Exodo 27:21 - Ing Mayap a Balita Biblia

²¹ I Aaron at ding anak nang lalaki ilang mibili king sulu kilub na ning kanakung Tolda nung nu ku atyu ketang lual na ning tabing a atyu king arapan na ning Kaban ning Kasunduan. Sukat lang milalablab ding sulu neng bengi angga itang kabukasan karin king arapan ku. Iti kautusan yang sukat dang tuparan king kapilan pa man ding Israelita ampon ding lahi ra.

Exodo 27:21 Iomraidhean Croise

Genesis 1:5

Inaus neng Aldo ning Dios ing sala, at ing dalumdum naman inaus neng Bengi. Miras ing bengi at dinatang ing abak. Ita ya ing mumunang aldo.

Genesis 1:8

Inaus neng Banua ning Dios ing suklub. Miras ing bengi at dinatang ing abak. Ita ya ing kaduang aldo.

2 Cronica 13:11

Babie lang insenso neng abak at neng bengi at animal a durulukan para king Ginu. Babie la namang ain a tinape ketang misadiang malinis a lamesa. At neng bengi sisindian da la ring sulung atyu king gintung pitutumpakan-sulu. Pamintuan mi ing sablang inutus na ning Ginu, oneng ikayu gilutan ye.

Ding Dalit 134:1

Meko keni, ikong talasuyu na, ikong susuyu kabukas king Templo na, lumapit kayu at purian ye ing Ginu.

Exodo 12:14

Sukat yeng pagselebran ing aldong iti bilang piestang parangal king Ginu ban e yu kalinguan ing depatan ku, ing Ginu. Pagselebran ye king kapilan pa man.

Exodo 16:34

Antimo nung makananu nang inutus ning Ginu kang Moises, binili nang Aaron iti king arapan na ning Kaban ning Kasunduan ban karin manatiling makasinup.

Exodo 25:16

Ilulan yu la kilub na ning Kaban ding aduang tinabas a batu a ibie ku, nung nukarin la makasulat ding kautusan.

Exodo 28:43

Kailangan ing isulud na lang Aaron deti at ding anak nang lalaki neng mamarap la kanaku kilub na ning Toldang tuknangan ku o neng lalapit la king altar ban gampanan da ing karelang pangapari kilub ning Banal a Lugal, at ban e la mangamate uli na ning kalubasan da. Maging metung ya iting tuntunan king kapilan pa man para kang Aaron at karing maging lahi na.

Exodo 29:28

Sukat mipatupad manibat ngeni at king kapilan pa man iti: potang ding taung pinili ku yayampang da la ring ain-ning-pamisulusulu, ing pitsu, at ing puad ning animal a yayain da mangaintulid ya karing pari. Iti ya ing peka regalu da ring tau para kanaku, ing Ginu.

Exodo 29:42

Sukat gampanan alang patugut iti king sablang panaun bilang ain-a-durulukan king arapan ku keta king tulid ning pasbul ning Toldang tuknangan ku. Karin ke pakitagpuan ing balen ku at karin ku makipagsalita kekayu.

Exodo 29:44

Gawan keng banal ing Toldang tuknangan ku ampon ing altar, at ibukud ke i Aaron at ding anak nang lalaki ban sumuyu la kanaku bilang pari.

Exodo 30:21

Kailangan da lang wasan ding gamat da at bitis ban e la mate. Metung ya iting tuntunan a sukat dang tuparan at ding maging lahi ra king kapilan pa man.

Exodo 30:36

Dikdikan mung mapinu ing metung nang dake niti, at ibili mu king arap ning Tolda nung nukarin da kayu pakitagpuan. Tunggen yung banal iting insenso.

Exodo 30:8

Makanyan munaman ing daptan na potang sindian na la ding sulu karas ning bengi. E yu kakalinguan iting pamiyain insenso aldo-aldo at pati ding maging lahi yu.

Exodo 40:3

Ibili me kilub na ing Kaban ning Kasunduan a datukanan karing Apulung Utus at pampanan me king tabing.

Levitico 10:9

Ika ampon ding anak mu, e kayu miminum alak o nanumang bage makalasing bayu kayu lungub king Toldang tuknangan ku, pota mate kayu. Iti tuntunan yang sukat ipatupad karing lahi yu king kapilan pa man.

Levitico 16:34

Manatili ya iting tuntunan king sablang panaun; tuparan ya misan kilub ning pabanua ban mipatawaran ing sabla rang kasalanan. At tiparan nang Moises ing sablang inutus na ning Ginu.

Levitico 17:7

Inya e na la sukat magtaksil king kapamilatan na ning pamakamate ra karing karelang animal para iyain da karing demonyung kambing a sasamban da. Iti ya ing tuntunan a sukat dang tuparan king kapilan pa man.

Levitico 23:14

E kayu mamangan tinape o binutil, maging iti sagiwa o sinangle anggang e yu ayaring agampanan iting pamanain. Sukat deng tuparan ding sabla yung lahi iting tuntunan king kapilan pa man.

