Exodo 7:19 - Ing Mayap a Balita Biblia

¹⁹ Ngana ning Ginu kang Moises, Sabian mu kang Aaron king kuanan ne ing tukud na at itulid ne karing sablang ilug, karing paligi, at karing paranum king mabilug a Ehipto. Maging daya ing danum; mika daya karing barilis at tapayan king mabilug a Ehipto.

Exodo 7:19 Iomraidhean Croise

Genesis 1:10

Inaus neng Yatu ning Dios ing gabun, at ing danum a mitipun inaus neng Dagat. Ikit na ning Dios king ita mayap.

2 Ari 4:29

Nganang Eliseo kang Gehazi, Gayak ka. Idala me ing tukud ku at agad na kang mako ban ipatung me ing tukud king lupa na ning mete anak. E mu ne atuan ing ninumang akasalubung mu keng dalan at e mu ne papansinan ing ninumang manatu keka.

Exodo 10:12

Kanita ngana ning Ginu kang Moises, Itas me ing gamat mu babo ning bansa ning Ehipto ban datang na la ding durun. Datang la at kanan da ing sablang tutubu, ing sablang mitagan king uran-lipat.

Exodo 10:21

Ngana ning Ginu kang Moises, Itas me ing gamat mu at ing dalumdum a tutung makapal, kulang na mu atagkil mu na, takpan ne ing mabilug a Ehipto.

Exodo 14:16

Itas me ing tukud mu babo ning dagat at mepidua ing danum; malyari na la kanitang makadalan ding Israelita babo na ning gabun a malangi libutad ning dagat.

Exodo 14:21

Inatiat neng Moises ing gamat na babo na ning dagat, at sepulan ne ning Ginu ing dagat king kapamilatan na ning masikan a angin ibat aslagan. Kabukas yang e pepatugut tutiup iting angin at mika malanging gabun king dagat.

Exodo 14:26

Ngana ning Ginu kang Moises, Iyatiat me ing gamat mu tulid na ning dagat at mitakup ing danum karing tau Ehipto at karing karelang karung panggera ampon karing pakasake kareti.

Exodo 4:9

Nung sakaling e la pa maniwala kareting aduang bage pagmumulalan at e la bisang makiramdam king sasabian mu, kuma kang ditak a danum king Ilug ning Nilo at ibulus mu king gabun. Maging daya ing danum.

Exodo 8:16

Ngana ning Ginu kang Moises, Sabian mu kang Aaron king ibarug ne king gabun ing tukud na at maging niknik ing alikabuk king mabilug a Ehipto.

Exodo 9:33

Likuan neng Moises ing ari at linual ya king siudad. Kaybat, tinas na la ding gamat na at menalangin ya king Ginu. At tinuknang ing duldul, ing uran-lipat ampon ing uran.

Isaias 19:10

milako la obra at lungkut la ding manayi ampon ding mangagaling a pangamat.

Isaias 5:25

Milalablab ing mua na ning Ginu king balen na, at inatiat na ne ing gamat na ba neng parusan. Mangaugun la ding bunduk at malakuan la ding bangke da ring mete karing dalan a kalupa na ning basura. Makanyan man, e pa mu rin miyangganan ing mua na ning Ginu. Manatili ya pa mu rin makayatiat ing gamat na ban mamarusa.

Habakuk 3:8

Ginu, ding ilug wari ila ding keka pepamua? Ing dagat kaya ya ing mekapamua keka? Karing babo ding biga ka makasake; ing bagyu yang kekang karwahe; kabang ing kekang balen pagdala meng tagumpe.