1 Timitjiku 1:15 - Tjukurpa Palya

¹⁵ Ka kulila wangka nyangatja, “Jesunya Christanya mantakutu pitjangu aṉangu tjuṯa kura palyantjitjanguṟu wankaṟunkunytjikitja.” Wangka nyanga paluṟu mulapa alatjiṯu, nganaṉa wangaṉarangku kuliṟa mulamularingkunytjaku. Palu ngayulu panya kura puḻka mulapa palyaningi uwankarangka waintaṟa.

1 Timitjiku 1:15 Iomraidhean Croise

Matthew-ku 1:21

Ka paluṟu iṯi katja kanyilku, ka kanyinnyangka nyuntu palunya inila Jesunya panya ini nyanga paluṟu wangkanyi alatji, ‘Paluṟu palumpa walytja tjuṯa wankaṟunkuku Godalu tjananya kura tjuṯa palyantjitjanguṟu pungkula wiyantjaku-tawara.’ ”

Matthew-ku 18:10

Munu Jesulu piṟuku tjanala wangkangu, “Tjitji tjukutjuku nyanga puṟunypaya analwiyangku wantima, panya ngura ilkaṟingka nyanga palumpa tjanampa angelpa tjuṯa ngayuku mamangka tjungu tiṯutjara nyinanyi.”

Matthew-ku 20:28

Tjinguṟu nyura kulini Watiku Katjanya-manti pitjangu mayatjarira aṉangu tjuṯa waṟkaku wituwituntjikitjampa. Palu wiya, ngayulu pitjangu aṉangu tjuṯaku waṟka puḻka palyaṟa tjanampa ngalkilpa ilunytjikitja tjana wankaringkunytjaku.” Alatji paluṟu wangkangi palumpa nintintja tjuṯangka.

Matthew-ku 9:13

Wanyu kaṉa tjukurpa nyangatja nyurala tjakultjura, kaya kuliṟa nintiriwa, panya nyiringka iriti walkatjunkunytja ngaṟanyi Godalu wangkanytja alatji, ‘Palya nyura tjinguṟu kuka pungkula tiliwakaṟa ngayunya ungama, palu nyangaku kuḻuṉa puḻkaṟa mukuringanyi nyura aṉangu kutjupa tjuṯaku ngaḻṯuringkula tjananya rawangku alpamilantjaku. Nyanga alatji palyannyangka nyakulaṉa puḻkaṟa pukuḻariku.’ Alatji Godalu iriti wangkangu, kaṉa ngayulu nyanga palunya palyantjikitja mantakutu pitjangu aṉangu panya Moseku tjukurwanu nyinapai tjuṯa aḻṯinytjikitja wiya, palu aṉangu nyanga nyura nyakula wantipai tjuṯa aḻṯinytjikitjaṉa pitjangu tjana ngayunya waṉaṟa Godala tjunguringkunytjaku.”

Markaku 2:17

Ka Jesulu tjananya kuraringkula wangkanyangka kulinu munu tjanala wangkangu alatji, “Kulila, aṉangu palya tjuṯa wanyu ngangkaṟiku mukuringkupai? Wiya, palu pikatjara tjuṯa kutjuya mukuringkupai. Panya ngayulu pitjangu Moseku tjukurwanu nyinapai tjuṯa aḻṯinytjikitja wiya, palu aṉangu nyanga nyura nyakula wantipai tjuṯakuṉa pitjangu tjananya aḻṯira ngayula tjunguntjikitja.”

Luke-aku 15:2

Kaya Paṟatji tjuṯangku munu wati Moseku tjukurpa nintilpai tjuṯangku kuḻu nyakunytjatjanungku mirpaṉ-mirpaṉṯu wangkangi, “Wati nyangatja wati kura tjuṯa pitjanyangka tjanampa pukuḻaripai, munu mai kuḻu tjanala tjungungku ngalkupai.”

