Genesis 19:9 - Ing Mayap a Balita Biblia

⁹ Oneng pekibat da kang Lot, Mako na ka kian! Ing taung iti, ngarang meninsultu, mekipanuknangan ya mu keti at saka mo ngeni manutus ya! Lisia ka nung e ka bisang lumasa balat migit karela! Saka ra ne penulak angga na king malapit da niang alasak ing pasbul.

Genesis 19:9 Iomraidhean Croise

Exodo 2:14

Mekibat ya ing taung kitnan na, Ninu ing minie upaya keka ban maging pamuntuk ka at ukum kekami? Buri mu ku munaman galang paten antimo nung makananu meng pete itang tau Ehipto? Mitakutan ya i Moises at ngana king lub na, Abalu da na pala deng tau ing depat ku.

Genesis 13:12

Menatili ya i Abram king bansa ning Canaan samantalang migdatun ya i Lot karing siudad na ning kapatagan, at telakad na la ding tolda na siping na ning Sodoma.

Mateo 7:6

E yu babie karing asu ing sagradung bage uling dalusungan da kayu at pangetan deti, at e yu la iyatsa ding perlas yu karing babi, uling damusakan da la mu deti.

Jeremias 8:12

Taung kanakung pinili, merine kayu wari inyang depat yu la ding bage makasumami? Ali kayu! E kayu bitasang merine; e kayu man biasang mangalare lupa! Inya miragsa kayu nung makananu lang miragsa ding aliwa. Potang parusan da na kayu, ita na ya ing maging wakas yu. Aku, ing Ginu, ing migsalita.

Jeremias 6:15

Merine la wari inyang depat da la reting makasumaming bage? Ali la! E la bitasang merine. E la man biasang dumine. Inya naman, miragsa la nung makananu lang miragsa ding aliwa. Kabud digpa ku gamat karela, ita na ing kawakasan da. Aku ing Ginu, ing migsalita.

Jeremias 3:3

Iti ya ing sangkan nung inya e minuran at e bitasang minuran agyang king panaun ning kauran. Pati itsura mu lupang babaing magtinda king katawan na; tutu na kang alang marine!

Isaias 65:5

At sasabian da pa karing aliwa king e la sukat lalapit karela pota atagkil da la uli mo kanung tutu lang banal. E ku na la apibata deng taung makanyan! Mengari king aping e matatda ing mua ku karela.

Ecclesiastes 10:13

Magumpisa king kalokuan ing pamagsalita na ning mangmang, at arian na ing sasabian na king kamulangan.

Ecclesiastes 9:3

Paraparehu la ngan a kararasan, at e ustu iting malilyari keti king yatu. Pawang e ustu at kamulangan ing isipan da kabang mabibie la ding tau, at kaybat mate la.

Ding Kasebian 27:3

Mabayat ya ing batu at ing balas anti naman, oneng ing mas mabayat ya ing kaguluan a bunga ning kamangmangan.

Ding Kasebian 17:12

Mas mayap ing lumapit king gaindung oso a kepanakawanan karing keyang anak kesa king lapitan me ing mangmang a samal king dapat nang alang kabaldugan.

Ding Kasebian 14:16

Maingat ya ing biasa at king e mayap lalaut ya, oneng ing mangmang bugasuk ya at ala yang kaingatan.

1 Samuel 25:17

Isipan yu pung masalese nung nanung agawa yu, uling mibili ya king panganib ing panginuan mi at antimu rin ing mabilug nang pibalebale. Masiadu yang masungit, inya alang mangangas makipagsalita king asawa yu.

1 Samuel 17:44

Ngana pa ning Filisteo kang David, Lumapit ka kanaku at pakan ku ing laman mu karing ayup at karing animal king marangle.

Genesis 11:6

Kanita sinabi na ning Ginu, Ngening misanmetung la at metung la salita agawa ra iti, e lumuat ala nang makasabat pa king buri dang gawan.

1 Samuel 2:16

At nung sakaling makibat ya king sukat pa mung dulukan ing taba at kaybat malyari na nang kuanan itang buri da, sabian na ning utus-utusan na ning pari, Ali, ngeni mu na ibie; nung ali kuanan kung sapilitan iti.

Ezekiel 16:49

Migmaragul ya at ding anak na uling dakal la pagkabie, at mibiebie la king kapayapan ampon katahimikan. Mu pin, e ra la seupan ding pakakalulu at ding atyu king pamangailangan.