Jeremias 4:1 - Ing Mayap a Balita Biblia

¹ Ngana ning Ginu, Memalen ning Israel, nung bisa kayung magbalik, sukat ing mibalik kayu kanaku. Nung ilako yu la ding idolong kasaman ku at nung maging tapat kayu kanaku,

Jeremias 4:1 Iomraidhean Croise

Genesis 35:2

Inya nganang Jacob karing katubale na at karing kayabe na, Iyugse yu na la ring kikilalanan yung dios a atyu keti kayabe yu. Linisan yu ing sarili yu at miblas kayu.

2 Ari 23:13

Pepalasak na la naman ding altar a atyu king aslagan ning Jerusalem, dane mauli ning Bunduk da ring Olibo. Pepagawa na la deti ning Aring Solomon para king pamanyamba karing makasumaming idolo na ning diosang i Astarte ning Sidon, para kang Kemos, ing kikilalanan nang dios ning Moab, at para kang Molek, ing kikilalanan nang dios ning Ammon.

2 Ari 23:24

Ing metung pang gewa nang Josias ya ing pepalako na la ding espiritista, ding mamamanula, ding bage kikilalanan dang dios, at ing heganaganang dapat a makasumami king Juda at Jerusalem. Gewa na ita bilang pamanupad karing kautusan a mababasa king librung ikit nang Hilkia, ing Pekapun ding Pari, king Templo ning Ginu.

2 Cronica 15:8

Mesikan ya lub i Asa inyang dimdam na ing mesabing ula nang Azaria a anak nang Oded. Pepalako na la ding makasumaming idolo king mabilug a Juda at Benjamin at karing siudad a abihag na karin king bulubundukan na ning Efraim. Pepalarin nia naman ing altar na ning Ginu a mitalakad king patyu ning Templo ning Ginu.

2 Cronica 33:8

At nung tapat da lang pamintuan ding utus ku at ding tuntunan a binie ku karela king kapamilatan nang Moises, e ku na la palakuan king bansa a pepamana ku karing karelang makatua.

2 Cronica 34:33

Deyu na la ngan Josias king mabilug a Israel ding sablang bage makasumami king Dios. Inutus na karing sablang atyu Israel ing sumuyu la king Ginung karelang Dios, ing Dios da ring makatua da. At memintu la ding memalen king kekaban ning bie nang Josias.

Isaias 31:6

Ngana ning Dios, Memalen ning Israel, mikasala kayu kanaku at lebanan yu ku. Oneng ngeni, magbalik kayu kanaku!

Jeremias 15:19

Inya nganang mekibat kanaku ning Ginu, Tanggapan da ka nung magbalik ka at pasibayu kang maging talasuyu ku. Nung magsalita ka karing bage makabaldugan, lugal king magsalita ka ketang alang kabaldugan, kanita pasibayu kang maging kanakung propeta. Magbalik la keka ding tau at e na kailangan pa ing lumapit ka karela.

Jeremias 15:4

Mangatakutan la karela ding sablang tau keti king yatu uli na ning depat nang Manase, ing anak nang Hezekia, king Jerusalem kanitang ya ing ari na ning Juda.

Jeremias 18:11

Inya ngeni, sabian mu karing memalen na ning Juda at Jerusalem king gagawa kung planu laban karela at magsadia na ku ban parusan ku la. Sabian mu karela king tuknang na lang mabibie king pamikasala, king sukat na lang magbayung bie.

Jeremias 24:9

Iparala ku karela ing kasiran a maging pitatakutan da ring sablang bansa na ning yatu. Maging pikaylian da la ring tau, pituya-tuya da la, insultuan da la, at gamitan da la ring lagyu ra anting sumpa king balang lugal nung nu ku la iyugse.

Jeremias 25:5

Sinabi da kekayu king lakuan yu na ing e mayap yung pamibiebie, at tuknang nang darapat karing e ustung bage ban manatili kayung mangabiayan king bansang binie na ning Ginu kekayu at karing makatua yu bilang kekayung pibandian king kapilan pa man.

Jeremias 3:1

Ngana ning Ginu, Nung idiborsyu ne ning lalaki ing asawa na, at ing babai naman kawanian ne at maging asawa ne ning aliwang lalaki, e na ne akuang pasibayu ning minuna nang asawa. Lubus neng minie dinat king bansang ita. Oneng ika, Israel, karakal mu kelaguyo at ngeni bisa kang magbalik kanako!

Jeremias 3:12

Inutus na kung munta kang Israel ban sabian ku, Taksil a Israel, magbalik na ka kanaku. Biasa kung lumunus at e na ku mua; e kabang kaba ing mua ku keka.

Jeremias 3:14

Taksil a memalen, magbalik kayu; aku ing makibandi kekayu. Kuma kung metung kekayu king balang balen at kuma kung tidua katau king balang tribu, kaybat ibalik da kayu king Bunduk ning Zion.

Jeremias 3:22

Magbalik na kayu, ikong sablang ginulut king Ginu; pakayapan na kayu at gawan na kayung tune tapat. Sasabian yu, Wa, lumapit na kami king Ginu uling ya ing kekaming Dios.

