1 Werïnyu, ikaman ngalechan airorchï kegh kirurutköchan.
Tacha kinetut cho pkono kutinyi airorchï ngalechi mïkulöwungu.
Tera werïnyu, ngaleko kon amesas kïgh nyo netin yongu.
Roröy pich cho ngöghomöch chïreryö, wölo ipu kuti sölwö kiwurat kïlekïtit.
Werïnyu, mewutyeghö kirurutyenyan wölo ikomönchï mïkulöwungu kinetutkochan.
Mepïstö kïchïwïtenin konyïn, Ikomönchï mïkulöwungu.
Ryöghchini kelyechi meghat, petöy kelyechi kirïpöy or nyo wetöy ngwen.
Werïnyu irip kirurutko kon, amepïstö kinetutko komöt.
Amöchömönye kïgh nyo kitötoy töketyaka, amötïng keropa tïkwïn cho chang.
Kuyokyï Yeso lö, “Wölo soyönote tya pich cho lïmöy ngölyonto Tororöt akïrïp.”
Kïnyïl kösïghechay kichïnchï nyïngwïtyan nyo akwagh kï pich cho lïmöy ngölyonto Tororöt akïkomönchï mïkulögh nyo ghanat, akï nyo karam, akïmïkukön ntökïyï akwa.
Kuyokyï Yeso nyinte lö, “Chi anka tïkwïl nyo chömanïn kïrïpöy ngölyontenyan akïchömöy nyinte Paponyan akepkonecha wölo mi nyinte aketïpïyö nko nyinte.
Anana ngölyontonay kyomwowokwa lö, ‘Möminye mötworintö nyo wow kïsir echotyontenyi.’ Ato kichopanïn chane kong, kuchopokwa kong tïkwïl, ntökiter chane ngölyontenyan, kötöteröy nyinkwa tïkwïl.
Wölo lïku chïpöt ato marïpakwanye kirurutchoni, amastekwa ompö aranoni asagh tororötin walaka cho melö kyonkïtökwa.
Soyönote chi nyo somönöy kitapunï akusoyönote pich cho lïmöy ngalechï pö werkoynön akïrïpöy lenyini kikikirchï orinyi, ompöwölo kikïlekïtit ato ighisyot ngalechï.
Wölo kïlenchanïn, “Ewo mesoghanïn! Ochan mötworin le nyi nko tupcheniku chay le werkoy nko chane tïkwïl cho rïpöy ngal cho mi kitapunï. Sagha Tororöt!”
