Genesis 24:12 - Ing Mayap a Balita Biblia

¹² Menalangin ya ing ipus. Ngana, O Ginu a Dios ning panginuan kung i Abraham, paintulut yu sanang magtagumpe ing lakad ku at pakit yung kaluguran ye ing panginuan kung i Abraham.

Genesis 24:12 Iomraidhean Croise

Genesis 15:1

Kaybat na nita, dimdam neng migsalitang Abram ing Ginu king kapamilatan na ning metung a vision. Ngana, E ka tatakut Abram! Aku ing kekang kambilan at maragul ing galal a ibie ku keka.

Genesis 24:21

King mitmung katahimikan pagugumasdan ne ning ipus i Rebeca ban abalu na nung pepagtagumpen ne ning Ginu ing lakad na o ali ne.

Genesis 24:27

at ngana, Purian ya ing Ginu, ing Dios nang Abraham a panginuan ku. E na kelinguan ing pangaku na nune tiparan na. Tinaid na ku at selangi ning Ginu king bale da ring kamaganak na ning panginuan ku.

Genesis 24:42

Karas ku ngening aldong iti king talaga, menalangin ku. Ngaku, O Ginu, Dios ning panginuan kung i Abraham, paintulut yu sanang magtagumpe ining lakad ku!

Genesis 24:48

Kaybat migsakab ku king gabun at sinamba king Ginu. Pinuri ke ing Ginu, ing Dios ning panginuan kung i Abraham. Tiru ne ing puntalan ku angga king atagpuan ke ing anak na ning kapatad ning panginuan ku a maging asawa ning anak na.

Genesis 26:24

Pepakit ya kang Isaac ing Ginu ketang benging ita. Ngana, Aku ing Dios nang Abraham a tata mu; e ka mitatakutan; kayabe mu ku. Bendisyunan da ka at kaku lang parakalan ding lahi mu uli nang Abraham a kakung talasuyu.

Genesis 27:10

Kaybat idala me kang tata mu ba neng kanan. Kanita abendisyunan na ka bayu ya mate.

Genesis 27:20

Oneng kitang nang Isaac, Kalagua mu namang mekarakap king pamitan ko? Sinaupan na ku ning Ginung kekayung Dios, nganang mekibat Jacob.

Genesis 28:13

Atyu ing Ginu makatalakad siping na. Ngana, Aku, ing Ginu, ing Dios ning pipumpunan mung i Abraham at Dios nang Isaac. Ibie ke keka ing gabun a pagkeran mu at pati na karing kekang maging lahi.

Genesis 31:42

Nung e na ku mu inantabayanan ning Dios ding makatua ku, ing Dios nang Abraham at itang Dios a pitakutan nang Isaac, pepalakuan yu ku sanang alang daralan. Pero ikit na ning Dios ing makalunus kung kabilian at ing kanakung kapagalan, at nabengi ya na ing minie kayatulan.

Genesis 32:10

E ku karapatdapat king heganaganang binie yu at katapatan yu kanaku. Lipatan ke ing Ilug ning Jordan agyamang tukud ya mu kabud ing darala ku. Ngeni, king pamagbalik ku adua lang grupu ding kayabe ku.

Genesis 32:9

Kanita nganang menalangin Jacob, O Dios nang Abraham, Dios nang Isaac a tata ku! Sinabi yu kanaku, Ginu, king mibalik na ku king balen kung tibuan at e yu ku paburen!

Genesis 43:14

Mananu na sanang paratangan ne lunus kekayu ning Dios a Mayupaya ing taung ita ban paintulutan na lang mibalik kayabe yu ding kapatad yung i Simeon at Benjamin. Nung e na la mibalik ding anak ku, makasadia kung tanggapan iti.

1 Ari 18:36

Inyang miras ing oras ning pamiyain king ain, linapit ya i propeta Elias king altar at ngana, O Ginung Dios nang Abraham, Isaac, at Israel, patunayan mu ngening aldong iti king ika ing Dios king Israel, at king aku ing kekang talasuyu, at king depatan ku ngan iti uling iti utus mu.

2 Ari 2:14

Pispas na ing danum king balabal nang Elias at agnan nang sinabi, Nukarin ya ing Ginu, ing Dios nang Elias? Pasibayu nang pispas ing danum, at mepitna king misusumangid ing danum, at dinalakit ya king kangatba.

Nehemias 1:11

O Ginu, pakiramdaman mu sana ing panalangin ku at ing panalangin da ring aliwang talasuyu mu a bisang munie parangal keka. Papagtagumpen mu sana ngeni ing lakad ku at malunus ya sa kanaku ing ari. Kanitang panaun a ita aku ing talaingat king kopa nang alak ning ari.

Nehemias 2:4

Ngana ning ari, Atin kang buring aduan kanako? Menalangin ku king Dios ning Banua,

Ding Dalit 118:25

Iligtas mu kami sana, O Ginu, iligtas mu kami! Papagtagumpen mu ing sablang lakad mi!

Ding Dalit 122:6

Ipanalangin ye ing kapayapan ning Jerusalem king Ginu. Minawa la sana detang malugud keka!

Ding Dalit 127:1

Nung aliwa ing Ginu ing mitalakad king bale, alang ulaga ing gewa da ring manalakad-bale. Nung ing Ginu e ne ingatan ing siudad, alang kabaldugan ing pamagbante da ring guardia.

Ding Dalit 37:5

Pagkatiwala mu ing bie mu king Ginu; manalig ka king Ginu, at saupan na ka.

Exodo 3:15

Sabian mu karing memalen ning Israel king aku, ing Ginu, ing Dios ding makatua da, ing Dios nang Abraham, Isaac, at Jacob ya ing mitubud keka karela. Iti ing lagyu ku king kapilan pa man; iti ya ing yaus dang lagyu kanaku ding sablang lahi king kapilan pa man.

Exodo 3:6

Aku ing Dios ding makatua mu, ing Dios nang Abraham, Isaac, at Jacob. Tikpan neng Moises ing lupa na uling tatakut neng lawan ing Dios.

Ding Kasebian 3:6

E me kakalinguan ing Ginu king sablang kekang daraptan at pakit ne keka ing ustung dalan a kekang tuntunan.

Mateo 22:32

Aku ing Dios nang Abraham, ing Dios nang Isaac, at ing Dios nang Jacob. Buri nang sabian niti king e re Dios ding mete nune Dios de ring mabie.

Filipos 4:6

E kayu paibalisa lub, nune king sabla yung pamanalangin aduan yu king Dios ing kekayung kailangan, at king pamaniawad yu e yu kakalinguan pasalamat keya.