प्र. बोके 2:3 - Walangi

³ तुस लाह रख कइ टिग बिशो असे त में नओएं लिए दुख सीढ़ कइ बि नेईं टूटो।

प्र. बोके 2:3 Iomraidhean Croise

मरकुस 15:21

तपल शमौन नओएं यक मेह्‍णु ग्रां केआं तेनबाई एणे लगो थिआ। से कुरेन शेहरे थिआ त सिकन्दर त रुफुसे बोउ थिआ। तेन्हि तस जुए जब्बरदस्ती कइ तेस थम डिलुण जे बोलु, जेस पुठ यीशु ढनाण थिआ।

लूका 14:27

होर जे कोउं अपु क्रूस ढीड़ कइ मरुण तकर में पता न एईयाल, से में चेला ना बण सकता।”

लूका 18:1

तोउं यीशु रोज दुआ करणे त कदी हार ना मानणे यक कथा अपु चेली शुणाई :

लूका 21:19

तुस ई सोब सेही कइ अपु जीवन बचान्ते।”

लूका 5:5

शमौने तस जे बोलु, “गुरुजी, असी पूरी रात मेहनत की तोउं बि कुछ ना टाइ बटु। फि बि अउं तुं बोलुण पुठ जाल छता।”

लूका 8:15

पर कुछ मेह्‍णु तेस खरी जिमि ईं असे। से परमेश्वरे वचन मन लाई कइ शुणते त तेन्हि पुठ टिगि बिश्ते। त तेन्हि पुठ खरा फल लगता।”

यूहन्ना 15:21

पर ए सोब से तुसी जुओई में चेले भुणे बझई जुए कते, किस कि तेन्हि मोउं लंघाणे बाड़े पता नेईं।

रोमी 12:12

परमेश्वर पुठ अपु उम्मीदे बारे खुश रिहे, दुख तकलीफ अन्तर लाह रखे, हमेशा प्रार्थना कते रिहे।

रोमी 16:12

त्रुफेना भेण त त्रुफोसा भेण जे में नमस्कार, जे प्रभु सेवा करण अन्तर कष्ट कती। में ट्यारी परसिस भेण जे बि में नमस्कार, जेन प्रभु सेवा करण अन्तर सुआ कष्ट किआ।

रोमी 2:7

परमेश्वर तेन्के धे अमर जीवन देन्ता, जे लाह रख कइ खरु कम कते रेहन्ते, ताकि तेन्हि जे परमेश्वर खरु बोलियाल, इज्जत दियेल, होर से तस जुए हमेशा बिशियेल।

रोमी 8:25

पर अस तेस चीजी उम्मीद कते, जे असी अपल तकर मेओरी नेईं। तोउं त असी तस मेण तकर लाह रख कइ भाड़ बिशुण एन्तु।

1 कुरिन्थ 13:7

जे होरी जोई परेम कता, से हमेशा सीढ़ता। से हर हालत अन्तर तस पुठ विश्वास कता। से कदी हिम्मत ना हारता त हमेशा धीरज रखता।

1 कुरिन्थ 16:16

त अउं तुसी जे हथ जोड़ता कि तुस एन्के ईं मेह्‍णु के वश अन्तर बिशे। सद एन्केरी ना, बल्कि तेन्के सोबी के वश अन्तर बिशे जे इस सेवाई कम अन्तर कष्ट कते।

2 कुरिन्थ 10:15

त अपु सेवा केआं बाहरी, केसे होरी के सेवा पुठ, अस घमण्ड न कते। पर असी भरोसा असा कि, जीं जीं तुं विश्वास बधियाल, तीं तीं तुं बझई जोई, हें सेवाई मुताविक, अस बि बधते घेन्ते।

2 कुरिन्थ 11:23

अउं जगरे के ईं बोता, कि मोउं जे बोले कि सेईंए मसीहे सेवक भिन्थ ना? मेईं तेन्हि केआं बि ज्यादी मेहनत किओ असी। मसीहे लिए अउं सुआ लिंगि जेहेल अन्तर छो असा, सुआ लिंगि चाबुके बइ खओ असी त केहि लिंगि अउं मरते मरते बचो असा।