Levitico 23:21

E kayu bitasang magobra king aldong ita, nune mitipun kayu ban samba. Tuparan ye iting tuntunan king kapilan pa man at nu man karin kayu manuknangan.

Levitico 24:2

Iyutus mu karing memalen na ning Israel king magdala lang larung olibo a alang samut para karing sulu ban manatili lang makaslag

Levitico 24:3

king lual na ning kortina a atyu king arapan na ning Kaban ning Kasunduan kilub ning Tolda. Sindian na lang Aaron deting sulu neng daratang na ing bengi, at e na la paburen matatda angga itang kabukasan abak. Sukat yang tuparan iting tuntunan king kapilan pa man.

Levitico 24:9

Mangaintulid la deting tinape, kaybat dang miyain, kang Aaron at karing anak na. Kanan da la reti king lugal a sagradu uling iti metung yang sagradung dake ning ain a mitalaga kanaku, ing Ginu, para karing pari. Tuntunan ya iti a sukat ipatupad king sablang panaun.

Levitico 3:17

Alang Israelita a malyaring mangan taba o daya; iti metung yang tuntunan a sukat matupad king kapilan pa man at nukarin la man manuknangan.

Levitico 3:8

Kaybat na nita, itumpak ne ing gamat na king buntuk ning tupa at paten ne karin king arap ning Tolda. Isabug da ring pari ing daya ning tupa king paligid na ning altar,

Levitico 6:15

Kuma yang kasakmal ing metung karela king mapinung arinang semutanan laru at insenso. Kaybat, dulukan na iti king altar bilang tanda king ing kabilugan a ain miyain na kanaku, ing Ginu. Babie tula kanaku, ing Ginu, ing bau na niting ain.

Levitico 7:36

King aldong ita inutus ku karing memalen na ning Israel king ibie re karing pari ing anti kaniting dake ning ain. Iti metung yang tuntunan a sukat dang tuparan king kapilan pa man.

Malakias 2:7

Katungkulan da ring pari ing ituru da ing tune kabiasnan tungkul king Dios. Sukat lang lumapit karela ding tau ban abalu ra ing kaburian ku, uling ila ding tubud na ning Ginung Mayupaya.

Ding Bilang 18:23

Manibat ngeni ding Levita ilang manibala king kasuyuan king Toldang tuknangan ku, at ila ring ating pakibatan kaniti. Tuntunan ya iti a sukat ipatupad kekayu at karing lahi yu king sablang panaun. Wa, ala lang dake ding Levita king gabun a mipangaku,

Ding Bilang 18:5

Bukud mung ika at ding anak mu ing mamahala king Banal a Lugal at king altar ban e na ku mimua karing memalen na ning Israel.

Ding Bilang 19:21

Iti tuntunan yang sukat tuparan king kapilan pa man. Sukat nang pipian ing imalan na ning taung memisik king danum a paglinis at ituring yang e malinis angga itang bengi ing ninumang taung mekatagkil kaniting danum.

Ding Bilang 35:29

Ila deti ring tuntunan a sukat yung tuntunan at ding lahi yu king kapilan pa man at nu man karin kayu manuknangan.

Ding Bilang 8:9

Kaybat idala mu la reting Levita king arapan na ning Toldang tuknangan ku at iyarap king akakit da ring makatipun a Israelita.

Mateo 4:16

Ding taung manuknangan king kadalumduman menakit lang maragul a sala! Karing manuknangan king anino ning kamatayan karela sunlag ya ing sulu!

Lucas 12:35

Parati kayu sanang makasadia king nanumang malyari, makapiblas at makasindi sulu.

Juan 5:35

Mengari yang sulung milalablab i Juan at maslag ya; at birian yung matula kayung sinaguli king aslag na.

2 Corinto 4:6

Uling ing Dios a sinabing Busal ning karalumduman, sunlag ya ing sulu, ya mu rin ing Dios a babie aslag king kekatamung pusu ban makilala ing ligaya na ning Dios a mihayag king lupa nang Cristo.

2 Pedro 1:19

Inya lalu keng makasiguru keng sasabian da ring propeta. E yu sisian nung makiramdam kayung masalese kaniti uling mengaring metung a sulung saslag kekayu king karalumduman, angga king maspak ya king alaya ing Aldo ning Ginu, at sunlag ya karing pusu yu ing batuin na ning abak.

Kapahayagan 2:1

Isulat mu iti king anghel na ning iglesia karin Efeso: Iti ya ing pasabi na nitang tatalan karing pitung batuin king wanan nang gamat at lalakad libutad da ring pitung gintung tumpakan-sulu.

1 Samuel 3:3

E ya pa mitda kanita ing sulu king bale ning Ginu, at matudtud ya naman i Samuel king bale ning Ginu ketang lugal nung nu ya atyu ing Kaban ning Dios.

1 Samuel 30:25

Manibat na kanita at angga na ngeni gewa neng patakaran at tuntunan iti para king Israel.