Ipitjaku 4:17 - Tjukurpa Palya

¹⁷ Kulilaya! Ngayuluṉa Mayatjanya waṉaṟiṟa kulilpaingku nyuranya wangkara paini nyura aṉangu watarkitja tjuṯa puṟunypa nyinanytja wiyangku wantinytjaku, panya paluṟu tjana Godaku ngurpangku tjukurpa kurakura tjuṯa kutju kulilpai.

Ipitjaku 4:17 Iomraidhean Croise

Luke-aku 16:28

Panya ngayuku maḻanypa 5 nyinanyi nyara palula paluṟuwi tjananya wangkara nguḻutjingala ngura nyanga kurakutu pitjanytjaku-tawara.’

Acts 14:15

“Aṉangu tjuṯa! Nyaaku nyura nyanga alatjinanyi? Panya ngali aṉangu alatjiṯu nyuranya puṟunypa, munuli pitjangu Tjukurpa Palya Jesunyatjara nyurala tjakultjunkunytjikitja. Wanyuya ngunti kulilwiyangku wantima munuya God panya wankaku mukuringama, panya paluṟu ilkaṟi, manta, uṟu kuḻu paluṉu munu ilkaṟitja, mantatja, uṟutja uwankara kuḻu.

Acts 18:5

Ka nyara palula-aṟangka Tjaalatjanya pula Timitjinya wirkanu manta nyara Matja-tuniyalanguṟu. Ka paluṟu pula wirkankunyangka, Paulalu tjiṉṯu uwankarangka tjukurpa Jesunyatjara rawangku wangkangi aṉangu Jew tjuṯangka, munu paluṟu alatji wangkangu, “Panya Godalu kalkuntjitjanya pitjangu aṉangu tjuṯa wankaṟunkunytjikitja. Nyanga paluṟu ini Jesunya.”

Acts 2:40

Munu piṟuku Peterlu tjanala tjukurpa kutjupa tjuṯa wangkangi tjananya nguḻutjunkunytjikitjangku munu alatji wangkangu, “Kulilaya! Kura puḻka mulapa ngula ngaṟaku aṉangu kura tjuṯaku, panya Godalu tjananya paiṟa iyalku ngura kurakutu. Kaya palula-tawara kuwari Godalakutu aṟuriwa paluṟu nyuranya wankaṟunkunytjaku.”

Acts 20:21

Munuṉa aṉangu uwankarangka rawangku wangkapai Jew tjuṯangka munu Jew wiya tjuṯangka kuḻu tjana kura palyantjatjanungku wantira kuṉṯaringkula Godalakutu pitjanytjaku munu Jesuku Christaku mulamularingkunytjaku. Uwa, nyura ninti nyanga palumpa tjanampa.

Rome-aku 1:21

Panya paluṟu tjana Godaku ninti nyinangi, palu nyara palunyaya puḻkanmankunytja wiyangku wantingi, munuya palumpa pukuḻarira palunya waḻkuntja wiyangkuṯu wantingi. Munuya palulanguṟu tjukaṟurungku kulintja wiyaringu munuya pina pati alatjiṯu nyinangi.

1 Kaṟintjaku 1:12

Alatjiṉa kulinu tjana wangkanyangka, kutjupa tjarangkuya kunyu wangkapai, “Nganaṉa Paulala tjungutja.” Kaya kunyu kutjupa tjarangku wangkapai, “Wiya, nganaṉa wati Apalatjala tjungutja.” Kaya kunyu kutjupa tjarangku wangkapai, “Wiya, nganaṉa Peterla tjungutja.” Ka tjara kutjupangku wangkapai, “Wiya, nganaṉa Christala tjungutja.”

1 Kaṟintjaku 15:50

Uwa walytja tjuṯa, nyura kulini? Panya nganaṉa ngula Godaku ngurakutu puntu nyanga nganaṉa kuwari nyinanytjanya ankunytja wiya. Panya puntu nyanga paluṟu ilura mantaringkupai. Palulanguṟula puntu winki puṯu ngura ilkaṟitjangka tjarpaku wanka tiṯutjara nyinanytjikitja.

2 Kaṟintjaku 9:6

Uwa, mani ungkunytjikitjangkuya wanyu tjukurpa kampa kutjupa kulila tjukurpa nyangatja! Tjinguṟu ngayulu uṉinypa maṉkurpa mantangka tjunkuku munuṉa ngula mai kuṟuringkunyangka maṉkurpaṯu mantjilku. Palu ngayulu uṉinypa tjuṯa tjunkunytjatjanungku mai kuṟuringkunyangka tjuṯa mulapalta mantjilku.