Luke-aku 19:10

Panya ngayulu Watiku Katjanya pitjangu aṉangu kawalirinytja tjuṯa nguriṟa mantjintjikitja munu Godala maḻakungku tjunguṟa wankaṟu kanyintjikitja.”

Johnku 1:12

Palu aṉangu kutjupa tjaraya palumpa pukuḻaringu munuya palumpa mulamularingu. Ka nyara palulanguṟu paluṟu tjananya Godaku walytjaringkunytjaku palyaṉu. Paluṟu wangkanyangka tjana Mama Godaku katjaringu munu uṉṯalaringu palumpa tjukurwanu. Watinguṟu munu minymanguṟu wiya, palu panya Godanya mukuringkunytjanguṟu kutju.

Johnku 1:29

Ka tjiṉṯungka Johntu Jesunya nyangu palulakutu ngalya-pitjanyangka, munu nyakula paluṟu aṉangu tjuṯangka wangkangu, “Ala, nyawaya! Nyangatja panya paluṟu Godaku panya lamalama, panya nyanga paluṟu aṉangu uwankaraku ngalkilpa iluku Godalu tjananya kura palyantjitjanguṟu kalypangku pungkuwiyangku wantinytjaku.

Johnku 12:47

Palu aṉangungku ngayuku tjukurpa kuliṟa wantinyangka ngayulu pala palunya ngurkantaṟa kuranmankunytja wiya. Panya ngayulu aṉangu tjuṯa wankaṟunkunytjikitja pitjangu ngurkantaṟa tjarantjikitja wiya.

Johnku 3:36

Ka aṉangumpa palumpa katjaku mulamularingkulampa wanka tiṯutjara nyinaku Godala tjungu, palu katjangka tungunpungkula wantirampa paluṟu tjungu wiya mauṉṯalpa alatjiṯu nyinaku, ka Godanya palumpa tiṯutjara mirpaṉpa nyinaku.”

Acts 11:1

Kaya wati panya Jesulu iyantja tjuṯangku kulinu Jew wiya tjuṯangku Godaku tjukurpa wangaṉarangku kuliṟa palumpa mulamularingkunytja. Kaya Jesuku walytja kutjupa tjuṯangku kuḻu palu puṟunypaṯu kulinu ngura winkingka manta Judeala.

Acts 11:18

Kaya tjukurpa nyanga palunya wangkanyangka kuliṟa pilunaringu Peterla piṟuku ngalytjurmaṟa wangkanytja wiya. Munuya wangkangu, “Munta-uwa! Godanya palumpa tjanampa kuḻu mukuringanyi Jew wiya tjuṯaku tjana kuḻu kura wantira palula tjunguringkula wanka tiṯutjara nyinanytjaku.” Munuya palulanguṟulta pukuḻarira Godanya waḻkuṟa puḻkaṟa mirawaṉingi.

Acts 3:26

Ka Godalu palulanguṟu Jesunya ngurkantaṟa iyaṉu nyuralakutu-waraṟa nyura ngaṉmanytju kulintja kampa kutjuparira kura wantira pukuḻpa nyinanytjaku, ka nyara palula maḻangka kutjupa tjuṯangku kuḻu palunya kuliṟa kura wantira kampa kutjuparira pukuḻpa nyinaku.” Alatji Peterlu tjanala wangkangi Jew tjuṯangka.

Rome-aku 11:14

Ka ngayulu nyurala Jew wiya tjuṯangka tjukurpa tjakultjunkunyangka ngayuku walytja tjuṯa tjinguṟu nyaṟaringkuku, Jew panya tjuṯa, munuya palulanguṟu tjinguṟu tjara Jesuku mulamularingkuku, ka Godalu tjananya wankaṟunkuku. Kaṉa nyanga alatjirinyangka puḻkaṟa alatjiṯu pukuḻariku.

Rome-aku 5:6

Kulini nyura? Panya nganaṉa uwankara kura nyinangi munula puṯu walytja palyaringangi, ka nganaṉa kura winki nyinanyangka Christanya nganampa ngalkilpa ilungu tjiṟirpi panya palula alatjiṯu, panya Godalu ngaṉmanytju kulintjitjangka.

