JOHAN 1:29 - DAÜLANGPÜ LAIHING (BSI)

²⁹ Nyihphei Jisu büpa philei heihja-i eeyei büpai, “Kahdoknyü mang koei lüdaipü Kahvang Mi Cheha kü veituh” shei e.

JOHAN 1:29 Iomraidhean Croise

MÜLANGPÜ 28:38

Hapayü Aaronei shangba shangkü nyuhen, shejüang nanglakthüi moila koshingkü thahpü mang hanei nyulangmao Israel ami ngei kü shuohpü moila peü ngei, Shembüpai yahhen.

ISAIAH 53:10

Büpalei büm mintükhen, hatü hanghihühenü Shembüpai mongpü nyuteke, hatü Shembüpai büpalei yangnyu-ü mangthü shingvaishi moila hük leitükjao, büpai laophülei hühiha eehen, hatü yangnyu shoshoshi nyuhen, hatü büpa homei Shembüpai mongpü aokpü danghen.

ISAIAH 53:11

Büpa shangpong pheikü büpai yangnyu vangngai danghen, hatü büpa shangpongpeyü angsha nevai shei nyingei mongonghen. Ngelei hingshangpü chongphobü homei longi dah shakhühen, hatü büpai jomei mangthü kolanghen.

ISAIAH 53:7

Büpa kü shüvei, hatü hanghihü, shejao büpai laophülei ju ne-ap; Büpayü miha jüshingei deipükei, hatü mi hük mum japjü nenpü keiha, büpai laophülei ju kübü shah phahükao nevam.

HOSEA 14:2

Hapa phoppü yah-ei Shembüpa touei mong leptuh, hatü büpa kü eyeishuoh: “Hamei mang peü tükshih, hatü phahjipai ham yahtuh. Hamei jubenyeijaangi nüng kü jakpü moila shuohhen.

LEVI 10:17

“Mehekei mang moila daülangpü shingei nehahpa? Hapayü longi daülangpü hih; mehenangkü hapayü Shembüpa touei khongei men kü moilapü khongei mang tükhen shingvaishi Kahvangi ha anjinyi kü shuohpeih.

ZEKHARIAH 13:1

Hapa nyih kü, David am phang hatü Jerusalem kü nyupüthü jomei mang hatü nedaünelangpü kübü daühühen shingvaishi yunglok hük bhaohühen.

BHEI-IE 18:1

Shembüpai Aaron kü, “Daülangpü shing nangkü lemhük kü dangkao huluh shuohjema, nüng, anhathü hatü Levi ami hapa mang kohen; shejao ngongdou nangkü lemhük kü dangkao huluh shuohjema, nüng hatü anhapeüthü monhai ha mang kohen.

BHEI-IE 18:23

Shaang mebü Levi ami mon ashakshem kü jungeilangei chongphohen hatü hapakei dousho kemei jomi kohen. Hapayü hüdenhalenshi dükhen shahkungnyü nyüke. Levi ami lebü Israel am kei mükjüp neyahhen.

BHEI-IE 21:9

Hanangkü Mosai melangnyiam yah-ei biü hük ling, hatü lüng kü hapa japtü haongteke. Mechem shennyak hanei kü biüi kaokhenshang, hapa melangnyiami lingpü biü kü veiteke, hatü meidaihamteke.

BHEI-IE 7:27

ha mü mohoh chebaongha hük hatü mi chebaongha hük, hatü vangbong hük lompü mi cheha hük jakpü moila shuohhen koei pei;

BHEI-IE 7:39

ha mü mohoh chebaongha hük, hatü mi chebaongha hük, hatü vangbong hük lompü mi cheha hük jakpü moila shuohhen koei pei;

MATHI 1:21

Pinnyüi yeshang hük angkahen, hatü nüngi büpa kü, ‘Jisu’ shei menhen; mehenangkü büpai laophülei nanglakthü jomei mang kübü yanglanghen” shei e.

MATHI 20:28

mehenangkü Shennyak Hayao chongphohahhen shingvaishi nevai, shejao chongphohen, hatü longshi shing angei leihen nangkü laophülei yangnyu bhei shuohhen yiüpeih.”

JOHAN 1:35

Shao nyihphei Johani büpalei nanglom nyi mü yaongshi nyu,

JOHAN 1:36

hatü büpai Jisu kamei daijapü eeyei büpai, “Kahvang Mi Cheha kü veituh!” shei e.

JOHAN 1:43

Nyihphei Jisui Galilei heihhen tem. Büpai Philip heüei, “Ngei phei mükei” shei e.

JOHAN 2:1

Nyih jempabü kü Galil kahdok Kana chingei yiükjing mo hük nyu, hatü halei Jisulei chenyüao omei nyu.

JOHAN 3:16

Mehenangkü Kahvangi kahdoknyü kü longi bampü nangkü büpai laophülei Halom shuoh; üami büpa kü hinglem nemahhen, shejao düngeipü yangnyuyem danghen.

JOHAN 4:42

Jomi ha nyüha kü, “Hami hajük keyü nüngi epü nangkü hinglemnyu nevaipih, shejao ham peüi laophü laophüi dantepih, hatü hingmei mü hapayü kahdoknyü Yangbü shei hami nyingteke” shei e.

