1 Pet̯ero 1:7 - Pokomo

⁷ Haya maḍemo yadza t̯u, kuzipima hizi faro zenu kuyanga kwamba mumuserefat̯a Muungu ḍugha. Dza vya dhahaḅu ivyonapimwa na kudhereswa na moho, ndivyo vya faro zenu zivyokupimwani na kudhereswa, kuchiiya na kwa haya maḍemo. Na faro zenu kwa Muungu zina thamani kuchia dhahaḅu ambayo nsiku modza idzanangwa. Ndookomu ikiwa kwamba faro zenu zionegwa kwamba ni karit̯u, mudzapata shad̯u, marembo na hila nkuu, nsiku ya Yesu Kirist̯o adzeyokudza.

1 Pet̯ero 1:7 Iomraidhean Croise

Matayo 19:28

Yesu kambukuya kamba, “Hachi nyakumwambiani, hi ngera mpya idzepfofika, yani ngera yangu mimi *Mwana jwa Ad̯amu nidzeyokaa kitini mwa Uhaju, ḅasi nywinywi mwiwo wanafund̯i wangu mudzakaa viti kumi na viwii vya kihaju, mukihukumu vyeet̯i kumi na viwii vya Waisiraeli.

Matayo 25:21

Huyu ḅwana jwakwe kamwamba, ‘Kuhenda urembo muno! Wewe u muhumisi mwema na wiyenahikizika. Nikupfa fwedha kachuchu nawe kuzihendea kazi kwa njia iyonahikizika, ndookomu nakupfa kazi ya kusumamia mambo makuu zaid̯i. D̯ubva tsekea pfamodza nami.’

Matayo 25:23

Huyu ḅwana jwakwe kamwamba, ‘Kuhenda urembo muno! Wewe u muhumisi mwema na wiyenahikizika. Nikupfa fwedha kachuchu nawe kuzihendea kazi kwa njia iyonahikizika, ndookomu nakupfa kazi ya kusumamia mambo makuu zaid̯i. D̯ubva tsekea pfamodza nami.’

Luka 12:33

Guzani mwivyonavyo vyonse na hizi fwedha muziwapfe masikini. Dzilachieni mifuko ya fwedha isiyojara, na mudziwekeye nkandi mbinguni. Huko nkandi zenu zinawa pfantu pfema, koro ntaku wevi wadzeozifikia wala mafunzi ya kuzinanga.

Luka 17:30

Hivyo ndivyo vya wantu wadzevyohenda hat̯a nsiku yangu mimi Mwana jwa Ad̯amu nidzepfokudza.

Yohana 12:26

Yuḍejwonse eyenatsaka kunihumikia ni had̯i aniuḅe mimi, ili hapfaḍe nidzepfowa nae jeje muhumisi jwangu awe hapfo hapfo. Na kula eyenanihumikia, Baba anamukuzya.

Yohana 5:44

Nywinywi mutsaka kushad̯ana nywinywi na nywinywi, na wala ntamulache kushad̯igwa ni huyu eye Muungu jeje heket̯u. Ndiyo maana ntamuwezi kunihikiza mimi.

Mahendo 8:20

Kenge Pet̯ero kamwambukuya kamwamba, “Awe na fwedhazo namunjie mananzini, kwa kut̯ara ya kwamba unaweza kuiguya t̯ola ya Muungu na fwedha.

Warumi 2:10

Kenge kwa hawaḍe wonse weonahenda mema, Muungu kadzawakuzya na kuwapfa hila nkuu na naghea. Na haya haya mambo kadzayawahendea hangu Wayahud̯i mumpaka wantu wa vyeet̯i vingine.

Warumi 2:29

Ela Muyahud̯i jwa ḍugha ni huyuḍe eyenamut̯ii Muungu na mojo. Yani ni huyuḍe ahinyijwe mojoni mwakwe. Hiḍi hiḍi ni dzambo ḍya kiruhu na wala si dzambo ḍya kuuḅa matsoro ya Sharia yorejweyo pfantu. Muntu dzae nkapate shad̯u kuyawa kwa wanaad̯amu, ela anapata shad̯u kuyawa kwa Muungu.

Warumi 2:7

Hawaḍe weonagija kuhenda mema na kulacha kwamba Muungu awakuzye na kuwahendeza wapfegwe hila na kuwa na maisha yasiyosia; wantu dzao, Muungu anawapfa maisha ya kuunga na yuungo.

Warumi 8:19

Koro kula kiumbe cha Muungu aumbiyecho chakuindiiyani na hamu muno hiyo hiyo nsiku ya Muungu adzeyowayanganya hawa wanawe.

1 Wakorint̯o 3:13

Na kuwa na maana ambu kutsowa maana kwa kazi ya muntu, vinamanyikana Nsiku ya Kirist̯o adzepfokudza, yadzepfoyangaa tswee. Koro hiyo hiyo Nsiku, hu moho ndiwo udzeoyanga kazi ya kula muntu. Kuwa na maana ambu kutsowa maana kwa kazi ya muntu kunapimwa na hu moho.

1 Wakorint̯o 4:5

D̯ubva, namutsemukizia muntu hukumu ngeraye isidzafika. Ḅwana ndiye adzeeyavya hukumu nsiku adzeyokudza. Kadzayayavya wekeani tswee hayaḍe yafitsijweyo kizani, na kadzaziyavya nze tswee hizi t̯amaa za myojo ya wanaad̯amu. Kisa kula muntu, Muungu mwenye kadzamumpa hi shad̯umeaye eyonamala kupfegwa.