Kalaitjiyaku 3:17

Nyaaṉa wanyu wangkaku nyura uti kulintjaku? Wiya, nyangatjaya kulila. Panya ngaṉmanytju alatjiṯu Godalu Aipuṟamanya kalkuṉu, munu palulanguṟu yiya 430 ngaṟala wiyaringkunyangka maḻangka kutju tjukurpa puḻka Mosenya ungu. Palu tjukurpa panya maḻa ungkunytjalu puṯu kampa kutjupa palyaningi tjukurpa panya ngaṉmanytju kalkuntjanya. Panya kalkuntja paluṟu waintaṟa alatjiṯu ngaṟaku tiṯutjara.

Kalaitjiyaku 5:3

Wanyu wanti kaṉa piṟuku nyurala utiṟa wangka. Panya nyura Jew tjuṯa puṟunypa watiringkunytjikitja mukuringkula nyura uti Moseku tjukurpa uwankara kuliṟa palyanma watiringkula kutju nyinanytja wiyangku, panya uwankara palyalwiyangku wantinyangkampa Godalu nyuranya puṯu tjukaṟurunmankula walytjanmananyi.

Ipitjaku 1:22

Uwa, Godalu palunya Mayatja puḻka tjunu, ka uwankara palula tjaṟu ngaṟanyi, ka paluṟu uwankara mayatjangku kanyini. Munu palulanguṟu uwankara mayatjangku kanyiṟa paluṟu palumpa walytjapiti mauṉṯalpa wiṟuṟa aṯunymaṟa kanyini.

Ipitjaku 4:22

Nyara palulanguṟu nyura palumpa nintiringkunytjatjanungku uti kura tjuṯa wantima rawangku palyantja wiyangku. Panya ngaṉmanytju nyura kura tjuṯaku mukuringkula nyanga palu puṟunypa tjuṯa palyaningi, munu nyura kuraringkula kura kutju palyalkatingi ilunytjakutu-wangkara alatjiṯu.

Kalatjiku 2:18

Uwa, ngunti wituwitulpai tjuṯangkaya kulilwiyangku wantima! Panya paluṟu tjanaya kaṉany-kaṉanytju alatji ngunti wangkapai, “Nganaṉanya puṟunytjuya Godanya waḻkunma kurunpa tjaṟuringkula, munuya angelpa tjuṯa kuḻu waḻkunma!” Palu alatjiya ngunti wituwitulpai, munuya kuliṟa wantinyangka nyuranya aṉanguṟa wangkapai. Ka uti nyura tjananya kulilwiyangku wantima, panya tjana tjukurmaṟa nyakunytjatjanungku tjukaṟurungku-palku wangkapai. Tjana kaṉany-kaṉanytju wangkapai nintingku-palku, palu tjana walytjangku kuliṟa wangkapai Godalanguṟu wiya.

Kalatjiku 2:4

Ka kutjupa tjuṯangku tjinguṟu nyuranya ngunti kuralku wiṟu-palku wangkara, kaṉa nyurala tjukurpa nyangatja wangkanyi nyura tjukaṟurungku kuliṟa tjanala kulilwiyangku wantinytjaku panya ngunti wangkapai tjuṯangka.

1 Tjitja-lanikaku 4:6

Munu nyura uti wati Jesuku walytja kutjupaku kuriku nyakula mukuringkuwiyangku wantima, panya nyura alatji palyaṟa wati palunya kuraṉi palumpa kuriku mukuringkula. Ka panya Mayatja Jesulu pika puḻka mulapa ungkuku kura nyanga palu puṟunypa palyannyangka. Tjukurpa nyanga palunya panyala nyurala ngaṉmanytju wangkara nguḻutjunu, kaya wangaṉarangku kuliṟa kuri walytjangka kutju tjukaṟuru nyinama.

1 Timitjiku 5:21

Uwa, ngayulu nyanga nyuntunya uwankara wangkara wituwituṉi. Ka nyuntu wiṟungku kulinma uwankara palyantjikitjangku. Panya ngayulu nyangaṉa nyuntunya wangkanyi Godala miṟangka, munu Jesula angelpa tjuṯangka miṟangka kuḻu. Ka nyuntu nyangatja kuliṟa aṉangu Godaku walytja uwankara wangkara tjukaṟurunma mauṉṯaṟa tjarangka kutju wangkanytja wiyangku, uwankarangkaṯu wangkama. Tjinguṟu kutjupangku kura palyaṉi, ka nyuntu wangkara tjukaṟurunma munun tjinguṟu piṟuku tjukurtjarangku, tjinguṟu iltangku kura palyannyangka nyakula palu puṟunytjuṯu wangkara tjukaṟurunma, tjukurtjara munu ilta nyinanyangka wantinytja wiyangku. Munu kutjupa-aṟa unytjungku paintja wiyangku wantima wiṟuṟa nyinanyangka. Palu uwankara palu puṟunytju wangkara tjukaṟurunma uwankarangku tjukaṟurungku kulintjaku.