JOHAN 6:51

Ngeiyü vangsho leipü yiüpü yangnyu hahying. Üami hapa hahying hahhen, den kü yemmü nyuhen, hatü kahdoknyü kü ngei shuohpü yangnyu hahyingü ngelei phai’ ” shei eteke.

PHONGSHANTHÜ DOU 13:39

Mosa shahkungi dah neshakhüaokpü lemphü kübü hinglempüthü peü büpa homei dah shaknyüpeih.

PHONGSHANTHÜ DOU 8:32

Shaang büpai ieyei nyupü laiyü ha shüpü khih: “Mi keiha büpa jüshingei müei dai, mimum jappü am touei miha hük nenpü keiha, büpai laophülei ju ne-ap.

1 KORINT 15:3

Mehenangkü ngei mehe dang, ha nyokei shongpü shongnyü vaishi ngei am kü jaiyei shuohtepih: hapayü Laihing kü nyupükei jenei mang shing Khrista di,

2 KORINT 5:21

Mehenangkü büpa kü jen Kahvang daülangshemshepü leihen shingvaishi jenei men kü büpai mang nenyingpü hük mang leihüteke.

GALATIA 1:4

Hapa nemeipü denhivan kübü jen bümei leihühen tata kü jenei Pa Kahvangi mongpükei jenei mang shingvaishi Khristai laophülei yangnyu shuohpeih.

GALATIA 3:13

Shahkungnyü thaüvaü kübü büpa jen shing thaüvaü hük leiyei Khristai jen angei leiteke; mehenangkü hapa nyangei nyüke: “Pü shangkü üpa aphenshang, büpayü thaüvaütükpü.”

1 TIMOTI 2:6

Büpai laophü nying hangku peü angei leihen bhei shuoh, hatü hapayü jiüpü hepak kü denpü shuohteke.

TITUS 2:14

Büpai jen mang peü kübü angei leihen, hatü büpai laophü shing lompü vaihen nangkü doumei dükhüpü nanglakthü daühühen shingvaishi büpai jen shing laophülei yangnyu shuoh.

HEBREW 1:3

Büpayü Kahvang müknyinshekhang khanghüpü hatü Kahvang mekei nyu, büpa meimei anpü, hatü douthü peü büpalei ngan shah-i shümei tuhnyeih. Büpai mangthü daühüpheikü büpa vangsholei Jeiyongpalei lakdah philei uoteke;

HEBREW 2:17

Hanangkü lemphü phikü büpayü laophülei jeihinaü hatü nyahinaüthü kei leihen mü vam, shejüang nanglakthülei mang tükhen shingvaishi jakpü moila leihen büpayü phahji kohpü hatü hingshangpü Kahvang chongphopü dousho kü ngongchong leihen mü vamteke.

HEBREW 9:28

hapa keiha Khrista-ao nanglak longilei mang yah-ei lüdaihen shingvaishi chem mon moila shuohpeih. Büpa nyipabü yiükahen, hayü mangthü mü eteihen nangkü nevai, shejao büpa omdanpüthü kü yemleipü koei yiükahen.

1 PETER 1:19

shejao kawhikang hatü eela neshiüpü Mi Cheha, Khristalei iy homei angei leipeih.

1 PETER 2:24

Mang kübü bümei leiyei jen daülangi nyuhen shingvaishi büpai shophang shangei laophülei büm kü jenei mang koteke; büpa mashapü homei jen meiteke.

1 PETER 3:18

Mehenangkü Khristayao mang nangkü den shing chem mon shangpong; am Kahvang touei müei leihen nangkü daülangpü hük nedaünelangpüthü shingvaishi diteke. Büpa phai kü dihü, shejao laangha kü yem leihü,

1 JOHAN 2:2

hatü büpayü jenei mang shing mang tükhen moila shuohpüba, hatü hayü jenei mang mon nevai, shejao kahdoknyü kempülei mang shingvaishi moila shuohpeih.

1 JOHAN 3:5

Büpayü mang yah-ei lüdainüng shakei vampeih shei ammi nying, hatü büpa kü mang neshiü.

1 JOHAN 4:10

Hapa bampü kü, jeni Kahvang kü bampü nevai, shejao büpai jen kü bampeih, hatü jenei mang shing mang tükhen moila shuohhen nangkü büpai laophülei Halom shompeih.

SHAKEI VAMPÜ 1:5

hatü Jisu Khrista, shahhing denbü, dipü kübü shongei bühpü, hatü kahdoknyü ongthü shak kü vanglem lembü leipü am touei phahji hatü büpa leipü chingmei nyute. Üpai jen kü bamnya hatü büpalei iy homei jenei mang kübü bümei leihü,

SHAKEI VAMPÜ 12:11

Shejao jomi Mi Chehalei iy homei, hatü jomei shah-i denpü homei büpa neütükteke, mehenangkü dihen vaijao jomü yangnyu lanei shuohhen mongei nyuteke.