1 Kaṟintjaku 15:9

Uwa, ngayulu Jesulu iyantja nyinanyi, palu iyantja panya kutjupa tjuṯa Peternya tjana tjukurtjara puḻka nyinanyi ngayula muṉkara. Ka ngayulu tjukutjuku mulapa nyinanyi, panya ngayulu ngaṉmanytju pikangku waṯaparalpai Godaku walytja tjuṯa.

Ipitjaku 3:8

Palu ngayuluṉa tjanala puḻka wiya alatjiṯu tjukutjuku mulapa ngaṟanyi, Godaku walytja kutjupa uwankarangka waintarinytja wiya. Palu Godaluṉi ngurkantaṟa witulyanu kutjupa tjuṯangka Tjukurpa Palya Jesunyatjara tjakultjunkunytjaku, panya tjukurpa nyanga paluṟu puḻka mulapa uwankarangka waintarinytja.

1 Timitjiku 1:13

Palu ngaṉmanytjuṉa palunya kuranmanangi munuṉa ananingi, munuṉa palumpa walytja tjuṯa kuḻu kuraṟa pungangi. Katju Godanya ngayuku nyakula ngaḻṯuringu, panya watarkungkuṉa kura palyaningi palumpa mulamularingkuwiyangku.

1 Timitjiku 1:19

Uwa, rawa Jesuku Christaku kuliṟa mulamularingama paluṟu nyuntumpa anga-ilunytjitjaku, munu palulanguṟu rawa kuṉṯa wiya nyinama wiṟuṟa palyanyku nyinara. Panya kutjupa tjuṯangkuya kura palyantjatjanungku kuṉṯaku ngurparingu munuya kuṉṯatjaramunungku kura palyalkatinyi rawangku. Palulanguṟuya Godaku tjukurku watarkurira kutjupa kutjupa tjuṯa kutju kulini, Jesuku Christaku tjukaṟuru mulamularingkuwiyangku.

1 Timitjiku 3:1

Palu nyangatja waṟka wiṟu mulapa panya Jesuku walytja tjuṯa aṯunymaṟa kanyintja. Ka watingkumpa waṟka nyanga palunya palyantjikitjangku kuliṟa waṟka wiṟu mularku mukuringanyi. Uwa, tjukurpa nyangatja mulapa.

1 Timitjiku 4:9

Nyanga palulanguṟu nganaṉa Godaku tungun-tungunpa puḻkaṟa alatjiṯu waṟkarinyi. Panya palumpa nganaṉa pukuḻpa mulapa mulamularingkupai God wankaku, panya paluṟu uwankara wankaṟunkupainya. Paluṟu panya mulapa aṉangu palumpa mulamularingkunyangka wankalpai. Nyangatja mulapa alatjiṯu, uwankarangku kuliṟa puḻkaṟa mulamularingkunytjaku alatjiṯu.

1 Timitjiku 6:13

Uwa, Godalu panya uwankaraṯu wankaṟu kanyilpai. Kaṉa palula miṟangka nyuntula wangkara nyuntunya wituwituṉi Jesula Christala miṟangka kuḻu. Panya paluṟu Pontius Pilate-ala ngaṟala tjukurpa wiṟu wangkangu mungaṯu. Uwa, palula pulala miṟangkaṉanta wangkanyi alatji, nyuntu ngayulu wangkara wituwituntja uwankara wangaṉarangku kuliṟa palyanma rawangku Mayatja Jesunya Christanya maḻaku pitjanytjakutu-wangkara.

2 Timitjiku 2:11

Uwa, utila Jesunya Christanya tungun-tunguntu waṉanma, panya tjukurpa wiṟu nyanga alatji ngaṟanyi tjukaṟuru mulapa, “Nganaṉa kura wantirampa Jesula tjunguringkula palula tjungu wanka tiṯutjara nyinaku.

