Yakobo 1:17 - Pokomo

¹⁷ Kula chicho chema na kisicho kapet̯a kinayawa kwa Muungu, aumbiye hiḍi dzuwa, mwezi na nyoha. Ela Muungu jeje nkakwaa dza hiḍi dzuwa, mwezi na nyoha, vivyonaperuka-peruka. Na wala nkakwaa dza vivwii vivyonaperuka-peruka!

Yakobo 1:17 Iomraidhean Croise

Matayo 7:11

Haya, ikiwa kwamba nywinywi mwiwo wazuka t̯u, mumanya kuwapfa wana wenu vija vyema vyema, ehe fat̯i Baba jwenu jwa yuwinguni anawahendea wema chima ga, awaḍe weonamuyomba?

Luka 11:13

Haya, ikiwa kwamba nywinywi mwiwo wazuka t̯u, mumanya kuwapfa wana wenu vija vyema vyema, ehe fat̯i Baba jwenu jwa mbinguni anawapfa Ruhu Mudheru myeedha myengaa, awaḍe weonamuyomba?”

Yohana 1:9

Hu muyanga wa ḍugha wa kudzayangaiya wantu wonse, wiwa wakudzani lumwenguni.

Yohana 3:27

Yohana kawambukuya kamba, “Muntu nkawezi kuhenda kintu ikiwa kwamba nkakuwezeswa ni Muungu.

Yohana 3:3

Yesu kamwambukuya kamwamba, “Hachi nyakukwambiani, muntu asidzavyajwa yupfii nkawezi kuunjia Uhaju wa Muungu.”

Yohana 8:12

Kisa Yesu kanena na hawa wantu kawii kawamba, “Mimi ndimi muyanga wa huju lumwengu. Muntu eyenaniuḅa mimi nkawezi kwenenda kizani meshi, ela anawa na hu muyanga wiwonapfa wantu maisha.”

Mahendo 11:18

Wepfosikia hivi, wayatsa hizi alano zao na wamushad̯a Muungu wakyamba, “D̯ubva Muungu kawapfa kupfyehuza mama hat̯a na wantu wa vyeet̯i vingine wapate kukaa mojo!”

Mahendo 5:31

Huyu ndiye apfazijwe hat̯a mukono kuyume wa hila wa Muungu, dza haju na mupfonya, ili awawezese wantu wa Isiraeli wapfyehuze mama na wayatsijwe nabvise zao.

Warumi 6:23

Koro t̯ubvo ḍya kuhenda nabvise ni kufwa. Ela hi t̯ola ya Muungu ayaviyeyo ni maisha ya kuunga na yuungo kuchiiya na kwa Kirist̯o Yesu Ḅwana jwehu.

1 Wakorint̯o 4:7

Akuhendezeye wewe kuwa na maana kuchia wangine ni ga? Muungu siye akupfiye kula kintu wichonacho? Mani d̯ubva, aku kudziona dza kwamba nkukuvipfegwa ni Muungu, nkwa?

2 Wakorint̯o 4:6

Huyu Muungu ambiye, “Nakuyangae muyanga humu kizani,” ndiye jeje ahendezeye muyangawe uhuyangaiye myojoni mwehu. Hu muyanga unahupfa kuyamanya haya marembo ya Muungu, yeyonayangaa humu usoni mwa Kirist̯o.

Waefeso 1:18

Pia nyakumuyombeani kwamba amupfenuye akili zenu, mupate kuyaimuka haya madzikwat̯yo amumpiyeyo epfomuhana muwe wantuwe. Na nyakumuyombeani muweze kumanya haya mema menji na menji aahid̯iyeyo kuyawapfa wantuwe.

Waefeso 2:8

Mupfonywa kwa t̯ei ya Muungu t̯u kwa kwamba mumuhikiza Kirist̯o. Ela ntamukupfonywa kwa dzambo ḍya mema yaḍeyonse muhendeyeyo. Hu mupfonyo mupatiyeo ni t̯ola ya Muungu amumpiyeyo. Ndookomu nakutseewa jwa kudziona.

Wafilipi 1:29

Koro hi hii namfasi maalumu mupfegejweyo, ntamukuipfegwa kwa kumuhikiza Kirist̯o t̯u, ela hat̯a na kwa kukuntiswa d̯ina kwa dzambo ḍyakwe.

1 Timoteo 6:16

Jeje heket̯u ndiye eyenaishi maishi. Anaishi kwiko muyanga usioweza kufikika hafufi. Ntaku muntu amuoneye wala adzeyeweza kumuona. Jeje napfegwe shad̯u na agije kut̯awala hat̯a pfasipfosia! Amina.

Waeburania 13:8

Koro Yesu *Kirist̯o nkadzaperuka. Ni yuyuḍe jwa dzana, yeo, na hat̯a pfasipfosia.

Yakobo 1:5

Muntu akitsowa mvidhyo ya kumanya namuna ya Muungu evyonatsaka huishi, namuyombe Muungu, nae anaimumpa. Koro Muungu akwakumumpani muntu kintu, anakimumpa na mojo mumodza, wala nkawezi kumuajaisa.

Yakobo 3:15

Mvidhyo dzayo ntaiyawe kwa Muungu na wala si ya kiruhu, ni mvidhyo ya kilumwengu iyonayawa kwa Shaat̯ani.

Yakobo 3:17

Ela hi mvidhyo iyonayawa kwa Muungu, nguzi d̯ura inamumpa muntu kuishi maisha yasiyo t̯amba zuka ḍiḍeḍyonse. Kisa, inamumpa kutsaka kuishi na wantu na naghea, inamumpa kut̯aria wenziwe na inamumpa mojo wa kusikiiya na kuhwaa vyuuwo vya wangine. Mvidhyo ya Muungu inamumpa muntu kufwia t̯ei wenziwe na kuwahendea mema kut̯wa, na nkawezi kuwa na uḅaguzi wala umbiimbii.

1 Yohana 1:5

D̯ubva haya hwiyokumusumwiiyani ndiyo haya maagu husikiiyeyo kuyawa kwa huyu Mwana jwa Muungu. Na haya maagu ni kwamba, Muungu ni muyanga, na kuzimuni mwakwe kiza ntakikae.

1 Yohana 4:10

Matsako, ni haya ya kwamba Muungu kahutsaka hat̯a kamuyavya Mwanawe kuwa mvuugiya ya kuyatsijwa nabvise zehu. Si kwamba swiswi hwiimutsaka!

Upfenuo wa Yohana 21:23

Kwa dzambo ḍya kwamba haya marembo ya Muungu yanauyangaza huḍe mudzi, na huyu Mwana Mbuzi ndiyo hi tsaa, huḍe mudzi ntaukuhit̯aḍyi dzuwa ḍya kuuyangaiya wala mwezi.

Upfenuo wa Yohana 22:5

Hukuḍe ntakuwe siku, na hawaḍe weo humuḍe mudzini ntawahit̯aḍyi muyanga wa tsaa wala wa dzuwa, koro Ḅwana Muungu jeje mwenye anawa ndiye hu muyanga wao. Nao wadzat̯awala dza mahaju maishi na maishi.