SHAKEI VAMPÜ 13:8

Kahdoknyü kü nyupü peü, üamei men jütükpü Mi Chehalei yangnyu laitap kü kahdoknyü chongpanghinüng men nyangei nenyu, hathüi hapa kü khümhen.

SHAKEI VAMPÜ 14:1

Hapheikü ngei veishuohjü Zion Kahshangei Mi Cheha yaongshi nyu, hatü büpa mü jom 144, 000 büpalei men hatü Chepalei men shangba kü nyangpüthü nyuteke.

SHAKEI VAMPÜ 14:10

jomphongao Kahvang mongshihpü yiü yung nevuki büpalei phongshanei pati kü shihpü yinghen, hatü jomphongü büpalei daülangpü vangsho phongshanthü hatü Mi Cheha touei aw hatü awkaong meli bahpü shingei shukhen,

SHAKEI VAMPÜ 14:4

Jomphongü nyüha mü nesheihpüthü; mehenangkü jom daüeilangei nyu; jomi Mi Cheha melei dai, halei müei dainyüke. Jomphongü hangku khong kübü Kahvang hatü Mi Cheha shingvaishi angei leilangpü shongpü betjükthü nyuteke,

SHAKEI VAMPÜ 15:3

hatü jomi Kahvang chongphopü Mosalei kesho, hatü Mi Chehalei kesho hapakei lok: “Longpü hatü yashanpeyü nüngei douthü khih, Jeiyong Shembüpa Kahvang! Shahhing hatü jiüpeyü nüngei lemthü, jatthülei Ongpa!

SHAKEI VAMPÜ 17:14

Jomi Mi Cheha khüei vehok hokhen, hatü Mi Chehai jom neühen; mehenangkü büpayü shembüthü khongkü Shembüpa, ongthü khongkü Ongpa, hatü büpa mü nyupüthüyü nyüklangpü, jelangpü hatü hinglempüthü.

SHAKEI VAMPÜ 19:7

Jeni mongongmongleshah, hatü büpa kü müknyinshekhang shuohshah! Mehenangkü Mi Cheha shem yempü ngoiteke, hatü büpalei yiükjingla temei nyüke.

SHAKEI VAMPÜ 19:9

Hahepak kü vangsho phongshani ngei kü, “Ha nyangtuh: Mi Cheha shem yempü mo kü üam kü nyük moihiman!” Shao büpai, “Hathüyü hingshangpü Kahvangei shah” shei eteke.

SHAKEI VAMPÜ 21:14

Hatü chingnyü penyü kü chongnyiam anpünyi nyu, hatü hathü ieyei kü Mi Chehalei phongshan anpünyilei men anpünyi nyu.

SHAKEI VAMPÜ 21:27

Shejao halei nedaünelangpü, nevaijü jiühitnalai dou dükpü nevaijü shahshem meheyao neshüaokhen, shejao Mi Chehalei yangnyu laitap kü men nyangei nyupüthü mon shühen.

SHAKEI VAMPÜ 21:9

Hapheikü vangsho phongshanthü nyet khongkü hük shompü cham nyet nükshung nyet kü maei notü peiyei ngei kü, “Peikei, ngei nüng kü yiükjingla, Mi Chehalei yiük huphahen hih” shei e,

SHAKEI VAMPÜ 5:6

Hapheikü ngei ong uoshing hatü yemmü nyupü yemhathü aa kü, hatü behethü khong mü Mi Cheha hük jütükphei keiha vaung nyet hatü mük nyet, mepa kahdoknyü peü lemei shompü Kahvangei laangthü nyet nyu, ha eeteke.

SHAKEI VAMPÜ 5:8

Mechem büpai laidü yahpa, yemmü nyupü yemha ali hatü behethü hapüali-i Mi Cheha touei aümei sha, hatü jom peüei harp, hon shung kü ayingshü maei shihtü nyu, hathüyü daülangpüthüi phoppü nyuteke.

SHAKEI VAMPÜ 6:1

Hapheikü ngei Mi Chehai füoshang nyet khongkü hük apei ee, hatü ngei yemmü nyupü yemhathü ali khongkü hüki vangmuk ngeü keiha, “Peikei!” shei nyükei dan.

SHAKEI VAMPÜ 6:16

hatü jomi kahshang hatü yaongnyüthü kü nyüktü, “Ham kü vüei shükshih, hatü ong uoshing kü uopübalei dhe kübü, hatü Mi Cheha mongshihpü kübü ham jolangtuh.

SHAKEI VAMPÜ 7:14

Ngei büpa kü, “Longpüba, nüngiang nyingei nyüpeih” shei ngei jangei e. Hahepak kü büpai ngei kü, “Hathüyü shüveidoidei longpü kübü yangei peiküpüthü khih; jomi jomei bhagthuh Mi Chehalei iy kü dhotüktü shotoh-i leihüpü khih.

SHAKEI VAMPÜ 7:17

mehenangkü ong uoshing jiamei Mi Chehayü jom mi yombü vaihen, hatü büpai jom yangnyuyem yunglok touei mühen, hatü Kahvangi jomei mük kübü mükphi peü thittükhen.”