Itjikilku 34:18 - Tjukurpa Palya

^18-19 Panya tjiipi kaṉpi puḻka tjuṯangku uti tjiipi kutjupa tjuṯa aṯunymaṟa kanyinma, palu tjana ukiṟi puḻka nyakula tjana-waraṟa pitjala ngalkupai munuya paḻtjaringkunytjatjanungku ukiṟi kutjupa tjana wantinytja pirpuntaṟa wantikatipai, kaya maḻa tjiipi kutjupa tjuṯangku pitjala nyakupai, ‘Munta! Nyangatja kaṉpi tjuṯangku ngaṉmanytju pitjala ngalkula pirpuntaṟa wiyaṉu.’ Ka palu puṟunypa tjiipi panya kaṉpi puḻka tjuṯa mina kaḻṯaṟa wiṟungka tjana-waraṟa wirkankupai munuya tjikiṟa tjaḻapungkula mina panya tjunpinpi palyalpai. Kaya maḻatja panya tjuṯangku tjikintjikitjangku pitjala nyakupai mina tjunpinpi ngarinyangka kaḻṯaṟa wiya. Ngaḻṯutjara! Panya paluṟu tjana maḻatjangku ukiṟi kurakura ngalkupai munuya mina kurakura tjikilpai tjunpinpi ngaṉmanyitja tjuṯangku kuraṟa wantikatinytja.

Itjikilku 34:18 Iomraidhean Croise

Genesis 30:15

Ka Liyalu wangkangu, “Wiya, nyuntu panya ngayuku wati ngaṉmanytju angatjunu, munun nyaaku piṟuku ngayuku nyanga katjaku puṉuku ngatjini?” Ka palulanguṟu Raitjiltu palula wangkangu, “Palu nyuntu puṉu pala palunya ngayunya ungkulampa palya Jacobala ngariku munga nyanga kuwari. Palya?”

Maikaku 2:2

Munuya paluṟu tjana aṉangu kutjupaku mantaku mukuringkula tjanalanguṟu tjulyalpai alatjiṯu mai kuka puluka tjiipi winki. Munu tjana waḻi walytjatjaraku mukuringkula tjarpapai alatjiṯu. Munuya ngunti wangkara wati kutjupaku ulytja kuḻu tjulyaṟa walytjaringkupai.

Matthew-ku 23:13

Munu palulanguṟu Jesulu Moseku tjukurpa nintilpai tjuṯa munu Paṟatji tjuṯa kuḻu puḻkaṟa nguḻutjunangi alatji wangkara, “Nyura ngunti palya-palku kaṉany-kaṉanypa nyinapai tjuṯa! Nyara palulanguṟu nyurampa pika puḻka mulapa ngaṟaku! Panya nyura aṉangu tjuṯangka wangkara nintinnyangka kutju tjana kulilpai Godaku walytjaringkunytjikitjangku. Palu nyura Godala tungunpungkula palunya mulamulangku waṉantja wiyangku wantipai, munu kutjupa tjuṯa palumpa walytjaringkunytjaku-tawara nyura tiṯutjara anga-ngaṟanyi tjanala tjukaṟurungku nintintja wiya.

Luke-aku 11:52

“Uwa mulapa pika puḻka mulapa nyurampa ngaṟaku Moseku tjukurpa nintilpai tjuṯaku. Panya nyura aṉangu tjuṯangka wangkara nintinnyangka kutju tjana kuliṟa Godaku iwaraku nintiringkupai, palu nyura Godala tungunpungkula iwara pala palunya waṉantja wiyangku wantipai, munu kutjupa tjuṯangku kuḻu iwara pala palunya waṉantjaku-tawara nyura tiṯutjara anga-ngaṟanyi, tjanala tjukaṟurungku nintintja wiya.” Alatji Jesulu tjananya wangkangu.