Yakobo 1:12

Heri muntu eyenapatwa ni maḍemo na akait̯isa! Koro akiit̯isa hat̯a akiyashinda, Muungu anamumpa t̯ubvo ḍya maisha ya kuunga na yuungo. Hiḍi ni t̯ubvo ḍya Muungu aahid̯iyeḍyo kuḍiwapfa hawaḍe wonse wamutsakiyeo.

1 Pet̯ero 1:13

D̯ubva pfenuyani matso muyat̯ariye haya haya urembo, na madzikwat̯yo yenu yonse yawe kwa hi t̯ei mudzeyofwijwa ni Yesu Kirist̯o, adzepfokudza.

1 Pet̯ero 1:5

Kwa dzambo ḍya kumuserefat̯a kwenu, Muungu kakumwamiani na uwezowe, hat̯a saa kudzepfokudza hu mupfonyo wiwo hafufi kuyanganywa kwenu ngera za mwiso.

1 Pet̯ero 2:4

*Kirist̯o ka dza iwe muhimu ḍya mwiso ḍya kumbakia *Hekalu ya Muungu. Katsanigwa dza iwe ḍya thamani ḍya kumbakia ela wantu waḍidziza. Kenge nywinywi nzoni kwakwe.

1 Pet̯ero 2:7

Huyu eye dza iwe ḍya musinji, njwa thamani kwenu nywinywi mumuhikiziyeo. Ela kwa hawaḍe wasiomuhikiza, haya matsoro yamba, “Hiḍi iwe ḍidzizijweḍyo ni wambaka, ndiḍyo ḍigaliyeḍyo iwe muhimu ḍya kumbakia.”

1 Pet̯ero 4:12

Wandugu zangu watsakwa, namutsemaka dza kwamba haya mad̯ina mwiyokukuntani mwakuhendekejwani ni dzambo geni.

1 Pet̯ero 4:13

Ishinu tsekeani kwamba nanywi mwakuyakuntani haya mad̯ina ya Kirist̯o akuntiyeyo, ili kwamba nanywi mudzae tsekea, ngera adzeyokudza na maremboye.

1 Pet̯ero 5:1

D̯ubva nyakumuusiani nywinywi wazee wa matsanganiko, nikimufunda dza muzee mwenzenu, na ninkiwa dza shaahiḍi jwa mad̯ina ya *Kirist̯o akuntiyeyo. Na kawii nyakumuusiani ninkiwa dza mumodza jwa hawaḍe wakupfokea haya marembo ya Ḅwana yadzeyoyanganywa ngera adzeyokudza.

2 Pet̯ero 1:1

Mimi Simioni Pet̯ero, niiye muhumisi na *ntumi jwa Yesu *Kirist̯o, nyakumworeani nywinywi nyonse mumuhikiziyeo Yesu Kirist̯o, eye Muungu na mupfonya jwehu. Yesu kamuhendeza muwe na faro iyo na thamani dza hi ahupfiyeyo swiswi kwa dzambo ḍya wemawe.

2 Pet̯ero 1:4

Na kwa dzambo ḍya haya haya maremboye na memaye, kahuahid̯ia kuhupfa mambo makuu muno ya thamani. Na haya ahuahid̯iiyeyo kayahupfa ili kwamba muweze kuishi dza wana wa Muungu. Haya haya kayamumpa ili muweze kupfona kuyawana na haya mambo yeyonawananga wantu wa huju lumwengu, yeyonayehegwa ni t̯amaa nzuka nzuka.

2 Pet̯ero 3:14

D̯ubva wandugu zangu, hali mwakuindiiyani hiyo hiyo nsiku, hendani kula mwichonaweza ili kwamba adzepfokudza amut̯onge mwakuishini maisha ya kutsaawa na tsowa, wala t̯amba ḍiḍeḍyonse, ela amut̯onge mwakuishini maisha ya naghea.

Yud̯a 1:24

Na sasa Muungu ashad̯we. Jeje ndiye eyenaweza kumut̯unza mutsekudzagwa nabviseni na anamungiza maremboni mwakwe mukiwa na tsekea nkuu muno, koro munawa kwamba ntamu hat̯a kat̯amba ka nabvise.

Upfenuo wa Yohana 1:7

T̯asikiani! Yesu kakudzani! Kakudzani na mawingu na kula dzitso ḍidzamuona. Hat̯a hawaḍe wamusimikiyeo wakimuyaga nao pia wadzamuona. Na vyeet̯i vyonse vimudziziyevyo, vidzasikit̯ika kwa dzambo ḍya kudzakwe. Na ndivyo vidzevyowa! Amina.

Upfenuo wa Yohana 2:10

Mudzakuntiswa d̯ina zaid̯i na zaid̯i mahafufini. Ela namutseshooga. T̯asikiani, Shaat̯ani njwakumuyehea maḍemo ya kuhendeza wangine wenu wangizwe magerenzani. Munawa d̯inani kwa muḍa wa nsiku kumi. Nywinywi hat̯a ni kufwa fwani, ela namutseiyekeza faro yenu. Nami namumpa t̯ubvo ḍya maisha ya kuunga na yuungo.

Upfenuo wa Yohana 3:10

Na kwa kwamba nywinywi muit̯isa dza nivyomuamuru, nami namuchinga ne d̯ina idzeyokudza kuwaḍema wantu wonse weo lumwenguni.

Upfenuo wa Yohana 3:18

D̯ubva nyakumushaurini muguye kwangu dhahaḅu idheresejweyo na moho, mupate kuwa majabva ḍugha. Na guyani mavwazi meupe ya kuvwaa kuyawa kwangu, mupate kuvinga aeḅu yenu. Guyani na d̯awa ya matso kuyawa kwangu ya kungiza humu matsoni mwenu, mupate kuona.