Itjikilku 34:4 - Tjukurpa Palya

⁴ Munu nyura kutjupa tjuṯa uparingkunyangka nyakula palunya tjananya kuṉpuṟa kanyilpai wiya, munu kutjupa tjuṯa pikatjararingkunyangka nyakula nyura palyanyku kanyilpai wiya. Munu nyura kutjupa tjuṯa puṉungku wakannyangka nyakula paṉṯitjingka karpintja wiyangku wantipai, munu nyura kutjupa tjuṯa pakuringkula wawanyarinyangka nyakula ankula palunya tjananya pakaltjingaṟa katinytja wiyangku wantipai, munu nyura kawankatinytja tjuṯa kuḻu para-nguriṟa mantjiṟa katira tjunguntja wiyangku kuḻu wantir'iyalpai tjana kawalirinytjaku. Mulapa nyura palunya tjananya pauntjingaṟa kanyilpai mukulya wiyangku.

Itjikilku 34:4 Iomraidhean Croise

Aitjayaku 1:5

Uti nyura Godala rawangku tungunpungkuwiyangku wantima, ka paluṟu nyuranya ngapartji pikantankunytja wiyangku wantiku. Palu nyura tjinguṟu mukuringanyi Godalu nyuranya rawangku pikantankunytjaku. Wanyu nyurayanku walytjangku nyawa! Panya nyura ngaṉmanypa alatjiṯu pikatjara ngaṟangi kurunpa upa ka nyuranya kata, kultu, tjunta, tjina kuḻu puntu winki pungkunytja pungkunytja puṟunypa pikatjara ngaṟanyi paḻkunpa tjuṯatjara, panya kura palyannyangka Godalu nyuranya rawangku pikantanangi ka nyura nyaaku Godalu nyuranya piṟuku pikantankunytjaku mukuringanyi?

Itjikilku 34:16

“Nyangatjaṉa mulamulangku palyalku ngayulu Mayatja Godalu. Ngayuluṉatju kawankatinytja panya tjuṯa waṉaṟa nguriṟa mantjiṟa katira tjungulku, munuṉatju punkaṟa kaṯakatinyangka nyakula tjananya paṉṯitjingka karpilku, munuṉa uparingkunyangka nyakula tjananya ngaḻṯunytjungku kuṉpulku. Palu panya kaṉpi puḻka tjuṯa munu kuṉpu tjuṯa kuḻu ngayulu wiyalku, panya ngayuluṉatju tjapata wiṟu tjiipi tjuṯa tjukaṟurungku aṯunymaṟa kanyilpai.

Matthew-ku 10:6

Palu nyurampa walytja tjuṯakutu kutjuya ara aṉangu panya Israelkunu tjuṯakutu, panya paluṟu tjana tjiipi kawalirinytja tjuṯa puṟunypa nyinanyi kutjupangku aṯunymankunytja wiya.

Matthew-ku 21:35

Kaya wati kaana aṯunymankupai tjuṯangku wati panya iyantja maṉkurpa nyakula witiṉu munuya kutju pungu munu kutjupa iluntanu munu kutjupa apungka atuṉu.

Matthew-ku 24:49

Munu palulanguṟulta pitjanytja wiya ngaṟanyangka paluṟu wati waṟka panya kutjupa tjuṯa pikangku pungkuku munu mai puḻka kuḻu ngalkula waina puḻka tjikiṟa taṟangkariku.

Matthew-ku 9:36

Munu paluṟu aṉangu winki nyakula tjanampa puḻkaṟa ngaḻṯuringu, panya puṯuya kuliningi munuya tjiipi kawalirinytja tjuṯa puṟunypa watarku para-para-ngaṟangi tjapatangku tjananya aṯunymankunytja wiya.

2 Kaṟintjaku 1:24

Palu ngali panya mayatjarira wangkara nyuranya mulamularingkunytjaku uṉṯuntja wiyangku wantingi. Panya nyura ngaṉmanypa alatjiṯu Jesuku mulamularingu munu nyura kuṉpungku palunya tiṯutjarangku waṉaṉi. Nyara palulanguṟuli nyurala tjungu waṟkarinytjikitja mukuringanyi nyura pukuḻpa nyinanytjaku.

Iipuṟuku 12:12

Uwa, kulinmaya nyangatja munuya kuṉpungku tungun-tunguntu Jesunya waṉanma. Tjinguṟu nyura maṟa waḻpa-waḻparingkula muṯi tjititingkula pakuringanyi, palu paku nyanga palunya kulintja wiyangku wantira Jesunya rawangku tungun-tunguntu waṉanma.