Matthew-ku 10:41 - Tjukurpa Palya

^41-42 Ka tjinguṟu aṉangu kutjupangku wati Godaku wangkatjara nyakula pukuḻṯu aḻṯira palumpa ngurangka tjunkula kanyilku, ka Godalu nyakula palunya ngapartji wiṟu ungkuku, panya Godalu wangkatjara tjuṯa kutjupa kutjupa wiṟu ungkupai palumpa tjukurpa tjukaṟurungku wangkanyangka, palu puṟunypaṯu Godalu palunya wiṟu ungkuku. Ka tjinguṟu kutjupangku aṉangu tjukaṟuru nyinapainya nyakula pukuḻṯu aḻṯira palumpa ngurangka tjunkula kanyilku, ka Godalu nyakula palunya ngapartji wiṟu ungkuku, panya Godalu aṉangu tjukaṟuru nyinapai tjuṯa kutjupa kutjupa wiṟu ungkupai tjukaṟuru nyinanyangka, palu puṟunypaṯu Godalu aṉangu palunya wiṟu ungkuku. Uwa, mulapa kutjupangku wati wangkatjara tjuṯa munu tjukaṟuru nyinapai tjuṯa kuḻu pukuḻṯu aḻṯinyangka Godalu palunya wiṟu ungkuku. Palu nyangatja nyura kulila, panya kutjupangku aṉangu tjukutjuku ngayuku walytja nyinanyangka nyakula palunya ngaḻṯunytjungku alpamilannyangka Godalu palunya ngapartji wiṟu mulapalta ungkuku. Tjinguṟu aṉangu paluṟu mina wari kutju tjikintjaku ungkuku, ka Godalu nyakula wantinytja wiyangku palunya ungkuku alatjiṯu palumpa pukuḻarira. Nyangatjaṉa mulamulangku wangkanyi.” Alatji Jesulu tjananya iyantjikitjangku wangkara nintiningi palumpa panya nintintja 12.

Matthew-ku 10:41 Iomraidhean Croise

Genesis 20:7

Palu kuwari minyma nyanga palunya maḻakungku uwa wati palumpa kuri. Wati paluṟu panya ngayuku wangkatjara, munu paluṟu ngayula tjapilku nyuntumpa, kaṉanta wantiku iluntankunytja wiyangku. Palu nyuntu maḻakungku ungkuwiyangku wantirampa kulinma panya nyuntu munu nyuntumpa aṉangu tjuṯa uwankara iluku.” Alatji Godalu Pimalikala wangkangu paluṟu ngarira tjukurmankunyangka.

Matthew-ku 16:27

Uwa, nyura ngayunya Watiku Katjanya tiṯutjarangku waṉanma mantatja kutjupa kutjupa tjuṯa wantira, panya ngula ngayulu maḻaku pitjaku angelpa tjuṯatjara. Panya Mamalu ngayunya puḻkaṟa witulyankuku kaṉa pitalytji puḻkangka pitjala aṉangu uwankara ngurkantaṟa tjaralku. Munuṉa wiṟu palyalpai tjuṯa wiṟu mulapa ungkuku munuṉa kura palyalpai tjuṯa paiṟa iyalku ngura kurakutu.

Matthew-ku 25:44

“Kaṉiya wangkaku, ‘Mayatja, puṯula kulini. Panya nyuntunyala nyakunytja wiyaṯu paḻtjatjiratja, mina ilu, malikitja, nikiti, pikatjara munu tjailangka nyinanytja.’

Matthew-ku 25:45

“Kaṉa tjanala wangkaku, ‘Wiya, panya nyura aṉangu kutjupa tjuṯa paḻtjatjiratja, mina ilu, malikitja, nikiti, pikatjara munu tjailangka nyinanyangka nyakula tjananya alpamilalwiyangku wantira ngayunya kuḻu alpamilantja wiyangku wantingi, panya ngayulu mukuringangi nyura ngaḻṯutjara nyara palunya tjananya alpamilaṟa kanyintjaku.’ Alatjiṉa tjanala wangkaku ngayula tjampungka ngaṟanytja tjuṯangka.

