Yohana 21:16 - Pokomo

¹⁶ Kisa Yesu kamuuza Pet̯ero ḍya pfii kamwamba, “Dze Simioni mwana jwa Yohana, kunitsaka?” Pet̯ero kamwamba, “Ḅwana, wewe mwenye kumanya ya kwamba mimi nikutsaka!” Nae Yesu kamwamba, “Haya, zit̯unze hizi mbuzi zangu.”

Yohana 21:16 Iomraidhean Croise

Matayo 2:6

‘Mudzi wa Betilehemu wiwo ḍyimbo ḍya Yud̯aya, ni mudzi muḍoḍo. Ela si mudzi wa kubalifika hat̯a kachuchu kahi ya midzi yonse ya Yud̯aya. Koro kuyawa Betilehemu kudzavyajwa haju adzeewayongowa wantu wa Isiraeli.’ ”

Matayo 25:32

Na hapfo vyeet̯i vyonse vya humu lumwenguni vidzat̯ut̯aa usoni yakwe. Nae kadzawat̯anya dza hiviḍe vya mut̯unga evyonaweza kut̯anya mbuzi za hako na za pee.

Matayo 26:72

Na kawii Pet̯ero kakana na kayapfa kamba, “Hachi nayapfa kwamba huyo huyo muntu mimi simudzi!”

Luka 19:10

Koro mimi *Mwana jwa Ad̯amu nidziya kuwalacha na kuwapfonya hawaḍe waariyeo.”

Yohana 18:17

Kisa kamuuza Pet̯ero kamwamba, “Wewe nkukwaa mumodza jwa wanafund̯i wa Yesu hat̯a?” Pet̯ero kamwambukuya kamwamba, “A-a! Mimi sikwaa mwanafund̯i jwa Yesu!”

Yohana 18:25

Huo huo wakati Simioni Pet̯ero ekikoha moho humuḍe uani. Hawaḍe wantu wangine weokuwa pfamodza nae wamuuza wamwamba, “Wewe nkukwaa mumodza jwa wanafund̯i wa Yesu hat̯a?” Ela jeje kakana kamba, “Mimi sikwaa mwanafund̯i jwa Yesu!”

Yohana 21:17

Makisa Yesu kamuuza Pet̯ero ḍya hahu kamwamba, “Dze Simioni mwana jwa Yohana, kunitsaka?” Pet̯ero kasikia tsungu kwa dzambo ḍya hivi vya Yesu amuuziyevyo mweedha wa hahu kwamba kamutsaka ambu hat̯a. Nae kamwamba, “Ḅwana, wewe kumanya kula kintu. Wewe mwenye kumanya ya kwamba mimi nikutsaka!” D̯ubva nae Yesu kamwamba, “Haya, zit̯ikise mbuzi zangu.

Mahendo 20:28

Dzit̯unzeni wenye na kuwat̯unza wahikiza wonse wayatsijweo mikononi mwenu ni Ruhu Mudheru. Wani wat̯ikisa wa tsanganiko ḍya Muungu, aḍidzigwiiyeḍyo kwa mwazi wa Mwanawe.

Waeburania 13:20

Muungu ndiye amufufwiiye Ḅwana jwehu Yesu, eye Mut̯ikisa Mukuu jwa hizi mbuzi. Jeje ni mut̯ikisa mukuu kwa dzambo ḍya kudziyavya kwakwe dza mvuugiya akifwa. Hu mwaziwe uwa ndiwo mwazi wa hiḍi ḍamano ḍya maishi kahi ya Muungu na wanaad̯amu.

1 Pet̯ero 2:25

Koro mwiiwa dza mbuzi ziariyezo, ela sasa mumagala kwa huyu Mut̯ikisa eyenazit̯ikisa hizi ruhu zenu.

1 Pet̯ero 5:2

Wani wat̯ikisa wa hu mwona wa Muungu auyatsiyeo mikononi mwenu. Namutseut̯ikisa dza kwamba mwakusharut̯iswani, ela ut̯ikiseni na hiari yenu, dza vya Muungu evyonatsaka. Hi kazi yenu namutseihenda kwa dzambo ḍya kupata fwedha, ela ihendeni na mojo kindindi wa kutsaka kuhumika.

Upfenuo wa Yohana 7:17

Koro huyu Mwana Mbuzi eyenakaa kahikahi ya hiki kiti cha kihaju, anawa ndiye huyu mut̯unga jwao. Nae anawapfiika kuntu kwa matsana ya madzi ya mutsangani kuzimu yeyonapfa wantu maisha. Nae Muungu anawafuta mitsozi yao yonse.”