Matthew-ku 1:22 - Tjukurpa Palya

^22-23 Panya tjukurpa nyanga palunya Mayatja Godalu ngaṉmanytju wangkara kalkuṉu wati wangkatjara ini Aitjayala nyanga alatji, “Kungkawaṟa nyiṯayi iṯitjararingkuku munu katja kanyilku, kaya palunya inilku ‘Imanyuwalnga’, panya ini nyanga paluṟu wangkanyi alatji, ‘Godanya nganaṉala tjungu nyinanytja.’ ” Alatji angeltu Josephala wangkangi. Ka mulapaṯu Godalu panya iriti kalkuntjanya utiringu.

Matthew-ku 1:22 Iomraidhean Croise

Matthew-ku 12:17

Palu tjukurpa nyanga Jesulu pikatjara tjuṯa palyaṟunguntja Mayatja Godalu ngaṉmanytju wangkangu wangkatjara ini Aitjayala, ka panya nyiringka iriti walkatjunu nyanga alatji Godalu wangkanytja,

Matthew-ku 13:21

Palu tjana mulamulangku kuruntu tjukurpa mantjintja wiya unytju kutju mulamularingkupai. Panya kutjupa tjuṯangku palunya tjananya ngayuku tjukurnguṟu kuraṟa pungkunyangkaya mapalku paṯuringkula Godaku watarkuripai.

Matthew-ku 13:35

Palu nyanga alatji tjukurpa tjuṯa aṟa kutjupa kutjupa tjuṯatjara wangkanytjaku Godalu ngaṉmanytju tjakultjunu wati wangkatjara kutjupangka ka panya nyiringka iriti walkatjunu nyanga alatji, “Ngayulu nyurala tjukurpa tjuṯa wangkaku aṟa kutjupa kutjupa tjuṯatjara utiṟa wangkanytja wiyangku. Munuṉa tjukurpa kumpilitja tjuṯa nyurala tjakultjunkuku, panya Godalu kuwaripatjaranguṟu alatjiṯu kumpilpa kanyiningi.”

Matthew-ku 2:15

Munu pula rawangku iṯi panya palunya ma-kanyiningi ngura nyara palula Iṟatanya ilunytjaku paṯaṟa. Panya Itjipala ankula nyinanytjaku Mayatja Godalu iriti wangkangu wati wangkatjarangka, ka panya nyiringka walkatjunu nyanga alatji Godalu wangkanytja, “Ngayuku katja Itjipala ankula nyinaku, kaṉa nyara palulanguṟu palunya aḻṯiku maḻaku pitjanytjaku.”

Matthew-ku 2:23

Ka paluṟu mulapaṯu anu munu wirkaṟa nyinangi tawunu ini Nazarethala. Panya aṟa nyanga Nazarethala ankula nyinanytja Mayatja Godalu ngaṉmanytju wangkangu wati wangkatjara tjuṯangka, kaya walkatjunu nyanga alatji, “Wati nyara Godalu kalkuntjanya ngura ini Nazarethala nyinaku, kaya aṉangu tjuṯangku palunya wangkaku wati Nazarethanya nguraṟa.” Ka Josephalu Jesunya Nazarethalakutu katinyangka tjukurpa nyanga paluṟu mulapaṯu utiringu.

Matthew-ku 5:17

“Tjinguṟu nyura ngayunya alatji kulini, ‘Nyangatja-manti pitjangu tjukurpa panya Mosenya ungkunytja munu wati wangkatjara tjuṯa kuḻu ungkunytjanya wiyantjikitjampa.’ Palu wiya, ngayulu tjukurpa palunya tjananya wiyantjikitja pitjanytja wiya, palu panya tjana iriti wangkanytjitja palyantjikitjaṉa pitjangu.

Matthew-ku 8:17

Panya aṟa nyanga Jesulu aṉangu tjuṯa palyaṟunguntja Godalu ngaṉmanytju wangkangu wangkatjara ini Aitjayala, ka panya nyiringka iriti walkatjunu nyanga alatji, “Nyara paluṟu nganaṉanya ngalkiṟa nganampa pika tjuṯa mantjinu munulanya wankaṟunu.”

Luke-aku 21:22

Panya nyiringka iriti walkatjunkunytja ngaṟanyi pika nyanga palu puṟunypa ngula Judeala utiringkunytjaku.

Luke-aku 24:44

Munu tjanala wangkangu, “Panyatja nyura kulini, panya ngayulu ngaṉmanytju nyurala nyinara wangkanytja? Panya Moselu tjana wangkatjara kutjupa tjuṯangku tjukurpa ngayunyatjara walkatjunu, munu Psalm tjuṯangka kuḻu Davidalu tjana ngayunyatjara walkatjunu. Ka panyaṉa nyurala ngaṉmanytju wangkangu tjukurpa nyanga paluṟu tjana uwankara ngula utiringkuku.”

Johnku 10:35

Nyangatja paluṟu iriti wangkangu aṉangu tjuṯangka, kala mulamularinganyi tjukurpa nyanga palumpa nyiri miḻmiḻṯa ngarinyangka, panya Godaku tjukurpa tjukaṟuru alatjiṯu.

Johnku 15:25

Ka tjukurpa nyanga palu puṟunypa nyiringka iriti walkatjunkunytja ngarinyi alatji, ‘Ngayukuya unytju alatjiṯu wiyanguṟu kuraringu.’ Ka tjukurpa nyanga paluṟu kuwari utiringu.

Johnku 17:12

“Uwa, nyuntu panyaṉin tjunu witulya puḻka nyinanytjaku, kaṉa mulapa tjanala tjungu nyinara witulya puḻkangku tjananya aṯunytju kanyiningi kutjupa kawalinkunytja wiyangku. Palu panya Judasanya kutju kawankatingu, panya ngaṉmanytju nyiringka iriti walkatjunu paluṟu kawankatinytjaku, ka panya mulapa alatjiringu.

Johnku 18:9

(Jesulu nyanga alatji wangkanyangka tjukurpa panya paluṟu ngaṉmanytju wangkanytja utiringu, paluṟu Mamala ngaṉmanytju tjapiṟa alatji wangkanytja, “Mama, wati nyanga tjuṯa panya nyuntu ngayunya ungkunytjaṉa kawalinkunytja wiyaṯu.”)

Acts 3:18

Panya ngaṉmanytjuya Godaku wangkatjara tjuṯangku Jesunya pikatjararingkunytjaku nyiringka walkatjunu, ka mulapa tjana panya ngaṉmanytju walkatjuṟa wantinytja alatjiṯu utiringu.

Rome-aku 1:2

Panya paluṟu tjukurpa nyanga palunya iritilpi kalkuṉu, ka panyaya palumpa wangkatjara tjuṯangku kuliṟa walkatjunangi nyiri panya miḻmiḻṯa. Kaṉa tjukurpa nyanga palunya kuwari wangkanyi.

Revelation 17:17

Panya Godalu tjananya mayatja 10-pa kutjuṉu tjana tjunguringkula mamu panya palunya wangkara mayatja puḻkanmankunytjaku, ka mamu paluṟu uwankara kanyilku Godalu ngaṉmanytju wangkanytja tjuṯa utiringkunytjaku paṯaṟa.