Matthew-ku 27:4 - Tjukurpa Palya

⁴ “Kurangkuṉa nyurala nintinu wati tjukaṟuru iluntankunytjaku.” Kaya palula wangkangu, “Wiya, wampa. Nyuntultanku walytjangkulta kulila! Nganaṉa panya ngurpa. Nyangatja panya nyuntu kulintja!”

Matthew-ku 27:4 Iomraidhean Croise

Exodus 12:31

Ka munga pala palula Piiṟalu wituṉu Mosenya pulanya Aaronnga aḻṯinytjaku munu pitjanyangka pulala wangkangu, “Pakaṟaya ara Israelkunu uwankara! Ngura nganampaya wantikati! Palyaya ankula Mayatja Godanya waḻkunma panya nyura ngaṉmanytju ngayula rawangku tjapiningi.

Matthew-ku 27:19

Munu mayatja paluṟu palumpa tjiya puḻkangka nyinangi, panya tjiya nyara palula nyinara paluṟu aṉangu kutjupa palulakutu katinyangka ngurkantankupai. Ka paluṟu tjiya nyara palulanguṟu tjanala wangkanyangka palumpa kuringku wati kutjupa wituṉu Pilate-ala tjakultjunkunytjaku alatji, “Wati palatja tjukaṟuru mulapa, panya ngayulu palunya mungangka tjukurmanu munuṉa puḻkaṟa nguḻuringkula tjititingangi. Ka palunya wantima iluntankunytjaku wangkanytja wiyangku.”

Luke-aku 23:22

Ka Pilate-alu tjanala piṟuku tjapinu, “Palu nyaanguṟu? Kura nyaa wanyu paluṟu palyaṉu? Palunyaṉa kura puṯu ngurkantananyi iluntankunytjikitjangku. Palyantiṉa tjaultji tjuṯangka wangkaku palunya wiipangka alkaṟa wantir'iyantjaku.”

Luke-aku 23:41

Ngalinyaya kura palyannyangka utitjunu, palu wati nyangangku kura palyantja wiya alatjiṯu, kaya ngunti palunya iluntananyi.”

Luke-aku 23:47

Ka wati tjaultji tjuṯaku mayatjangku nyanga alatjirinyangka nyakula Godanya waḻkuṉu munu wangkangu, “Wati nyanga paluṟu palya mulapa kura palyantja wiya alatjiṯu.”

Johnku 19:7

Kaya Jewku mayatja tjuṯangku palula wangkangu, “Wiya, wati nyanga paluṟunku Godaku katjanmanangi. Ka panya nganampa tjukurpa ngaṟanyi alatji, ‘Aṉangu kutjupangku walytjangku Godanyanmankunyangka palunya iluntanama.’ ”

Acts 13:28

Ka panya nyiringka ngaṉmanytju walkatjunkunytja uwankara alatjiṯu utiringangi. Panya palunyaya kura puṯu ngurkantaṟa wantinytja wiyangku Pilate-alakutu katira ngunti wangkara wituwituṉu palunya iluntankunytjaku, kaya mulapaṯu puṉungka wakaṟa utitjunu. Ka panyaya paluṟu ilunyangka puṉunguṟu mantjiṟa katira kuḻpingka tjunu.

Rome-aku 3:19

Palu Godaku tjukurpa wanyu nganaku tjanampa ngarinyi? Wiya, panya Jew tjuṯalanya ungu, ka nganaṉa wangaṉarangku kulintjaku ngaṟanyi. Ka nganaṉa palumpa tjukurta tungunpungkunyangka Godalu nganaṉanya tjukaṟurungku ngurkantankuku, kala puṯu ngurparingkuku kura tjuṯa ngaṉmanytju palyantjatjanu. Panya Godalu aṉangu uwankara tjunguṟa ngurkantananyi Jew tjuṯa munu Jew wiya tjuṯa kuḻu.

1 Timitjiku 4:2

Palu tjukurpa pala mamu tjuṯaku wati ngunti-wangka tjuṯangku para-tjakultjunkupai aṉangu tjuṯangka. Nyanga paluṟu tjana panya mamutjarangku alatjiṯu rapangku wangkapai kuṉṯa wiyangku.

Tayitatjaku 1:16

Uwa, paluṟu tjana wangkapai alatji, “Nganaṉa Godaku ninti puḻka munula palunya tjukaṟurungku waṉalpai.” Palu wiya, tjana kura kutju rawangku palyalpai, kala nyara palulanguṟu tjananya palyannyangka nyakula mapalku ngurkantankupai munula alatji kulilpai, “Wiya, nyanganpa Godaku ninti wiya ngurpa, munuya palunya wiyanmankupai alatjiṯu.” Uwa, tjana Godala tungunpungkupai munuya puṯu alatjiṯu kulilpai wiṟuṟa palyanyku nyinanytjikitjangku. Nyara palulanguṟula tjananya ngurkantankupai tjana Godaku ngurpa nyinanyangka.

Iipuṟuku 7:26

Panya aṟa nyanga kuwaritjangka Jesunya kutju nganampa tjukurtjara puḻka nyinanyi munu nganampa kutjupa kutjupa uwankara tjukaṟurungku palyalpai. Paluṟu ngaṉmanyitja tjuṯa puṟunypa wiya. Paluṟu panya tjukaṟuru mulapa nyinanyi munu kuralpai wiya alatjiṯu. Paluṟu kuraku ngurpa aṉangu tjuṯa puṟunypa wiya. Paluṟu kutjupa alatjiṯu, palya mulapa. Munu paluṟu mayatja puḻka mulapa uwankarangka waintaṟa nyinanyi Godala tjungu ngura nyara ilkaṟingka.

1 Johnku 3:12

Utila wati panya Kainnga arkalwiyangku wantima panya paluṟu mamuku walytja nyinara palumpa maḻanypa pungkula iluntanu. Palu nyaanguṟu wanyu Kaintu iluntanu? Wiya, kura palyantjatjanungku palumpa maḻanytju wiṟu palyannyangka nyakula pungkula iluntanu.

1 Samuelku 15:24

Ka Saulalu Samuelta wangkangu, “Munta, mulapa ngayulu kura palyaṉu, munuṉa ngayulu Godaku tjukurpa kuliṟa wantingu. Munuṉa nyuntu wangkanyangka palyantja wiyaṯu. Panya ngayulu aṉangu tjuṯaku nguḻuringangi munuṉa tjana wangkanyangka kutju palyaningi. Munuṉa kuwari nyuntula ngatjini ngayunya kura nyanga palyantjitjanguṟu kalypangku wantinytjaku. Wanyu pitja ngayula tjungu Kilkaltakutu, munuli Godanya waḻkula tjungungku nyuntu ngali.” Palu Samueltu wangkangu Saulala, “Wiya, ngayulu nyuntula ankunytja wiya, panya nyuntu Godaku tjukurpa kulintja wiyangku wantingu. Ka kuwari paluṟu ngapartji nyuntunya mayatja puḻka Israelku nyinanytjaku wiyaṉi.”