Tayitatjaku 3:8

Uwa Taitatja, tjukurpa nyanganpa ngayulu nyanga nyuntula wangkanytja uwankara tjukaṟuru mulapa ngaṟanyi. Ka nyuntu Jesuku walytja tjuṯangka rapangku wangkara nintinma mulamulangku, kaya nyuntula kuliṟa wiṟu tjuṯa kutju tiṯutjarangku palyantjikitjangku kulilku aṉangu tjuṯa alpamilantjikitjangku. Panya tjukurpa nyanga ngayulu nyuntula wangkanytja tjuṯa wiṟu mulapa ngaṟanyi, kaya aṉangu tjuṯangku wangaṉarangku kuliṟampa Godanya tjukaṟurungku waṉantjikitja nintiringkuku.

Iipuṟuku 7:25

Ka pala palulanguṟu aṉangu uwankara palumpa mulamularingkula Godalakutu pitjanyangka paluṟu tjananya mulapa wankaṟunkuku Godala tjungu pukuḻpa nyinanytjaku. Panya paluṟu wanka tiṯutjara nyinanyi munu tjanampa rawangku Mamala tjapini wiyaringkunytja wiyangku.

1 Johnku 3:5

Ka nyura nintingku kulini panya Christanya pitjangu nganampa ngalkilpa munu nganaṉa kura palyantjitjanguṟu anga-ilungu Godalu nganaṉanya kalypangku pungkuwiyangku wantinytjaku. Palu Christanya kura wiya alatjiṯu.

1 Johnku 3:8

Palu panya kura palyalpai tjuṯa mamuku tjitji tjuṯa nyinanyi, panya mamu paluṟu kuwaripatjaranguṟu alatjiṯu kura palyalkatingi, kaya palumpa tjitji tjuṯangku palu puṟunypaṯu palyaṉi. Palu Godaku Katja panya pitjangu mamungku palyantjitja uwankara wiyantjikitja.

1 Johnku 5:11

Godalu panya wangkangu palumpa katja nganampa ngalkilpa ilunyangka nganaṉanya wankaṟunkunytjikitjangku. Munulanya wankaṟunu palula tjungu wanka tiṯutjara nyinanytjaku.

Revelation 21:5

Munuṉi palulanguṟu wangkangu tjiya wiṟungka nyinanytjalu, “Ngayuluṉa uwankara kampa kutjupaṟa wiṟu palyalku.” Munuṉi piṟuku wangkangu, “Ngayulu nyanga kuwari wangkanytja nyiringka walkatjura, panya nyanga paluṟu tjukaṟuru mulapa ngaṟanyi winkingku kuliṟa mulamularingkunytjaku.”

Revelation 22:6

Kaṉi angeltu wangkangu, “Kulila, wangka nyangatja tjukaṟuru, ka nyuntu mulamularingama. Panya Mayatja Godalu iriti wangkangi wangkatjara tjuṯangka tjana aṉangu tjuṯangka tjakultjunkunytjaku, pala palu puṟunypaṉa Godaku walytja tjuṯangka tjakultjunanyi ngula kutjupa kutjupa tjuṯa wirkankunytjaku.”

Revelation 5:9

Munu paluṟu tjana inma kuwaritja inkangi kuka panya nyaḻpitjara 4-ngku munu tjiḻpi 24-ngku kuḻu nyanga alatji, “Nyuntu kutju palya mulapa nyinanyi nyiri panya rulumapi mantjiṟa aḻantjaku. Uwa, nyuntu kutjungku kiṯi lampiṟa waṉira nyiri aḻalku. Panya nyuntu kutju anga-ilura milkaḻi tjutingu aṉangu tjuṯaku ngalkilpa munun tjananya wankaṟunu wangka kutjupa wangka kutjupa, miṟi kutjupa miṟi kutjupa ngura winkinguṟu tjana Godaku walytjaringkunytjaku.