2 कुरिन्थ 4:1

किस कि अस परमेश्वरे कृपादृष्टि बेलिए ईं तस सेवा कते, त अस उम्मीद न छते।

2 कुरिन्थ 4:16

इस बझई जुए अस कदी उम्मीद ना छते। बेशक, हें केणे बाड़ा जिसम कमजोर भुण लगो असा, तोउं बि हें आत्मा हर रोज नोई भुण लगोरी सी।

2 कुरिन्थ 5:9

त हें इच्छा ई असी कि चहे अस साते भोल या दूर भोल, अस तस खुश भुणे कम कते रिहे।

2 कुरिन्थ 6:5

ई हरालण जे कि अस तसे सेवक भिन्थ, असी चाबुके मार खओ असी, जेहेल अन्तर कैद भो असे, हुसुड़े सामणा किओ असा, मजूरी के ईं कष्ट किओ असा, रात भइ खड़ खड़ बिशो असे, त ढुके रेहो असे।

गलाती 6:2

परेशानी त कष्ट अन्तर तुस यकी होरी मदत करे। ई करणे बेलि तुस मसीहे शिक्षाई हेसाब जुए जी सकते।

गलाती 6:9

त, चले! खरे कम करुण जे हिम्मत ना हारते। अगर अस हिम्मत ना हार कइ खरे कम कते रेहन्ते त सुसुर टेम पुठ परमेश्वर असी खरी ईनाम देन्ता।

फिलिप्पी 2:16

तुस परमेश्वरे जीवन देणे बाड़े वचन अन्तर पक्के भोई बिशे। अगर तुस ई सोब कते त मसीह दुबारी एणे रोज अउं इस बोकी पुठ रोभ किढ़ता कि मसीह जे मेईं जे दुख सेहा त कष्ट किआ, से बेकार ना भुआ, बल्कि तसे फल तुस असे।

फिलिप्पी 4:3

ए में सच्चा साथीआ! अउं तें छनेअरे कता कि एन्हि जिल्हाणु के अणबण मुकाण जे मदत कर। किस कि एन्हि मोउं जुए, क्लेमेंस त में होरे साथी जुए खुश खबरी प्रचार करण अन्तर तीं कम किओ थिउ। एन्के नओं परमेश्वरे अपु कताब अन्तर लिख छो असु, जेस अन्तर तेन्हि मेह्‍णु के नओं असे, जेन्हि केईं अमर जीवन असा।

कुलोसी 1:11

अस इ बि प्रार्थना कते कि परमेश्वरे बोडी ताकती बेलि तुस ईं ताकतवर बणे कि कष्ट अन्तर बि सुआ धीरज त बोडी खुशी जुए तेस सीढ़ बटियेल।

1 थेस्सलु 1:3

त हें परमपिता परमेश्वरे सम्हाणि तुस विश्वास अन्तर जे कम कते, परेम जुओई जे मेहनत कते त हें प्रभु यीशु मसीह पुठ जे तुं पक्की उम्मीद असी, तस याद कते।

1 थेस्सलु 2:9

तुसी हें कम त कष्टे बारे याद कते कि अस कीं भ्यागे ब्यादि कम कतेथ, ताकि परमेश्वरे खुश खबरी प्रचार कते टेम केसे गरका ना लौते लगो।

1 थेस्सलु 5:12

त ए भाई त भेणिओं! अस तुसी जे हथ जोड़ते कि जे तुसी बुच कम कते, त प्रभु यीशु अन्तर तुसी बधान्ते, त तुसी शिचालते, तेन्के इज्जत करे।

2 थेस्सलु 3:13

पर ए भाई त भेणिओं! तुस भलाई कते-कुते थकी बि घियेल, त तोउं बि भलाई करण छड़ ना देण।

