Exodo 22:21 - Ing Mayap a Balita Biblia

²¹ E ye liligaligan o lulupigan ing ninumang dayuan; ganakan yu king meging dayuan kayu naman kanitang atyu kayu Ehipto.

Exodo 22:21 Iomraidhean Croise

Job 6:27

Agyang ding ulila pipagbagutan yu la, kakaluguran pisali yu la naman ba kayung manakitan.

Ding Dalit 146:9

Ingatan na la ning Ginu ding dayuan a manuknangan king kekatamung bansa; sasaupan na la ding mebalu at ulila, oneng ding balak da ring e mayap lalako na la.

Exodo 20:2

Aku ing Ginung kekayung Dios a milual kekayu ibat Ehipto nung nukarin kayu meging ipus.

Exodo 23:9

E ye lulupigan ing ninumang dayuan; balu yu nung nanu ing panamdaman na ning metung a dayuan, uling meging dayuan kayu naman karin king Ehipto.

Isaias 1:17

at magaral na kang dapat king mayap. Patupad mu ing hustisia; saupan mu la ding magigipit, ibie mu ing karapatdapat karing ulila, at idipensa mu la ding mebalung babai.

Jeremias 22:3

Ngana, Aku, ing Ginu, yuyutus ku kekayu king daptan yu ing matulid at ing alang pamangabiran. Idipensa ye ing taung pipiraitnan na ning manalipit. E yu la alipitan, nune pakiutusan yu lang mayap ding dayuan, ding ulila, at ding mebalung babai. E yu la papaten keting banal a lugal a iti ding taung alang kasalanan.

Jeremias 7:6

Tuknangan yu na ing pamagsamantala karing dayuan, karing ulila, at karing babaing mebalu. Tuknangan yu na ing pamakamate karing alang kasalanan a memalen na ning bansang iti. Tuknang na kayung sasambang aliwang dios uling iti ya ing makasira kekayu.

Ezekiel 22:7

Ala metung man king siudad a gagalang mo sa karing pengari na. Pamiraitnan mu la ding dayuan at sasamantalanan ding babaing mebalu at ding ulila.

Levitico 19:13

E ye sasamantalanan o panakawanan ing ninuman ni ipagkait ding bayad ning taung kinua yung magobra; e yu ipagpaliban ing upa na kilub ning kabukas.

Levitico 19:33

E yu la daraptanan e ustu ding dayuan a makipanuknangan king bansa yu.

Levitico 19:34

Pakiutusan yu lang antimo nung makananu yeng pakiutusan ing kalupa yung Israelita, at luguran yu la antimo ing pamaglugud yu king sarili yu. E yu sa kakalinguan king kanitang misan dayuan kayu naman karin king Ehipto. Aku ing Ginung kekayung Dios.

Levitico 25:35

Nung mekalulu ya ing metung karing kekayung kabalen a kasiping yung bale at e na agyung biayan ing sarili na, sesen ya at tanggapan bilang metung a dayuan a makipamalen kekayu.

Zacarias 7:10

E yu la gigipitan ding babaing mebalu, ding ulila, at ding dayuan a manuknangan libutad yu o ing ninumang atyu king pamangailangan. At e kayu babalak nanumang e mayap a makapanasakit king aliwa.

Malakias 3:5

Sasabian na ning Ginung Mayupaya, Lunto ku libutad yu ban ukuman da kayu at magtestigu kung agad laban karing darapat pamagsalamangka, karing makipangalugud, karing magsalitang kalaraman, karing mamirait karing katuliran dang upa ding magobra da at karetang magsamantala karing babaing mebalu, karing ulila, karing dayuan, at antimu rin karing sablang e gagalang kanaku.

Deuteronomio 1:16

Penabilinan ku la kanitang panaun a ita king pakiramdaman dang masalese ing problemang ilapit da ring tau at ibie ra ing karapatdapat a kayatulan, kamaganak ya man o dayuan a mekipamalen kekayu.

Deuteronomio 10:18

Papairal na ing hustisiang mangaintulid karing meulilang tata at mebalung babai; kaluguran na la ding dayuan at dirinan na lang pamangan ampon imalan.

Deuteronomio 10:19

Inya sukat yu lang luguran ding dayuan, uling king misan a panaun meging dayuan kayu naman king bansa ning Ehipto.

Deuteronomio 15:15

E yu sa kakalinguan king meging ipus kayu naman karin king Ehipto, oneng gewa na kayung malaya ning Ginung kekayung Dios. Iti ing sangkan nung inya babie ke iting kautusan.

Deuteronomio 23:16

Paburen yeng manatiling kayabe yu at manuknangan king isanu mang balen a pilinan na; e ye gigipitan.

Deuteronomio 23:7

E yu la sana pikakasaman ding Edomita uling kamaganak yu la. E yu la naman sana pikakasaman ding tau Ehipto uling king misan a panaun menuknangan kayu king bansa ra.

Deuteronomio 24:17

E yu pagkaymut ing hustisia karing dayuan o ulila o kakuanan man anting sangla ing balabal na ning babaing mebalu.

Deuteronomio 27:19

Isumpa ya ing ninumang magkaimut hustisia king dayuan, king ulila, at king babaing mebalu. At ding sablang tau makibat la, Amen!