Mak 2:2 - Paama Bible

² Keil houlu umai asien teim enek, sakini out mutikoe neim ka meatin houlu mun amules arapehai en voiteh, ka Iesu mul visein keil en selusien onen Ahi.

Tus Votut en selusien ten out Voum

² Keil houlu umai asien teim enek, sakini out mutikoe neim ka meatin houlu mun amules arapehai en voiteh, ka Iesu mul visein keil en selusien onen Ahi.

Mak 2:2 Iomraidhean Croise

Sam keil 40:9

Sakini, en vangi meatin keil ten out Isrel, navit meseini keke kutut komai. Nirmusehtei, niles nihitehiten asa koa komumoni en komai.

Mak 1:14

Katau en avong aling Sion en eim takeih, Iesu va en out Kaleli ka vitehiten more longlongien koa ka ven Ahi.

Mak 1:33

Sakini, meatin keil vasi en meteimal en out enek alah ruai rahit eim koa Iesu ro en.

Mak 1:37

Ka navong alesi aviteni mini avit, “!Meatin keil vasi e vati avalesuk!”

Mak 1:45

Ka navong va rani, mang vas ongon houlu ka viteni min meatin savsav keil asa koa Iesu mumoni mini. Sakini, Iesu sakras vaha en out koa meatin keil alango ien. Mukos, rovatei mun en meteimal keil. Ka meatin keil aka soutin en out vasi keke umai avalesi.

Mak 2:1

Avong vahis muli, Iesu muris va en taon ten out Kapaniam, ka keil ten out enek alonge keke ro teim tai.

Mak 2:13

Navong tamun, Iesu va ut en Mari Oai ten out Kaleli. Tali meatin keil umai akarahiti, ka kei mul visein keil.

Mak 6:34

Navong Iesu vut ran vot, les meatin keil houlu amul tuai ka kur enmahisien ven keil. Les keil asuval sipsip keil koa meatin tovuol keke valosil kat keil. Sakini, mul visein keil en tounah houlu.

Luk 12:1

En avong enek, meatin keil houlu vis houlu mok umai amutiting keke avales Iesu ka amul aveas ale tanetan. Ka Iesu viles selus emau min meatin keil onen vit, “Mihelei kat revi kami ven hihiseien onen Farasi keil koa amuto en hilive enges. Suval is koa mum suai vasakin pulaoa mul ratahou, hihiseien keil one kilea vapurun suai rendemien onen meatin keil.

Luk 5:17

En avong tai, navong Iesu mul visein vangi meatin keil, tei en Farasi ka tiser keil ten mengkatien keil onen Mosis umai arondan vesesal ka amul araengoni. Keil aka en provins ten out Kaleli ka Sudea ka taon ten out Serusalem keke avales Iesu. Ka Ahi Asuv san keihoen min Iesu vasakini kei kilea vasak revi meatin houlu ran mesaien keil one.

Luk 8:1

Katau en avong enek, Iesu mual rahit taon keil ral min meteimal keil koa. Navong mual va, mul vitehiten more longlongien usil mukave hiasuvien onen Ahi hemai en moulien onen meatin keil. En avong enek, meatin teindan elu (12) onen amul amusili.

Luk 8:11

Sakini Iesu viteni min keil vit, “Aneite ten tatavolien enek mukok: uti uit keil vi selusien onen Ahi.

Umen 11:19

Navong hetetamen onen Siu keil ten out Serusalem akov vini Stivin ka uva asak purun koakeil ten Sios, houlu en koakeil aling demkatien one en Iesu aretasil uva en out savsav keil. Tei en keil alohosai uva soutin rokol atan ten out Fonisia, tei en keil uva en aelan ten out Saepras, ka teimun en keil uva en mari taon ten out Antiok. Ka navong aro en out keil enek, asan more longlongien usil Iesu min Siu keil enges.

Umen 14:25

En out enek, lusan selusien onen Ahi en taon ten out Perka. Evus, lumumoni emun en taon ten out Atalia.

Umen 16:6

En ualien onen Pol keitel Saelas ka Timoti, Ninin Votut romaentei keitel telvaha en provins ten out Esia keke telvahitehiten selusien onen Ahi ien. Sakini, keitel telka vas atan ten out Frikea ka provins ten out Kalesia.

Umen 8:25

Evus, Pita ka Sion luvit lati min me-Sameria keil tounah koa Asuv Iesu mumoni ka viteni navong luro veah ral mini. Evus, luva ris en out Serusalem. Ka en sise onealu, lusao en meteimal keil houlu en provins ten out Sameria ka luvitehiten more longlongien usil Iesu Kristo ekonek.

Rom 10:8

Ka asa koa Mosis viteni ekek, “Selusien onen Ahi mul vesesal ven kami, mul tuai en ongomi ka tinomi.” (Dut 30:14) Ka koanek vi selusien ten demkatien koa komai memul mevitehiteni.

2 Timoti 4:2

kiles kihitehiten more longlongien onen Ahi. En avong tetahos ka avong tatisa, kisak mesein keik veni. Koakeil amul en tisaen, kisel kat keil keke usil sise koa mal. Navong kovasel kat meatin keil en more hihiseien, kumon rendemien onom hetaveah.