Jeremias 35:15

Sindu ku ing pamitubud karing talasuyu kung propeta, at sinabi da kekayu king patugut na kayung darapat e mayap at dapat king matulid. Belan da kayu king e kayu sasamba ni susuyu karing aliwang dios ban makapanatili kayung manuknangan king bansa a binie ku kekayu at karing makatua yu. Oneng e yu ku buring pakiramdaman ni babie man pansin kanaku.

Jeremias 36:3

Magkang gumulut la ding memalen na ning Juda king e ustung pamibiebie potang damdaman da ing sablang kasiran a buri kung iparala karela. Kanita patawaran ku ing depat dang e ustu at ing kasalanan da.

Jeremias 4:4

Ikayung memalen ning Juda at Jerusalem, tuparan ye ing kasunduan a gewa yung kayabe ku, ing kekayung Ginu, at italaga yu ing kekayung sarili kanaku. Nung ali, mikalabkab anting api ing mua ku uli da ring e mayap a bage depatan yu. Manduluk ya at metung man alang makapatda kaniti.

Jeremias 7:3

Ya iti: Alilan yu ing paralan na ning pamibiebie yu at ding bage pamaniaptan yu ban paintulut ku ing pamanatili yung manuknangan keti.

Jeremias 7:5

Alilan yu ing paralan na ning pamibiebie yu at ding bage pamaniaptan yu. Parehu sa ing lawe yu king metung at metung.

Jeremias 7:7

Nung magbayu kayu, paintulut ku kanita ing pamanatili yung manuknangan keting bansang binie ku karing kekayung makatua bilang pibandian yu king kapilan pa man.

Ezekiel 11:18

Potang magbalik na la, kailangan da lang ilako ding sablang marinat at makasumaming idolong karelang dasnan.

Ezekiel 18:13

at kakua yang patubu neng paparam na la ding salapi na. Mie ya kaya? Ali ya! Depat na la ngan deting makasumaming bage, inya mate ya. Ya ing maki kasalanan king kamatayan na.

Ezekiel 43:9

Inya ngeni sukat na lang tuknang sasamba karing idolo at ilako ding bangke da ring karelang ari. At aku naman manuknangan kung kayabe ra king kapilan pa man.

Hosea 14:1

Magbalik na kayu king Ginung kekayung Dios, O memalen ning Israel. Ing kekayung kasalanan ya ing pepasari king kekayung pangabagsak.

Hosea 2:2

Anak ku, pakisabian yeng mayap i ima yu, agyang e ku ne asawa at aku naman e na na ku asawa. Pakisabian yeng mayap king tuknang ne sanang magtaksil at e na na pamisali pa ing katawan na.

Hosea 7:16

Pilit lang gugulut kanaku at lalapit karing kikilalanan dang dios a alang arapat para karela. E mu la apagkatiwalan antimo ing pana a e ustu pangabaluktut. Takman da ing mabagsik a kamatayan uling palalu lang magsalita ding karelang manimuna. At ding tau Ehipto kaylian da la uli na ning mapalyari karela.

Joel 2:12

Oneng agyang ngeni, ngana ning Ginu, sumisi kayu at magbalik lub kaku king mabilug yung pusu, at kayabe ning pamag-ayunu, kiak kayu ampon lungkut.

Zacarias 1:4

E kayu sana mangari karing kekayung makatua. Kanitang panaun a milabas, mipayabut karela ing kanakung mensahi king kapamilatan da ring propeta. Sinabi da reti karela king lakuan da na sa ing e mayap dang pamibiebie at gumulut na la king e ustung dapat. Oneng e la mekiramdam ni memintu kanaku.

Deuteronomio 27:15

Isumpa ya ing ninumang gagawang larawan o idolo, ing bage a makasumami king Ginu, at kaybat tatalakad ne king makasalikut a lugal. At ding sablang tau makibat la, Amen!

Deuteronomio 4:30

Potang mibili kayu king kaligaligan at potang mapalyari na la ngan deting bage karing aldo datang, mibalik kayu king Ginung kekayung Dios at mamintu kayu king Dios.

Josue 24:14

Inya ngeni, nganang Josue, galangan ye ing Ginu, at suyuan king mitmung kataimtiman at katapatan. Ilako yu la ding aliwang dios a simban da ring makatua yu karin Mesopotamia at Ehipto, at ing bukud mung suyuan yu ya ing Ginu.

Ukum 10:16

Inya leko da la ring kikilalanan dang dios da ring aliwang bansa at simban de ing Ginu; at melunus ya king kabilian ning Israel.

1 Samuel 7:3

Nganang Samuel karing memalen na ning Israel, Nung talagang bisa kayung magbalik king Ginu king mabilug yung pusu, sukat yu lang ilako ding dios a dayuan at pati na i Astarte. Italaga yu ing sarili yu king Ginu at ya mung bukud ing suyuan yu. Kanita iligtas na kayu karing Filisteo.