Danielku 12:13 - Tjukurpa Palya

¹³ Ka Daniel, nyuntu rapa kuṉpu ngaṟama ilunytjakutu-wangkara nguṟurpaṯu wiyaringkunytja wiya. Panya nyuntu ngula ilura mantangka miri ngarinyangka Godalu nyuntunya wankaṟa pakaltjingalku, mununta wiṟu mulapalta ungkuku paluṟu nyuntumpa kanyintjatjanungku.” Nyanga palunyaṉi angeltu wangkangu.

Danielku 12:13 Iomraidhean Croise

Psalm 1:5

Uwa, tjanampa kuranguṟu Godalu ngula tjananya ngurkantaṟa tjaralku palumpa walytja tjuṯanguṟu mauṉṯalpa nyinanytjaku, kaya ngura kurangka tiṯutjara nyinaku. Ka Godalu palumpa walytja tjuṯa aṯunymaṟa kanyilku palula wangaṉarangku kulilpai tjuṯa.

Exodus 33:14

Ka Mayatja Godalu wangkangu, “Wiya, palya ngayulu nyurala tjungu ankula nyuranya rapalku.”

Danielku 12:3

Ka panya kililpi tjuṯa irnyalpai ilkaṟingka, pala palu puṟunypa aṉangu nintipuka tjuṯa pitalytji puḻkatjara tiṯutjara wiṟuṟa irnyalku. Paluṟu tjana aṉangu tjuṯa nintilpai Godanya wangaṉarangku kulintjaku.” Nyanga palunya tjananyaṉi angeltu utiṟa tjakultjunangi.

Danielku 12:4

Munuṉi palulanguṟu ngayunya wangkangu, “Daniel, nyiri pala ini tjuṯatjara kiṯingka tjakatjuṟa patiṟa wanti, ka kumpilpa tiṯutjara alatjiṯu ngarima tjiṉṯu maḻatjangka kutju aḻaṟa nyakunytjaku. Kaya aṉangu tjuṯangku rawangku puṯu ngurilku tjukurpa nyanga palumpa nintiringkunytjikitjangku.”

Matthew-ku 19:28

Ka Jesulu wangkangu, “Ngula manta ilkaṟi nyangatja wiyaringkunyangka Watiku Katjanya mayatja puḻka tjiya wiṟungka nyinaku manta ilkaṟi kuwaritjangka. Ka nyura ngayuku nintintja panya 12 palu puṟunypaṯu tjiya wiṟu tjuṯangka kutju kutju nyinaku munu nyura aṉangu panya Israelkunu tjuṯa mayatjarira kanyilku walytjapiti kutju kutju wati panya Jacobaku katja 12-nguṟu.

Luke-aku 21:36

Ka uti nyura rawa aḻa-aḻa nyinama munuya rawangkuṯu Godala tjapilkatima nyuranya ngalkintjaku pika nyanga kutjupa kutjupa tjuṯanguṟu. Munuya palula tjapinma nyuranya kuṉpuntjaku, ka nyura tiṯutjarangku ngayunya tjukaṟurungku waṉanma ngayulu Watiku Katjanya nyurampa pukuḻarinytjaku tjiṉṯu maḻatjangka.”

2 Kaṟintjaku 5:1

Panya mantangka nyanga nyinara nganaṉa kurunpa puntu winki nyinapai, panya nganaṉa wiltjangka tjarpara nyinapai, palu puṟunypa nganaṉala kurunpa puntungka unngu nyinanyi. Palu ngula nganaṉa ilunyangka Godalu puntu kuwaritjangka nganaṉanya tjarpatjunkuku paluṟu palyantjitjangka, kala puntu palunyatjara palumpa ngurangka tiṯutjara wanka nyinaku.

2 Tjitja-lanikaku 1:7

Munu paluṟu nyuranya pukuḻmaṟa wiṟuṟa kanyilku nganaṉanya kuḻu nyurala tjunguṟa, ka nyuntunya nganaṉanya puṯu piṟuku pikatjaralku. Panya Godalu nganaṉanya alatjinkuku ngula tjiṉṯu maḻatjangka Mayatja Jesunya ilkaṟinguṟu pitjanyangka. Panya nyara palula aṟa paluṟu witulya puḻka mulapa pitjaku angelpa mungilyitjara waṟu winkitjara puḻkaṟa nguḻuringkunytjaku.

Revelation 14:13

Kaṉa piṟuku wangka kulinu ilkaṟinguṟu ngayula wangkanyangka nyanga alatji, “Walkatjura nyiringka tjukurpa nyanga palunya! ‘Kuwaringuṟuya Jesuku walytja tjuṯa kutjupa tjuṯangku iluntankunyangka tjana pukuḻpa mulapa nyinaku.’ ” Ka Kurunpa Miḻmiḻṯu kuliṟa wangkangu, “Uwa mulapa, panya tjana Godaku waṟka puḻka palyantjatjanu tjana paku wiyaringkula pukuḻpa mulapa tiṯutjara nyinaku.”