1 Timitjiku 6:13

Uwa, Godalu panya uwankaraṯu wankaṟu kanyilpai. Kaṉa palula miṟangka nyuntula wangkara nyuntunya wituwituṉi Jesula Christala miṟangka kuḻu. Panya paluṟu Pontius Pilate-ala ngaṟala tjukurpa wiṟu wangkangu mungaṯu. Uwa, palula pulala miṟangkaṉanta wangkanyi alatji, nyuntu ngayulu wangkara wituwituntja uwankara wangaṉarangku kuliṟa palyanma rawangku Mayatja Jesunya Christanya maḻaku pitjanytjakutu-wangkara.

2 Timitjiku 4:1

Uwa, ngula Jesulu mayatja puḻka mulatu maḻaku pitjala aṉangu uwankara ngurkantaṟa tjaralku ngaṉmanypa ilunytja tjuṯa munu wanka nyinanytja tjuṯa kuḻu. Kaṉa nyara palulanguṟu nyuntunya kuwari wangkanyi Godaku tjukurpa aṉangu tjuṯangka tjakultjunkunytjaku pakuringkuwiyangku. Nyangatjaṉa Godala munu Jesula Christala miṟangka nyuntunya wangkanyi, ka mulamulangku kuliṟa wangkama. Kaya tjinguṟu kuliṟa pukuḻariku, munta tjinguṟuya kuliṟa wantiku. Palu nyuntu tjanala wangkama alatjiṯu wantinytja wiyangku. Munu tjananya kura palyannyangka nyakula painma kura wantinytjaku, munu tjananya wangkara kuḻu tjukaṟurunma Godalawanu tjukaṟuru palyanyku nyinanytjaku. Palu tjananya purkaṟangku wangkara nintinma mukulyangku mirpaṉarinytja wiyangku tjana kuliṟa wangaṉararingkula Jesunya tjukaṟurungku waṉantjaku.

1 Peterku 1:18

Nyura panya tjamuku aṟangka ngaṉmanypa nyinangi, palu aṟa nyara palulawanu nyinara nyura iwara kura puṯu wantikatingi. Ka panya kuwari nyuranya Godalu iwara kurangka ngaṟanyangka mantjiṟa iwara palyangka tjunu palumpa walytjaringkunytjaku. Palu kulilaya, yaaltji-yaaltjingku Godalu nyuranya kurangka ngaṟanyangka mantjinu munu wankaṟunu? Paluṟu wanyu mani puḻka ungkula nyuranya mantjinu? Wiya, panya mani mantatja kutju unytju ngaṟala wiyaringkupai. Palu panya Godalu nyuranya mantjinu Jesula Christalawanungku panya paluṟu puṉu kaṯakutjarangka milkaḻi tjutinytjitjanguṟu. Nyara paluṟu panya lamalama wiṟu mulapa ungkunytja puṟunypa, panya wati tjukurtjarangku nganampa kuranguṟu lamalama pungkula Godanya ungkupai palunya pukuḻmankunytjikitjangku, nyara palu puṟunypa Jesunya nganampa lamalama wiṟu mulapa ngalkilpa ilungu Godalu nganaṉanya kura tjuṯa palyantjitjanguṟu kalypangku pungkuwiyangku wantinytjaku. Jesunya milkaḻi tjutinytjitjanguṟu Godalu wiṟu mulapa nganampa palyaṉu nganaṉa iwara kuranguṟu kaṟalyarira iwara palyangka ankunytjaku Godaku walytja mulapa.

2 Peterku 2:18

Panya tjana kaṉany-kaṉanytju kurakura tjuṯa tiṯutjarangku wangkapai. Munuya aṉangu kuwari kutju Jesuku walytjaringkunytja tjuṯa wangkara mukumukulpai paluṟu tjana piṟuku kura panya palunya tjananyaṯu palyantjaku, panya tjana ngaṉmanytju Jesuku walytja wiyangku palyaningi, panya palunya tjananya palyantjaku tjananya piṟuku wituwitulpai.