Exodo 22:25 - Ing Mayap a Balita Biblia

²⁵ Nung paparam na kayu mang salapi kenu man karing memalen kung kalulu, e kayu makiapus karing usurero at e ye sukat maniad patubu.

Exodo 22:25 Iomraidhean Croise

2 Ari 4:1

Minta ya kang Eliseo ing babaing mebalu na ning metung a miembru king aguman da ring propeta at ngana, Mete ne ing asawa ku, at balu yu king siyuan ne ing Ginu king mitmung katapatan. Datang ya ngening aldong iti ing pikautangan na ban kuanan na la ring adua kung anak a lalaki at gawan na lang ipus.

2 Ari 4:7

Inya pintalan ne i Eliseo, ing propeta ning Dios. Nganang Eliseo king babai, Ipisali mu ing larung olibo at kaybat bayaran mu ing utang yu. Labis-labis la ring mitagan karing abli mu para king pagkabiayan ding anak mu.

Nehemias 5:7

at inari king lub ku ing sumbatan ku la ding manimuna at pamuntuk da ring memalen. Ngakung migsalitang mataram karela, Gigipitan yu la ding mismung kapatad yu king gagawan yung yan! Minaus kung maragul a pulung ban lunasan iting problema.

Ding Dalit 15:5

Itang e mamatubu king salaping paparam na, at e me asuhul laban karing taung alang kasalanan. Ing taung mibiebie makanyan matatag ya, at e maugun kapilan man.

Ding Kasebian 28:8

Itang misasalapi king kapamilatan ning matas a interes at pamaglinlang karing tau, miras ing pibandian na king taung malugud karing pakakalulu.

Jeremias 15:10

Masakit ing kabilian ku! Baket beit na ku pa ning ima ku keti king yatu? Mapipilit kung makipate at makiargu king balang tau ning bansa. E ku peparam salapi ni menandam, makanyan man paniumpa da ku.

Ezekiel 18:13

at kakua yang patubu neng paparam na la ding salapi na. Mie ya kaya? Ali ya! Depat na la ngan deting makasumaming bage, inya mate ya. Ya ing maki kasalanan king kamatayan na.

Ezekiel 18:17

Tatanggian na ing dapat a e mayap at e na la paparam ding salapi na a ating patubu. Pamintuan na la ding kautusan ku at tutukian na la ding tuntunan ku. E ya mate agyang mikasala ya i tata na. Siguradu yang mie.

Ezekiel 18:7

E ne pipiraitnan o panakawanan ing ninuman. Susubli na itang singla na ning mindam; pakanan na la ding danupan at paimalanan ding lubas.

Ezekiel 18:8

Paparam na la ding salapi na a alang patubu. Tatanggian na ing dapat a e mayap at e ya mangabiran king pamamie nang kayatulan king nanumang pisasabian.

Ezekiel 22:12

Manupa lang tau ban makamate tau. Kakua lang patubu karing salaping paparam da karing kalupa rang Israelita, at mibabandi la king kapamilatan na ning pamagsamantala ra. Kelinguan da na ku. Ing Ginung Dios ya ing migsalita.

Amos 2:8

Karing sablang lugal nung nu la sasamba, ing pagkeran da ya ing imalan a singla da karela ding kalulu. King Templo na ning karelang Dios karin da inuman ing alak a kinua ra karing ating utang karela.

Mateo 25:27

baket e mu la bildug ding salapi ku king bangku ban king pamagbalik ku e mu ing asubli mu la nune mika interes la sana?

Lucas 19:23

obat e me bildug king bangku ing salapi ku? King pamagbalik ku mika interes ya mu man sana.

Deuteronomio 15:7

Nung ating metung a kalupa yung Israelita a pakakalulu king isanu pa man karing balen a babie na kekayu ning Ginung kekayung Dios, e ye paburen; saupan ye.

Deuteronomio 24:13

Isubli ye bayu datang ing bengi ban atin yang gamitan potang matudtud ya at bendisyunan na kayu, at ing Ginung kekayung Dios ibilang nang kabanalan ing depat yu.