Exodo 3:18 - Ing Mayap a Balita Biblia

¹⁸ Makiramdam la ding memalen ku king sabian mu karela. Kaybat na nita, ika at ding manimuna ning Israel puntalan ye ing ari ning Ehipto at sabian yu ing anti kanini: Ing Ginu, ing Dios ding Hebreo, pepakit ya kekami. Ngeni ipakisabi ming mayap king paintulutan yu kami sanang maglakbe atlung aldo king disyerto ban makaibie kaming ain-sakripisyu king Ginung kekaming Dios!

Exodo 3:18 Iomraidhean Croise

Genesis 12:1

Ngana ning Ginu kang Abram, Lakuan me ing balen mu, ding kamaganak mu, at ing pibalebale nang tata mu, at munta ka king bansang ituldu ku keka.

Genesis 14:13

Oneng dinatang ya ing metung a mekatakas at belita na kang Abram a Hebreo a manuknangan lele na ning sagradung tanaman ning Mamre, ing Amoreo at kamaganak da ri Escol at Aner. Kakampi na lang Abram deting adua.

Genesis 15:1

Kaybat na nita, dimdam neng migsalitang Abram ing Ginu king kapamilatan na ning metung a vision. Ngana, E ka tatakut Abram! Aku ing kekang kambilan at maragul ing galal a ibie ku keka.

Genesis 17:1

Siam yang pulu't siam a banua i Abram inyang akatagpu ne ing Ginu. Ngana, Abram, aku ing Dios a Mayupaya. Mamintu ka kanaku at mibiebie kang alang dungis.

Genesis 48:3

Kanita nganang Jacob kang Jose, Pepakit ya kanaku ing Dios a Mayupaya karin Luz, king sakup ning Canaan at binendisyunan na ku.

2 Cronica 30:12

Magobra ya ing Dios king Juda at pisanmetungan na la ding tau karin ban tupad king utus ning ari at ding pamuntuk na.

Ding Dalit 110:3

King aldo a arapan mu lang kekang kalaban, ding memalen magkusa lang ika ing karelang saupan; ibat king sagradung bunduk ding kayanakan datang lang anting ambun ning abak ban keka makiabe.

Exodo 10:3

Inya minta lang pasibayu king ari di Moises at Aaron. Ngara king ari, Ing Ginu, ing Dios ding Hebreo, sasabian na, Angga kaya kapilan ing e ka bisang pailalam king kaburian ku? Paburen mu na lang mako ding taung pinili ku ban makasamba la kanaku.

Exodo 17:5

Ngana ning Ginu kang Moises, Mituki kang mapilan karing manimuna na ning Israel at muna na kayu karing tau. Idala mia naman itang tukud a pemarug mu king Ilug ning Nilo.

Exodo 19:1

Miras la ding Israelita king disyerto ning Sinai kaybat ning atlung bulan ning paglako ra king Ehipto.

Exodo 25:22

Karin da ka pakikitan at karin king babo na ning takap, pilatan da ring aduang kerubin, ibie ku la keka ding sablang kautusan ku para karing memalen na ning Israel.

Exodo 3:12

Ngana ning Dios, Patnubayan da ka at oyni ing tanda king aku ing mitubud keka. Potang ikua mu na lang alual Ehipto ding Israelita, samban yu ku keting bunduk.

Exodo 3:16

Puntalan mu na la at tipunan ding manimuna ning Israel at sabian mu karela king aku, ing Ginu, ing Dios ding makatua da, ing Dios nang Abraham, Isaac, at Jacob, pepakit ku keka. At sabian mu karela king ikit ku ing pamipasakit a daraptan da karela ding tau Ehipto.

Exodo 30:36

Dikdikan mung mapinu ing metung nang dake niti, at ibili mu king arap ning Tolda nung nukarin da kayu pakitagpuan. Tunggen yung banal iting insenso.

Exodo 30:6

Ibili me iting altar king lual ning tabing arapan na ning Kaban ning Kasunduan. Iti ing lugal nung nukarin ku makitagpu kekayu.

Exodo 4:1

Kanita nganang mekibat Moises, O nu mo pung e ra ku paniwalan ding Israelita at e la makiramdam king sabian ku karela? Nanu pu ing gawan ku potang sabian da king e ya tutung pepakit kanaku ing Ginu?

Exodo 4:23

Sinabi ku na keka king paintulutan meng mako ing anak ku ban kanita asamban na ku, oneng e ka mebisa. Ngeni paten ke ing anak mung lalaking pangane.

