Exodo 16:15 - Ing Mayap a Balita Biblia

¹⁵ Inyang ikit da iti ring Israelita, e ra balung sabian nung nanu ita at ngara king metung at metung, Nanu iti? Nganang mekibat Moises karela, Iti ya ing pamangan a binie na kekayu ning Ginu.

Exodo 16:15 Iomraidhean Croise

Exodo 16:4

Ngana ning Ginu kang Moises, Pauran kung tinape ibat banua para kekayu ngan. Sukat lang lage aldo-aldo ding tau, at tumipun ketang sapat para king balang aldo. King anti kaniting paralan ku la asubukan at akit nung balu rang tukian ing kanakung panabilin.

Juan 6:58

Iti ya ing tinapeng tinipa ibat banua. E ya anti king pengan ding makatua yu. Mengan la, oneng kaybat mete la. Ing mamangan king tinapeng iti mie ya kapilan man.

Exodo 16:31

Pemalagyuan dang manna ding tau Israel ing pamangan a ita. Mengari yang metung a malati at maputing butul tanaman, at lalasa ne mang tinape maimpis a singkapan pulut-panilan.

Deuteronomio 8:3

Gewa na kayung mapagpakumbaba; peparanup na kayu at kaybat pepakan king manna, ing pamangan a e yu bitasang balu o tikman ding makatua yu. Depat na iti ban ituru na king e ya bukud mabibie king tinape ing tau nune king balang amanung manibatan king Dios.

1 Corinto 10:3

Mengan la ngan king pamangan a espiritual,

Nehemias 9:20

King kekang kayapan tiru me karela ing dalan a sukat dang dalanan; e mu pigkaymut karela ing pamangan a manna at ing danum a inuman da.

Nehemias 9:15

Inyang meranup la, peparala kang tinapeng ibat banua, at inyang mau lang danum king batung ating sibul karin mu la pepainum. Sinabi mu karela king bandian de ing gabun a pengaku mung ibie karela.

Josue 5:12

Tinuknang nang mananabu ing manna at manibat na kanita e na la mika atin pa. Manibat naman king panaun a ita mengan na la king pamangan a tutubu king gabun ning Canaan.

Juan 6:49

Mengan lang manna king disyerto ding makatua yu, makanyan man mete la.

Deuteronomio 8:16

Karin pepakan na kayung manna a e ra bitasang balu ding makatua yu. Peparala yang kasakitan kekayu ban subukan na kayu at ban maging mapagpakumbaba kayu. Depat na iti ban king katataulian mipakayap kayu.

Ding Bilang 21:5

Inya migsalita lang laban king Dios at kang Moises. Ngara kang Moises, Leko mu kami wari king Ehipto ban pamaten mu keti king disyerto nung nu alang pamangan at danum? Sinawa na kami kaniting alang kwentang pamangan!

Exodo 16:33

Nganang Moises kang Aaron, Kuma kang metung a banga, datukanan meng kapitnang salup a manna at ibili mu keta king arapan na ning Ginu; isinup tamu yan para karing lahi tamu.

Kapahayagan 2:17

Nung atin kang balugbug, makiramdam ka king sasabian na ning Espiritu karing iglesia! Karing magtagumpe, ibie ku ing makasalikut a manna a manibat banua. Ibie kia munaman king balang katau ing maputing batu nung nu ya makasulat ing metung a bayung lagyu a alang makibalu nune mu itang tanggap kaniti.

Hebreo 9:4

Atyu karin ing altar a pidurulukan dang insenso at ing Kaban ning Kasunduan a parehung binalut king gintu. Kilub na ning Kaban atyu ing metung a gintung kuran a ating laman a manna, at ing tukud nang Aaron, ing tukud a mika bulung, at ding aduang tinabas a batu nung nu la makasulat ding kautusan.

Lucas 12:30

(Uling deting bage ila ding kayayalisuas dang panintunan ding paganu keti king yatu.) Balu na ning Ibpa yu king kailangan yu la deting bage.

Ding Kasebian 9:5

Me keni, kanan mu ing pamangan ku at inuman mu ing alak a singkapan ku.

Ding Dalit 78:24

Pepauran yang manna ban apangan da, at dininan nong tinape

Ding Dalit 105:40

Inyang miniawad lang pamangan ayup lang pugu ding binie na, at dakal a tinapeng ibat banua.