Matthew-ku 6:1

“Nyura Godanya tjukaṟurungku waḻkuntjikitjangku kutjupa kutjupa tjuṯa palyalpai, panya nyura palula tjapilpai, munu ngaḻṯutjara tjuṯa mani ungkupai, munu mai wantira nyinapai palunya kulintjikitja. Palu kutjupa tjuṯangku nyanga palunya tjananya palyalpai aṉangu tjuṯangka miṟangka nyakula tjananya mirawaṉinytjaku. Ka nyura tjuṯangka miṟangka palyalwiyangku wantima, panya alatji palyannyangka nyurampa mama ilkaṟitjangku nyakula nyuranya ngapartji wiṟu ungkunytja wiyangku wantiku.

Matthew-ku 6:18

Kaya kutjupa tjuṯangku nyuranya nyakula puṯu kulilku nyura mai ngalkuwiya nyinanyangka. Palu Mamanya kutju nyurampa ninti nyinaku nyura panya kumpilpa palyantjitjaku munu paluṟu nyuranya nyakunytjatjanungku ngapartji wiṟu ungkuku.

Matthew-ku 6:4

Uwa, nyura ungkunytja uti kampangkaṯu alatjiṯu ngaṟama. Panya Mamanya kutju nyurampa ninti nyinanyi nyura panya kumpilpa ungkunytjitjaku, munu paluṟu nyakunytjatjanungku nyuranya ngapartji wiṟu ungkuku.

Matthew-ku 6:6

Ka nyura Mama Godala tjapintjikitja mukuringkulampa nyurampa ngura walytjangka tjarpara tuwa patiṟa kutjungku kumpiltu nyinara palula tjapinma. Panya Mamanya kutju nyurampa ninti nyinanyi nyura panya kumpilpa tjapintjitjaku munu paluṟu nyuranya nyakunytjatjanungku ngapartji wiṟu mulapa ungkuku.

Acts 16:15

Ka palulanguṟu palunya uṟungka tjarpatjuṟa baptise-katingu palumpa walytja tjuṯa kuḻukuḻu, panya paluṟu tjana kuḻu mulamularingu paluṟu wangkanyangka. Ka minyma panya paluṟu nganaṉanya aḻṯingu nganaṉa ankula palumpa waḻingka nyinanytjaku. Alatji paluṟu wangkangi, “Nyura panya kuwari nyangu ngayunya Jesuku mulamularingkunyangka munu palumpa walytjaringkunyangka. Kaya kuwari pitja ngayuku ngurakutu munuya nyara palula nyinama ngayuku waḻingka.” Alatji nyanga paluṟu nganaṉanya wangkara aḻṯingi, kala mulapaṯu anu palumpa waḻikutu munula nyara palula nyinangi.

Rome-aku 16:23

Ka wati ini Kayatjalu kuḻu nyuranya tiṯutjarangku kulilpai nyurampa pukuḻarira. Panya ngayulu palumpa ngurangka nyinanyi. Kaya Jesuku walytja tjuṯa ngura nyanga palula pitjala tjunguringkupai. Ka piṟuku Iṟatjatjalu kuḻu nyuranya tiṯutjarangku kulilpai. Nyanga paluṟu panya mani aṯunymaṟa kanyilpai tawunu nyanga palumpa. Ka nganampa maḻpa Kuwatatjalu kuḻu nyuranya tiṯutjarangku kulilpai.

1 Kaṟintjaku 9:17

Palu tjinguṟuṉa walytjangku kuliṟa waṟkarinytjatjanungku mani mantjintjikitjangku kulinma. Palu palyaṉa Mayatjaku waṟkarinyi panya paluṟu waṟka nyanga palunya ngayunya ungu kaṉa puṯu wantinyi.

Iipuṟuku 6:10

Ka panya Godanya palya mulapa tjukaṟuru ngaṟanyi, munu nyuranya nyanganyi palumpa wiṟuṟa waṟkarinyangka munu paluṟu nyurampa pukuḻarinyi. Paluṟu nyanganyi nyuranya palumpa mukuringkunyangka, panya nyura palumpa walytja tjuṯaku mukuringkupai munu tjananya alpamilalpai. Munu nyura kuwari nyanga alatjiṯu nyinanyi.

2 Johnku 1:8

Kaya nguḻu nyangama kutjupangku nyuranya ngunti kurantjaku-tawara, panya nyura wiṟungku palyaningi Godaku waṟka, munuya wantinytja wiyangku tiṯutjarangku palyalkatima. Ka nyuranya ngula Godalu rawangku nyakunytjatjanungku wiṟu mulapa ungkuku, panya paluṟu ngaṉmanytju kalkuntjatjanungku.