Exodo 4:24

Kanitang papunta la Ehipto, kabang paynawa la pintalan ne ning Ginu i Moises at pignasan neng paten.

Exodo 4:31

Meniwala la ding tau at inyang dimdam da king ing Ginu ya ing dinalo karela at king ikit na ing kasakitan a daralanan da Ehipto, dinuku la ngan at simban de ing Ginu.

Exodo 5:1

Kaybat na nita, minta ya i Moises at i Aaron king ari ning Ehipto. Ngara, Ing Ginu, ing Dios ning Israel, pasabi na keka ing paintulutan mu lang mako ding memalen na ban malyari lang magpiesta king disyerto bilang parangal king Dios.

Exodo 5:3

Pekibat da ri Moises at Aaron, Pepakit ya kekami ing Dios ding Hebreo. Paintulutan yu ke sanang maglakbe kilub ding atlung aldo papunta king disyerto ban makaibie kaming ain-sakripisyu king Ginung kekaming Dios. Nung ali, pamaten na ke ngan king kapamilatan na ning sakit a makapanawa o kaya king kapamilatan ning gera.

Exodo 7:16

Anti kaniti ing sabian mu king ari, Ing Ginu, ing Dios ding Hebreo, tiburan na ku ban sabian ku keka king paburen mu na lang mako ding memalen na ban makasamba la king Dios keta king disyerto. Oneng angga ngeni e ka pa bisang makiramdam.

Exodo 8:1

Kanita ngana ning Ginu kang Moises, Puntalan meng pasibayu ing ari at sabian mu king pasabi na ning Ginu ing anti kaniti: Paburen mu na lang mako ding memalen ku ban makasamba la kanaku.

Exodo 8:20

Ngana ning Ginu kang Moises, Makikit ka bukas abak a maranun king ari potang dulung ya king ilug at sabian mu king ing Ginu pasabi na ing anti kaniti: Paburen mu na lang mako ding memalen ku ban makasamba la kanaku.

Exodo 8:23

Palto kung pamiyaliwa karing memalen ku ampon karing memalen mu. Marapat bukas iting bage pagmumulalan.

Exodo 9:1

Ngana ning Ginu kang Moises, Munta ka king ari at sabian mu king ing Ginu, ing Dios ding Hebreo, pasabi na ing anti kaniti: Paburen mu na lang mako ding taung pinili ku ban makasamba la kanaku.

Exodo 9:13

Kanita ngana ning Ginu kang Moises, Bukas abak a maranun pakikitan me misan pa ing ari. Sabian mu king ing Ginu, ing Dios ding Hebreo, pasabi na ing anti kaniti: Paburen mu na lang mako ding taung pinili ku ban makasamba la kanaku.

Isaias 64:5

Matula mu lang tatanggapan detang manakit tula king pamaniapat dang matulid, detang makaganaka nung makananu mu lang buring mibiebie. Mimua ka kekami, makanyan man sinulung mi ing pamaniapat ming kasalanan. Agyamang maragul ing mu mua kekami, tiglus mi pa mu rin ing pamaniapat e ustu manibat na kanitang mumunang panaun.

Jeremias 2:2

king ibalita ku iting mensahi na king balang memalen na ning Jerusalem: Agaganaka ku ing kekang katapatan inyang kayanakan mu, nung nu anti karagul ing lugud mu kaku inyang pekasalan da ka; tikian mu ku king libutad ning disyerto, karing lugal a e bitasang mitamnan.

Jeremias 2:6

E ra ku man aganaka agyamang linigtas ku la king Ehipto, at tinaid libutad ning disyerto: king bansang disyerto at kulkul, king malangi at makatakut a lugal a alang manuknangan at alang bisang dumalan.

Jeremias 26:5

at dinan yong pansin ding amanu da ring talasuyu ku, ding propetang alang tuknang kung tutubud kekayu. E yu bitasang pemintuan ing sinabi da kekayu.

Ding Bilang 17:4

Kaybat ibili mu la deti king Toldang tuknangan ku king lugal nung nu ra ka pakitagpuan king arapan na ning Kaban ning Kasunduan.

Josue 1:17

Nung makananu mi yang pemintuan i Moises king sablang bage, makanyan da ka munamang pamintuan, at ing Ginung kekang Dios mantabe ya sa keka kalupa na ning pamanantabe na kang Moises!