16

Ing ninuman king bansa a maniawad bendisyun, aduan na king mabendisyun ya king Dios a tapat. Ing ninumang sumpa, sumpa ya king lagyu na ning Dios a tapat. Mawala na la at makalinguan ding kaligaligan king milabas.

Jeremias 10:10

Oneng ika, Ginu, ing tune Dios, ika ing mabie Dios at alang anggang ari. Gagalgal ya ing yatu potang mimua ka; e ra apibata ding bansa ing kekang mua. (

Jeremias 12:15

Oneng lunusan ku la kaybat ku lang leko; ibalik ku la ding balang bansa king mismung bansang tuknangan da.

Jeremias 12:16

Nung tanggapan de king mabilug dang pusu ing relihiun da ring taung kanakung pinili at nung isumpa ra, Ing Ginu mabie ya antimo nung makananu da lang pepasumpan kang Baal ding taung kanakung pinili. Maging dake na la kanita ning balen a kanakung pinili at mipala la.

Jeremias 16:19

Ginu, ika ing mimingat at babie sikanan kanaku; sasaupan mu ku king oras ning kaligaligan. Datang la keka ding bansang ibat karing miyayaliwang suluk na ning yatu at sabian da, Ala lang pibandian ding makatua mi nune mu ding dios a e tutu; ala nune mu ding alang silbing idolo.

Jeremias 3:17

Potang datang na ing oras a ita, mayaus yang Ing Tronu ning Ginu ing Jerusalem at mitipun la karin ding sablang bansa ban samban da ku. E ra na panusigan ing buri da ring masias at e mayap dang pusu.

Jeremias 33:9

Ing Jerusalem ya ing panibatan na ning tula, dangalan, at kapurian para kanaku, at mitakutan la ding balang bansa ning yatu, at galgal la potang damdaman da la ring mayap a bage a daptan ku para karing memalen na ning Jerusalem, at ibie ku ing pangapala keting siudad.

Jeremias 5:2

Agyang sasabian yung sasamban ye ing Ginu, e naman laus king lub yu ing kekong amanu.

Jeremias 7:5

Alilan yu ing paralan na ning pamibiebie yu at ding bage pamaniaptan yu. Parehu sa ing lawe yu king metung at metung.

Jeremias 9:24

Nung ing ninuman bisa yang magmayabang, ing sukat nang pagmayabang ya ing keyang beluan at aintindian tungkul kaku, uling ing lugud ku e kukupas at ing mayap at matulid ya ing kakung daraptan. Ila deti ring bage a makaibie tula kaku. Aku, ing Ginu, ing migsalita.

Hosea 2:19

Israel, gawan da kang asawa ku, gawan ku ing matulid at ustu; pakitanan da kang lugud a e kukupas, pakitanan da kang lunus a alang kayangganan, at maging kaku ka kapilan man.

Joel 2:12

Oneng agyang ngeni, ngana ning Ginu, sumisi kayu at magbalik lub kaku king mabilug yung pusu, at kayabe ning pamag-ayunu, kiak kayu ampon lungkut.

Zacarias 8:8

at ibalik ku lang pasibayu ibat king aslagan at ibat king albugan ban manuknangan la king Jerusalem. Ila ding maging balen ku, at aku ing maging karelang Dios a manibala karela king mitmung katapatan ampon katuliran.

Malakias 1:11

Gagalangan da ku ring tau manibat king metung nang suluk ning yatu angga na king sumangid na. Nu man karin duruluk lang insenso para kanaku at miyayain lang karampatan a ain-sakripisyu. Gagalangan da ku ngan!

1 Corinto 1:31

Inya, antimo ing sasabian na ning kasulatan, Ing ninumang bisang magmaragul, sukat nang ipagmaragul ing depat na ning Ginu.

2 Corinto 10:17

Antimo ing sasabian na ning kasulatan, Nung bisa yang magmaragul ing ninuman, ing depat na ning Dios ya ing kailangan nang ipagmaragul.

Galacia 3:8

Kanita pa pepakit na na ning kasulatan king ding paganu kilalanan na lang taung matulid ning Dios king kapamilatan na ning kasalpantayanan. Inya ing kasulatan penaral na nang makapauna ing Mayap a Balita kang Abraham inyang nganang sinabi, King kapamilatan mu bendisyunan na la ning Dios ding sablang tau keti king yatu.

Deuteronomio 10:20

Pitakutan ye at galangan ing Ginung kekayung Dios; suyuan ye at maging tapat kayu king Dios. Bukud mung king lagyu na karin kayu gawang kapangakuan.

Deuteronomio 4:30

Potang mibili kayu king kaligaligan at potang mapalyari na la ngan deting bage karing aldo datang, mibalik kayu king Ginung kekayung Dios at mamintu kayu king Dios.

Deuteronomio 6:13

Sukat kayung tumakut at gumalang king Ginung kekayung Dios at suyuan ye. Bukud mung king lagyu na karin kayu mangaku.

Filipos 3:3

Ganakan yu king aliwa ila, nune itamu ding tune mesirkunsisyun uling sasamban ta ya ing Dios agpang king Espiritu na, at miyayatdanan tamung tula king bie tamung makayabe kang Cristo Jesus. E tamu kailangan ing magtiwala king seremonia na ning pamaniugat king katawan.

Ruth 3:13

Keti na ka pa at bukas abak a maranun lawan ta nung interesadu yang kuanan na kang pakibatan. Nung e ya bisa, susumpa ku king Dios a mabie king aku ing tupad king tungkulan. Sige, matudtud na ka.

1 Samuel 20:3

Oneng pekibat nang David, Balu nang tata mu ing mikaluguran kata. Inari na king lub na ing e na pabalu iti keka uling ikalungkut mu. Oneng ing tutu na niti, saksi ya ing Ginu at saksi ka naman, king makatibi ku king kamatayan.