2 थेस्सलु 3:5

प्रभु तुं मन अन्तर परमेश्वरे परेम त यीशु मसीहे सीढ़णे शक्ति बधाए।

2 थेस्सलु 3:8

असी केसेरी रौठि मुफत अन्तर ना खेई, बल्कि भ्यागे ब्यादि कम-काज किउ, ताकि अस तुं केसेरी पिठ ना एईयेल।

1 तिमुथि 4:10

अस तोउं मेहनत त कष्ट कते, किस कि हें विश्वास तेस जीन्ता परमेश्वर पुठ असा, जे सम्हाई मेह्‍णु, खास कर विश्वासी मेह्‍णु बचाणे बाड़ा असा।

1 तिमुथि 5:17

जे मुखिये सतसंगे कम-काज सुसुर हेरते, खास कइ जे परमेश्वरे वचने प्रचार करण त शिचालण अन्तर कष्ट उठान्ते, तेन्हि सोबी मेह्‍णु दुई गुणा इज्जते हकदार समझे।

इब्रानी 10:36

तुसी लाह रखण जरूरी असा ताकि तुस परमेश्वरे इच्छा पूरी कर बटियेल त तुसी तसे जुबानी फल मेईंयाल।

इब्रानी 12:1

त किस कि बदेई के ईं हें चोहरो कना एन्हि मेह्‍णु के उगाही के अत हुसुड़ा लगो असा, त एईए, असी हर यक तेन्हि लुन्जयारी बोके त पाप, जे असी अराम जोई अपु जाल अन्तर फसान्ते, तेन्हि दूर फटाई छते। होर यीशु मसीह पुठ ध्यान लाई कइ, लाह जोई तेस दौड़ अन्तर दौड़ते, जेस अन्तर असी दौड़ुण असु।

इब्रानी 13:13

तोउं त चले, अस बि बाहर तेस केईं घेन्ते, ताकि अस बि तेन्हि बेज्जती सीढ़ुं, जे तेन सीढ़ो थी।

इब्रानी 6:10

किस कि परमेश्वर अन्याय करणे बाड़ा न भो कि से तस जोई, जे तुं परेम असा, तस बिसिर छता। से जरूर याद कता कि तुसी कीं परमेश्वरे शुचे मेह्‍णु के सेवा की त अभेईं तकर कते अओ असे।

इब्रानी 6:12

होर तुस नकम्मे ना, बल्कि तेन्हि मेह्‍णु के ईं भुन्ते जे सुआ लाह रख कइ विश्वासे बेलि परमेश्वरे सोब जुबान पूरी भुन्ति हेरियेल।

इब्रानी 6:15

पर केहि टेम तकर लाह रख कइ अखिर अन्तर अब्राहमे परमेश्वरे जुबान पूरी भुण काई।

2 पतरस 1:6

होर परमेश्वरे इच्छा जाण कइ अपु अपफ वश अन्तर रखण जे त अपु अपफ वश अन्तर रख कइ लाह रखणे जब्बर कोशिश करे। लाह रखते रखते परमेश्वरे भक्ति करणे कोशिश करे।

प्र. बोके 1:9

अउं यूहन्ना, विश्वास अन्तर तुं भाई त मसीह यीशु लिए दुख सीढ़ण अन्तर तुं ईं हेस्सेदार असा। होर तुं ईं परमेश्वरे राज्ये वारिस भुणे उम्मीद रखो असी। अउं परमेश्वरे वचन त यीशु मसीहे बारे उगाही देणे बझई जोई पतमस नओएं यक टापु अन्तर कैद थिआ।

प्र. बोके 3:10

त जपल सोब धरती बाड़ी परखणे लिए भुमण पुठ मुश्किल घड़ी एन्ती त अउं तुसी तेस घड़ी केआं बचाई रखता, किस कि तुसी में वचने हेसाब जोई लाह रख कइ कष्ट सीढ़ो असे।